ការដេញថ្លៃគម្រោងសាងសងផ្លូវបេតុងអាមេ ៣ខ្សែ ក្នុងឃុំអន្លង់សំណរ និងឃុំជីក្រែង ស្រុកជីក្រែង ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី០៤ ខែកក្កដា ឆ្នាំ២០២៤ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោកស្រី ឮ ចិន្តា ប្រធានគណៈកម្មការលទ្ធកម្មឃុំជីក្រែង បានឲ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំជីក្រែង បានដាក់ដេញថ្លៃសាងសង់ផ្លូវបេតុងអាមេ ១ខ្សែ ប្រវែង១៦៣ម៉ែត្រ ទទឹង៥ម៉ែត្រ កម្រាស់០.១៥ម៉ែត្រ ដាក់ដែកមុខកាត់៨លី ដាក់លូការពារផ្លូវទំហំមុខកាត់០.៨ម៉ែត្រ ចំនួន៤កង់ និងស្លាកគម្រោងចំនួន១ ក្នុងតម្លៃប៉ាន់ស្មាន ១០៥.០៣៨.១០៣រៀល ដោយមានក្រុមហ៊ុនចំនួន៥ បានដាក់សំណើរ។ ជាលទ្ធផលបានទៅលើក្រុមហ៊ុន ង៉ោ ឈុត ក្នុងតម្លៃ ៤៩.១៩៣.៤៨០រៀល។
ដោយឡែកលោក កង សុីជឿន ប្រធានគណៈកម្មការលទ្ធកម្មឃុំអន្លង់សំណរ បានឲ្យដឹងដែរថា សម្រាប់គម្រោងមូលនិធិឃុំឆ្នាំ២០២៤នេះ ឃុំអន្លង់សំណរ បានដាក់ដេញថ្លៃសាងសង់ផ្លូវបេតុងអាមេ ២ខ្សែ ប្រវែង១៩៦ម៉ែត្រ ទទឹង៥ម៉ែត្រ កម្រាស់០.១៥ម៉ែត្រ និងស្លាកគម្រោងចំនួន២ ក្នុងតម្លៃប៉ាន់ស្មាន ១៣៤.០៦១.៤៦៥រៀល ដោយមានក្រុមហ៊ុនចំនួន៥ បានដាក់សំណើរ។ ជាលទ្ធផលបានទៅលើក្រុមហ៊ុន អំ ចំរើន ក្នុងតម្លៃ ៦១.៥៤៥.០០០រៀល។
ព័ត៌មានជាតិ ថ្មីៗ
ជាមួយនឹងការទទួលបានសិទ្ធនៃការសាងសង់នេះ តំណាងក្រុមហ៊ុនម៉ៅការទាំងពីរ បានធ្វើការប្ដេជ្ញាចិត្ត ដោយសន្យាសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
