សិក្ខាកាមដែលកំពុងសិក្សាជំនាញបច្ចេកទេស និងវិជ្ជាជីវៈ នៅវិទ្យាស្ថានពហុបច្ចេកទេសភូមិភាគតេជោសែនសៀមរាប ដែលជាសិក្ខាដែលទទួលបានអាហារូបករណ៍ពីរាជរដ្ឋាភិបាល ពួកគាត់បានបង្ហាញក្ដីជឿជាក់ថា ក្រោយបញ្ចប់ការសិក្សាទាំងជំនាញ និងទ្រឹស្ដីនេះ ពួកគាត់នឹងមានសមត្ថភាពអាចទទួលបានការងារធ្វើពីបណ្ដាក្រុមហ៊ុន ឬសហគ្រាសផ្សេងៗ ជាពិសេសក៏អាចបើកទីតាំងអាជីវកម្មខ្លួនឯងបានទៀតផង។
លោក អ៊ុល វណ្ណា និងកញ្ញា គង់ នុត សិក្ខាកាមជំនាញអគ្គិសនី បានបង្ហាញថា ទោះការសិក្សានេះមានរយៈពេល៤ខែពិតមែន តែលោកជឿជាក់ថាក្រោយបញ្ចប់ការសិក្សា លោកនឹងមានសមត្ថភាពគ្រប់គ្រាន់ក្នុងការស្វែងរកការងារធ្វើ ឬបើអាចមានលទ្ធភាពអាចបើរកស៊ីដោយខ្លួនឯងបាន ដោយសារការសិក្សានេះ គឺវិទ្យាស្ថានបានផ្ដល់ទាំងការសិក្សាទ្រឹស្ដី និងអនុវត្តផ្ទាល់ជាមួយលោកគ្រូអ្នកគ្រូមានបទពិសោធន៍ រួមមនឹងសម្ភារៈគ្រប់គ្រាន់ ជាពិសេសគឺការចុះធ្វើកម្មសិក្សានៅតាមក្រុមហ៊ុន ឬសហគ្រាសមួយចំនួនថែមទៀតផង។
យុវជន លឹម ឡៃហុង និង សឿត ដែន សិក្ខាកាមជំនាញក្រាហ្វិកកុំព្យូរទ័រ និងម៉ាស៊ីនត្រជាក់ បានបង្ហាញដែរថា ការផ្ដល់ជំនាញបច្ចេកទេស និងវិជ្ជាជីវៈ ដល់យុវជនមកពីគ្រួសារក្រីក្រ និងងាយរងគ្រោះនេះ ពិតជាមានសារៈសំខាន់ណាស់ ពីព្រោះយុវជនមួយចំនួនកំពុងប្រឈមនឹងការបោះបង់ការសិក្សា និងគ្មានមុខរបរច្បាស់លាស់ដោយសារជីវភាពគ្រួសារ។ តាមរយៈការផ្ដល់អាហារូបករណ៍របស់រាជរដ្ឋាភិបាលលើការសិក្សាជំនាញ់នេះ វានឹងក្លាយជាដើមទុនដ៏សំខាន់សម្រាប់ពួកគាត់។
ព័ត៌មានជាតិ ថ្មីៗ
យុវតី ជា សុខនីម និង ស៊ុត គឹមសៀន ដែលសិក្សាលើជំនាញអគ្គិសនី និងសំណងស៊ីវិល បានបង្ហាញដែរថា ការចាប់យកជំនាញនេះ ដោយសារពួកគាត់ឃើញថា ជំនាញនេះមិនសូវមានសិស្សស្រីរៀននោះទេ។ ម្យ៉ាងទៀតពួកគាត់ចង់លើកកម្ពស់ស្រី លុបបំបាត់ពាក្យថាស្ត្រីមិនអាចរៀនសូត្របានខ្ពង់ខ្ពស់ ឬរៀនជំនាញអ្វីបានដូចជាបុរស។
លោកគ្រូអ្នកគ្រូនៃវិទ្យាស្ថានពហុបច្ចេកទេសភូមិភាគតេជោសែនសៀមរាប បានលើកឡើងថា ការសិក្សាទៅលើជំនាញ C1 ១.៥លាននាក់ ក្នុងរយៈពេល៥ឆ្នាំរបស់រាជរដ្ឋាភិបាល គឺពិតជាបានជួយចូលរួមចំណែកសំខាន់ណាស់ក្នុងការជួយដល់ប្រជាពលរដ្ឋក្រីក្រឱ្យពួកគាត់មានការងារធ្វើសម្រាប់ជួយជីវភាពគ្រួសារនៅពេលបញ្ចប់ការសិក្សា។ ពួកគាត់សំណូមពរឲ្យយុវជនចូលរួមចុះឈ្មោះចូលរៀនជំនាញនេះឱ្យបានច្រើន ស្របទៅតាមពាក្យស្លោកថា មនុស្សម្នាក់ត្រូវមានជំនាញមួយប្រចាំជីវិត។
បើតាមលោកស្រី ផង់ ពុទ្ធី នាយិកាវិទ្យាស្ថានពហុបច្ចេកទេសភូមិភាគតេជោសែន សៀមរាប បានឲ្យដឹងថា កម្មវិធីបណ្តុះបណ្តាលជំនាញបច្ចេកទេសនិងវិជ្ជាជីវៈដល់យុវជនមកពីគ្រួសារក្រីក្រ និងគ្រួសារងាយ រងហានិភ័យ និងក្រុមគោលដៅក្រៅប្រពន្ធ័C1 (1,5M) វិទ្យាស្ថានបានទទួលចុះឈ្មោះយុវជនក្រីក្រ និងគ្រួសាររងហារនីភ័យ ជំហ៊ានទី១ ជាង៣៤០នាក់ និងការទទួលឱ្យចូលរៀនជំហ៊ានទី២ នឹងត្រូវចាប់ផ្ដើមចូលរៀននៅដើមខែមិថុនា ឆ្នាំ២០២៤ខាងមុខនេះ។ ក្នុងនោះយុវជនមកពីគ្រួសារក្រីក្រ និងគ្រួសាររងហានីភ័យ ក៏បានទទួលប្រាក់ឧបត្ថម្ភ ២៨ម៉ឺនរៀល ក្នុងមួយខែ រយៈពេលមួយ៤ខែផងដែរ៕
អត្ថបទ និងរូបភាព៖ លោក អ៊ុន ណារាជ្យ
