ក្រុមគ្រូពេទ្យស្ម័ក្រចិត្តមកពីប្រទេសសឹង្ហបុរីជាច្រើននាក់ បានចុះធ្វើការពិនិត្យ និងព្យាបាលជំងឺមាត់ធ្មេញទូទៅ ជូនប្រជាពលរដ្ឋដោយឥតគិថ្លៃ រយៈពេល៤ថ្ងៃ ដោយសហការជាមួយទន្តពេទ្យកម្ពុជា ដឹកនាំដោយឯកឧត្តមបណ្ឌិត ធឹម សំផូត ក្រុមការងារថ្នាក់ជាតិចុះមូលដ្ឋានស្រុកក្រឡាញ់ ដែលការពិនិត្យព្យាបាលនេះ ធ្វើឡើងក្នុងបរិវេនសាលាបឋមសិក្សាឈូករង្សី ស្ថិតក្នុងភូមិទ្រាស ឃុំសែនសុខ ស្រុកក្រឡាញ់ ខេត្តសៀមរាប ចាប់ពីថ្ងៃទី១៧-២០ ខែមិថុនា ឆ្នាំ២០២៤។
ឯកឧត្តម បណ្ឌិត ធឹម សំផូត មានប្រសាសន៍ថា ក្រុមគ្រូពេទ្យស័្មគ្រចិត្តមកពីប្រទេសសឹង្ហបូរី បានសហការជាមួយទន្តពេទ្យជំនាញៗនៅកម្ពុជា បានមកធ្វើការពិនិត្យ និងព្យាបាលជំងឺមាត់ធ្មេញជូនប្រជាពលរដ្ឋដោយឥតគិតថ្លៃជារៀងរាល់ឆ្នាំ ចាប់តាំងពីឆ្នាំ២០១៥មក នៅតាមបណ្តាខេត្តនានាក្នុងប្រទសកម្ពុជា ប្រកបដោយក្រមសីលធម៌ និងវិជ្ជាជីវៈ។
ឯកឧត្តម ធឹម សំផូត មានប្រសាសន៍ទៀតថា ស្របពេលដែលប្រទេសជាតិមានសុខសន្តិភាពពេញលេញ មានការអភិវឌ្ឍន៍លើគ្រប់វិស័យ ប៉ុន្តែបញ្ហាសុខភាពពលរដ្ឋនៅទីជនបទ នៅតែជាកត្តាកង្វល់របស់រាជរដ្ឋាភិបាល រួមនឹងអ្នកពាក់ព័ន្ធ ដែលត្រូវបន្តយកចិត្តទុកដាក់ក្នុងការសហការជាមួយបណ្ដាប្រទេស រួមនឹងអង្គការ ដៃគូរនានា ធ្វើយ៉ាងណាចូលរួមលើកកម្ពស់សុខមាលភាពប្រជាពលរដ្ឋ។ ជាក់ស្ដែងការសហការគ្នាជាមួយក្រុមគ្រូពេទ្យស្ម័ក្រចិត្តមកពីប្រទេសសឹង្ហបុរី នាពេលនេះ គឺជាការបង្ហាញឲ្យឃើញពីការយកចិត្តទុកដាក់មួយរបស់ក្រុមគ្រូពេទ្យកម្ពុជា និងសឹង្ហបុរី លើបញ្ហាសុខភាពរបស់ប្រជាពលរដ្ឋនៅមូលដ្ឋានជនបទ ជាមួយរាជរដ្ឋាភិបាលកម្ពុជា។
ឯកឧត្តម ក៏បានអំពាវនាវដល់បងប្អូនប្រជាពលរដ្ឋទាំងអស់ ទាំងនៅក្នុងមូលដ្ឋានស្រុកក្រឡាញ់ នៅក្រៅស្រុកក្រឡាញ់ អាចមកទទួលការពិនិត្យព្យាបាលនេះបានគ្រប់ៗគ្នា ចំពោះបងប្អូនដែលមានបញ្ហាមាត់ធ្មេញ ព្រោះការពិនិត្យនេះ គឺពុំមានការគិតសេវាអ្វីទាំងអស់។ ការពិនិត្យនេះដែរ ធ្វើឡើងនៅក្នុងបរិវេនសាលាបឋមសិក្សាឈូករង្សី ស្ថិតក្នុងភូមិទ្រាស ឃុំសែនសុខ ស្រុកក្រឡាញ់ ខេត្តសៀមរាប ចាប់ពីថ្ងៃទី១៧ រហូតដល់ថ្ងៃទី២០ ខែមិថុនា ឆ្នាំ២០២៤៕
