កាលពីថ្ងៃទី០៣ ខែកក្កដា ឆ្នាំ២០២៤នេះ ឯកឧត្ដម អ្នកឧកញ៉ា សៀង ណាំ តំណាងរាស្ត្រមណ្ឌលខេត្តសៀមរាប បានអញ្ជើញសម្ពោធដាក់ឱ្យប្រេីប្រាស់ជាផ្លូវការនូវអគារសិក្សា ១ខ្នង កម្ពស់២ជាន់ មាន៥បន្ទប់ នៅសាលាអង្គការស្នាក់នៅស្ម័គ្រចិត្តជួយបង្រៀន ក្នុងស្រុកប្រាទបាគង ខេត្តសៀមរាប ដោយមានការចូលរួមពីលោកស្រី ម៉ននី រង្សី អភិបាលរងខេត្ត អាជ្ញាធរមូលដ្ឋាន ម្ចាស់ជំនួស ប្រជាពលរដ្ឋ និងសិស្សានុសិស្សជាច្រើនរូប។
បើតាមរបាយការណ៍បានឲ្យដឹងថា អង្គការស្នាក់នៅស្ម័គ្រចិត្តជួយបង្រៀន ហៅកាត់ថា HVTO គឺជាអង្គការមិនមែនរដ្ឋាភិបាលក្នុងស្រុក ដែលបានបំពេញបេសកកម្មក្នុងការអភិវឌ្ឍន៍ធនធានមនុស្សលេីវិស័យអប់រំ និងកិច្ចការសង្គម ដេីម្បីរួមចំណែកក្នុងការអភិវឌ្ឍន៍ប្រទេសកម្ពុជាជាមួយរាជរដ្ឋាភិបាល។
លោកស្រី ម៉ននី រង្សី មានប្រសាសន៍ថា វិស័យអប់រំពិតជាមានតួនាទីយ៉ាងសំខាន់ ក្នុងការអភិវឌ្ឍជាតិ ដោយកុមារ យុវជន និងមនុស្សពេញវ័យត្រូវទទួលបានការសិក្សា និងការអប់រំពេញមួយជីវិត ដេីម្បីឆ្លេីយតបទៅនឹងតម្រូវការទីផ្សារការងារប្រកបដៅយគុណភាពខ្ពស់ដែលត្រូវផ្ដោតលេីការសិក្សារៀនសូត្រ ចំណេះដឹងមូលដ្ឋាន ចំណេះជំនាញបច្ចេកទេស និងជំនាញឯកទេសផ្សេងៗ។ ជាមួយនេះលោកស្រី សូមថ្លែងអំណរអរគុណ និងកោតសរសេីរចំពោះ លោក Frank Youdelman និងសប្បុរសជនទាំងអស់ ពិសេសលោក ស៊ិម ពិសិដ្ឋ ស្ថាបនិក និងជានាយកប្រតិបត្តិអង្គការស្នាក់នៅស្ម័គ្រចិត្តជួយបង្រៀន ដែលបានគៀងគរថវិកាពីសប្បុរសជន និងថវិកាផ្ទាល់របស់ម្ចាស់ជំនួយ ក្នុងការសាសង់នូវសមិទ្ធផលដ៏សំខាន់ និងមានតម្លៃដ៏វិសេសវិសាល ប្រកបដោយចិត្តសប្បុរស ដេីម្បីរួមចំណែកស្ដារ និងអភិវឌ្ឍន៍វិស័យអប់រំនៅក្នុងខេត្តសៀមរាបរបស់យេីង។
ឯកឧត្ដម អ្នកឧកញ៉ា សៀង ណាំ មានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រី បានខិតខំប្រឹងប្រែងរំដោះ និងអភិវឌ្ឍប្រទេសជាតិ តាំងពីបាតដៃទទេចេញពីគំនរផេះផង ដឹកនាំប្រទេសឱ្យមានការរីកចម្រើនយ៉ាងឆាប់រហ័ស ធ្វើឲ្យវិស័យសំខាន់ៗនៅកម្ពុជាមានការរីកចម្រើនជាបន្តបន្ទាប់។ ក្នុងនោះវិស័យអបរំយើងមានសាលារៀនគ្រប់កម្រិតស្ទើគ្រប់មូលដ្ឋាន ដែលនេះជាការសបញ្ជាក់ឃើញពីការអភិវឌ្ឍន៍របស់កម្ពុជា។
ឯកឧត្តមបន្តថា ស្របតាមចក្ខុវិស័យវែងឆ្ងាយរបស់រាជរដ្ឋាភិបាលកម្ពុជា និងស្របតាមយុទ្ធសាស្ដ្របញ្ចកោណ ដំណាក់កាលទី១ បានដាក់ចេញនូវបាវចនាចំនួន៥ គឺកំណេីន ការងារ សមធម៌ ប្រសិទ្ធភាព និងចីរភាព និងមានអាទិភាពគន្លឹះចំនួន៥ គឺ មនុស្ស ផ្លូវ ទឹក ភ្លេីង និងបច្ចេកវិទ្យា ជាពិសេសបច្ចេកវិទ្យាឌីជីថល។ ជាមួយនេះគ្រូបង្រៀន គឺជាមនុស្សដែលមានបេះដូងល្អ ក្នុងការបង្ហាត់បង្រៀនផ្ដល់ចំណេះ ជំនាញ និងអភិវឌ្ឍធនធានមនុស្សប្រកបដោយគុណភាព សមត្ថភាព និងគុណធម៌ ដែលជាគន្លឹះសម្រាប់ទ្រទ្រង់កំណេីនសេដ្ឋកិច្ច និងភាពប្រកួតប្រជែងរបស់ប្រទេសជាតិ ជាពិសេសក្នុងពេលដែលប្រទេសកម្ពុជាក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសអភិវឌ្ឍមានចំណូលខ្ពស់នៅឆ្នាំ២០៥០។ ចំពោះសមទ្ធិផលដែលសម្ពោធដាក់ឲ្យប្រើប្រាស់នៅពេលនេះដែរ វានឹងក្លាយជាចំណែកមួយយ៉ាងសំខាន់ក្នុងចូលរួមអភិវឌ្ឍន៍វិស័យអប់រំនៅកម្ពុជាយើង ជាពិសេសខេត្តសៀមរាបផងដែរ៕
ប្រភព៖ រដ្ឋបាលខេត្តសៀមរាប
កែសម្រួល៖ លោក អ៊ុន ណារាជ្យ
