កាលពីរសៀលថ្ងៃទី១៧ ខែមិថុនា ឆ្នាំ២០២៤នេះ ឯកឧត្ដម ប្រាក់ សោភ័ណ អភិបាលខេត្ដសៀមរាប បានអញ្ជើញជាអធិបតី ប្រកាសចូលកាន់មុខតំណែងប្រធានក្រុមប្រឹក្សា និងសមាជិកក្រុង និងប្រកាសចូលកាន់មុខតំណែងអភិបាល និងអភិបាលរង នៃគណៈអភិបាលក្រុងរុនតាឯក តេជោសែន ខេត្ដសៀមរាប ដោយមានការចូលរួមពីសំណាក់ឯកឧត្តមលោកជំទាវក្រុមប្រឹក្សាខេត្ត អភិបាលរងខេត្ត រួមនឹងថ្នាក់ដឹកនាំខេត្ត អាជ្្ញាធរមូលដ្ឋាន និងមន្ត្រីរាជការជាច្រើនរូប។
មានប្រសាសន៍នាឱកាសនោះ ឯកឧត្ដម ប្រាក់ សោភ័ណ អភិបាលខេត្ដ បានណែនាំដល់ថ្នាក់ដែលទើបប្រកាសចូលកាន់មុខតំណែងថ្មី ត្រូវខិតខំបំរើការងារជូនប្រជាពលរដ្ឋ ត្រូវចេះសាមគ្គីគ្នាដើម្បីធ្វើយ៉ាងណាឱ្យក្រុងរុនតាឯកតេជោសែន មានការអភិវឌ្ឍន៍គ្រប់វិស័យ ជាពិសេសត្រូវលុបបំបាត់ឲ្យបានរាល់សកម្មភាពអសន្តិសុខក្នុងមូលដ្ឋាន ជារួមលុបបំបាត់ក្មេងទំនើងគ្រប់ប្រភេទ។ ត្រូវខិតខំបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋដោយស្មើភាព តម្លាភាព គណនេយ្យភាព សមធម៌ និងបរិយាបន្ន ជាពិសេសមិនត្រូវប្រកាន់និន្នាការនយោបាយណាមួយនោះឡើយ។
ឯកឧត្ដម ប្រាក់ សោភ័ណ មានប្រសាសន៍ថា សមិទ្ធផល និងស្នាដៃខិតខំប្រឹងប្រែងរបស់រដ្ឋបាលក្រុងរុនតាឯកតេជោសែន ដែលសម្រេចបាននាពេលកន្លងមក ពិតជាបានចូលរួមចំណែកយ៉ាងសំខាន់ក្នុងការពង្រឹងសន្តិភាព ស្ថិរភាពនយោបាយ និងការអភិវឌ្ឍសេដ្ឋកិច្ច សង្គម ឱ្យមានការរីកចម្រើនយ៉ាងឆាប់រហ័ស ដែលធ្វើឱ្យកម្ពុជាយើងដើរតួនាទីកាន់តែសកម្មក្នុងតំបន់ និងលើឆាកអន្តរជាតិ។ ជាមួយគ្នានេះ ឯកឧត្ដមក៏បានចូលរួមអបអរសាទរ កោតសរសើរ នៃការប្រកាសសមាជិកក្រុមប្រឹក្សាក្រុងរុនតាឯក តេជោសែន ដែលត្រូវបានតំណាងប្រជាពលរដ្ឋ ជាសមាជិកក្រុមប្រឹក្សាសង្កាត់ផ្តល់សេចក្តីទុកចិត្តបោះឆ្នោតជ្រើសរើសជាសមាជិកក្រុមប្រឹក្សា ដើម្បីដឹកនាំក្រុងនេះ សំដៅចូលរួមថែរក្សាសុខសន្តិភាព ស្ថេរភាព និងបន្តអភិវឌ្ឍឱ្យមានការរីកចម្រើនលើគ្រប់វិស័យបន្ថែមទៀត។
ឯកឧត្តមបញ្ជាក់ថា ក្រុមប្រឹក្សាក្រុងដែលជាប់ឆ្នោត គឺជាតំណាងឱ្យប្រជាពលរដ្ឋក្នុងមូលដ្ឋានរបស់ខ្លួនទាំងមូល។ លើសពីនេះ ទោះបីជាក្រុមប្រឹក្សានៃរដ្ឋបាលថ្នាក់ក្រោមជាតិត្រូវបានជ្រើសរើសតាមរយៈការបោះឆ្នោតដោយផ្ទាល់ ឬមិនផ្ទាល់ក្តី ក៏ក្រុមប្រឹក្សា នៃរដ្ឋបាលថ្នាក់ក្រោមជាតិ គឺជាផ្នែកមួយនៃអំណាចនីតិប្រតិបត្តិ និងមានស្វ័យភាពក្នុងក្របខ័ណ្ឌ ដែលកំណត់ដោយច្បាប់ លិខិតបទដ្ឋានគតិយុត្តជាធរមាន ក្នុងការគ្រប់គ្រង ចាត់ចែងកិច្ចការមូលដ្ឋានរបស់ខ្លួន ដើម្បីឆ្លើយតបទៅនឹងតម្រូវការប្រជាពលរដ្ឋក្នុងដែនសមត្ថកិច្ចរបស់ខ្លួន។ បន្ថែមពីនេះការបោះឆ្នោតជ្រើសរើសក្រុមប្រឹក្សារាជធានីខេត្ត ក្រុងស្រុកខណ្ឌ អាណត្តិទី៤ នាពេលកន្លងមក ក៏ត្រូវបានវាយតម្លៃថាមានលក្ខណៈសេរី ត្រឹមត្រូវ យុត្តិធម៌ និងគ្មានអំពើហិង្សា ហើយលទ្ធផល នៃការបោះឆ្នោត ក៏ត្រូវបានទទួលស្គាល់ពីគណបក្សនយោបាយនានា ដែលបានចូលរួមក្នុងការបោះឆ្នោតនេះផងដែរ។
សូមជម្រាបថា យោងតាមអនុក្រិត្យស្ដីពីការបង្កើតក្រុងរុនតាឯកតេជោសែន នៃខេត្ដសៀមរាប បានបង្ហាញថា ក្រុងរុនតាឯកតេជោសែន ត្រូវបានបង្កើតឡើង ដោយកាត់យកឃុំចំនួនពីរ ចេញពីស្រុកបន្ទាស្រី និងស្រុកប្រាសាទបាគង រួមមាន ឃុំរុនតាឯក និងឃុំបល្ល័ង្គ។ ការរៀបចំរចនាសម្ព័ន្ធ និងប្រព័ន្ធគ្រប់គ្រងរដ្ឋបាលក្រុងរុនតាឯកតែជោសែន ត្រូវអនុលោកតាមច្បាប់ស្ដីពីការគ្រប់គ្រងរដ្ឋបាលរាជធានីខេត្ដ ក្រុងស្រុកខណ្ឌ និងអនុក្រិត្យលេខ១៨២អនក្រ.បក.ចុះថ្ងៃទី២ខែធ្នូឆ្នាំ២០១៩ ស្ដីពីមុខងារ និងរចនាសម្ព័ន្ធរដ្ឋបាលក្រុង។ ក្នុងនោះចំពោះការប្រកាសរចនាសម្ព័ន្ធជាផ្លូវការ នៃក្រុងរុនតាឯកតេជោសែន នាពេលនេះដែរ មានអភិបាលក្រុង១រូប និងអភិបាលរង៦រូប និងនាយករដ្ឋបាលមួយរូប។ ដោយឡែកក្រុមប្រឹក្សាក្រុង មានប្រធាន១រូប និងសមាជិក ១៣រូប៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
