អាជ្ញាធរខេត្តសៀមរាប ស្នើឲ្យដល់បណ្ដាអង្គការសង្គមស៊ីវិលទាំអស់ បន្តការគំាទ្រ និងចូលរួមដោយស្មោះត្រង់បំផុត ជាមួយរាជរដ្ឋាភិបាលកម្ពុជា អាជ្ញាធរខេត្ត ក្នុងការលើកកម្ពស់លទ្ធិប្រជាធិបតេយ្យ សេរីពហុបក្ស និងការគោរពសិទ្ធិមនុស្ស គំាទ្រកិច្ចដំណើរការលើកវិស័យកំណែទម្រង់នានារបស់រាជរដ្ឋាភិបាល ជាពិសេសកំណែទម្រង់វិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិ និងការការពារធនធានធម្មជាតិបរិស្ថាន ការទប់ស្កាត់បទល្មើសព្រៃឈើ និងនេសាទខុសច្បាប់។ លោក អ៊ឹង គឹមលាង អភិបាលរងខេត្តសៀមរាបមានប្រសាសន៍យ៉ាងដូច្នេះក្នុងវេទិកាពិគ្រោះយោបល់ ស្តីពីភាពជាដៃគូរវាងរដ្ឋបាលខេត្តសៀមរាប និងអង្គការសង្គមស៊ីវិល នៅព្រឹកថ្ងៃទី១៤ ខែមិថុនា ឆ្នាំ២០២៤នេះ ។
លោក អ៊ឹង គឹមលាង បន្តថារាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជាបានដាក់ចេញនៅកម្មវិធីនយោបាយនិងការកែទម្រង់ស៊ីជម្រៅគ្រប់ជ្រុងជ្រោយលើគ្រប់វិស័យឆ្ពោះទៅរកការអភិវឌ្ឍន៍ដោយចីវភាព។ជាក់ស្តែងសមិទ្ធផលនៃការរីកចម្រើន និងការអភិវឌ្ឍប្រទេសជាតិដែលរាជរដ្ឋាភិបាលសម្រេចបានកន្លងមកក៏មានការចូលរួមចំណែកពីគ្រប់ភាគគីពាក់ព័ន្ធ ក្នុងនោះមានដៃគូរអភិវឌ្ឍន៍ វិស័យឯកជន អង្គការសង្គមស៊ីវិល និងសហគមន៍នានាផងដែរ ជាពិសសេអង្គការសង្គមស៊ីវិលក្នុងស្រុក និងបរទេសបានដើរតួនាទីយ៉ាងសំខាន់ក្នុងការផ្តល់ កិច្ចគាំទ្រសេវា ទៅតាមមូលដ្ឋានជនបទនិងក្នុងសហគមន៍។
ជាមួយនោះលោកអភិបាលរងខេត្តបានណែនាំ ដល់សមាគម និងអង្គការមិនមែនរដ្ឋាភិបាលដែលបានចុះបញ្ជីនៅក្នុងក្រសួងមហាផ្ទៃ និងសមាគម និងអង្គការមិនមែនរដ្ឋាភិបាលបរទេសដែលបានចុះអនុស្សរណៈជាមួយក្រសួងការបទេស និងសហប្រតិបត្តិការ អន្តរជាតិ ត្រូវបន្តសកម្មភាពរបស់ខ្លួនឱ្យបានត្រឹមត្រូវស្របតាមបទប្បញ្ញត្តិនៃច្បាប់ស្តីពីសមាគម និងអង្គការមិនមែនរដ្ឋាភិបាល ច្បាប់ និងលិខិតបទដ្ឋានគតិយុទ្ឋនានាជាធរមាន។
បើតាមរបាយការណ៍សង្ខេបរបស់ទីចាត់ការអន្តរវិស័យ នៃរដ្ឋបាលខេត្តសៀមរាប ស្តីពីសកម្មភាពសមាគម អង្គការមិនមែនរដ្ឋាភិបាល និងសហគមន៍នានា បានបង្ហាញថា បច្ចុប្បន្ននេះសមាគម អង្គការមិនមែនរដ្ឋាភិបាល និងសហគមន៍បានកំពុងប្រតិបត្តិការធ្វើសកម្មភាព និងមានទីស្នាក់ការកណ្ដាលនៅខេត្តសៀមរាបប្រមាណជា ៦៦៣ ក្នុងនោះសមាគម និងអង្គការមិនមានរដ្ឋាភិបាលក្នុងស្រុកមានទីស្នាក់ការកណ្ដាលចំនួន៥៣៣ ដោយបានធ្វើសកម្មភាពពាក់ព័ន្ធលើវិស័យអប់រំ កសិកម្ម សិប្បកម្ម សុខាភិបាល សង្គមកិច្ច បណ្ដុះបណ្ដាល វិជ្ជាជីវៈ សិល្បៈ កិច្ចការបរិស្ថាន និង អភិរក្សធនធានធម្មជាតិ ព្រៃឈើទេសចរណ៍ គ្រឿងញៀន សាសនា លើកកម្ពស់សិទ្ធិស្ត្រីកុមារនិងការពារជនងាយរងគ្រោះច្បាប់ និងសិទ្ធិមនុស្ស ។
អត្ថបទ ៖ប្រន ស្រីនីត
រូបភាព ៖ធន់ ពូថេ
កែសម្រួល ៖លោក ហាំ ម៉េងហួត
