នាព្រឹកថ្ងៃទី០៥ ខែកក្កដា ឆ្នាំ២០២៤នេះ រដ្ឋបាលខេត្តសៀមរាប បានសហការជាមួយខណ្ឌរដ្ឋបាលព្រៃឈើ នៃមន្ទីរកសិកម្មខេត្ត និងមន្ទីរស្ថាប័នមួយចំនួនទៀតក្នុងខេត្ត បានដាក់ដាំកូនឈើឈើទាលចំនួន ២.៥០០ដើម លើផ្ទៃដី ៤ហិកតា ក្នុងឃុំឃុនរាម ស្រុកបន្ទាយស្រី ខេត្តសៀមរាប អបអរសាទរបុណ្យរុក្ខទិវា ៩ កក្កដា ២០២៤ ក្រោមអធិបតីភាព ឯកឧត្តម ប៊ុន ថាឬទ្ឋិ តំណាងរាស្ត្រមណ្ឌលសៀមរាប និងលោក អុឹង គឹមលាង អភិបាលរងខេត្ត រួមនិងវត្តមានសមាជិក្រុមប្រឹក្សាខេត្ត ថ្នាក់ដឹកនាំមន្ទីរអង្គភាព និងមន្ត្រីពាក់ព័ន្ធជាច្រើនរូប។
លោក អុឹង គឹមលាង មានប្រសាសន៍ថា “រុក្ខទិវា” ត្រូវបានទទួលស្គាល់ជាផ្លូវការ ដោយមានចែងក្នុងច្បាប់ស្ដីពីព្រៃឈើ ហើយត្រូវបានប្រារព្ធធ្វើឡើងជារៀងរាល់ឆ្នាំ នៅថ្ងៃទី០៩ ខែកក្កដា ក្រោមព្រះរាជអធិបតីភាពដ៏ខ្ពង់ខ្ពស់របស់ ព្រះមហាក្សត្រ នៃព្រះរាជាណាចក្រកម្ពុជា ឬព្រះរាជតំណាង ដែលពិធីនេះប្រារព្ធឡើង ដើម្បីជំរុញការអប់រំប្រជាពលរដ្ឋឱ្យយល់ដឹងពីសារសំខាន់និងផលប្រយោជន៍ព្រៃឈើ រួមសាមគ្គីគា្ន បណ្ដុះឡើងវិញនូវគំនិតស្រឡាញ់ ថែរក្សា ការពារព្រៃឈើនិងបណ្ដុះឡើងវិញ នូវទស្សនៈសន្សំសំចៃក្នុងការប្រើប្រាស់ផល និងអនុផលព្រៃឈើគ្រប់ប្រភេទ បណ្ដុះសា្មរតីគោរពច្បាប់ អនុវត្ដច្បាប់។
លោកអភិបាលរងខេត្ត មានប្រសាសន៍ទៀតថា កិច្ចការថែរក្សាធនធានធម្មជាតិ ជាពិសេសព្រៃឈើ ពិតជាមានសារៈសំខាន់ណាស់ដល់ការរស់រាន និងការអភិវឌ្ឍន៍សង្គមជាតិទាំងពេលបច្ចុប្បន្ន និងទៅពេលអនាគត ហេតុនេះសូមអំពាវនាវដល់ប្រជាពលរដ្ឋដែលកំពុងបន្ដអាជីវកម្មកាប់បំផ្លាញព្រៃឈើ ទន្ទ្រានយកដីព្រៃ ការដុតព្រៃឈើយកដីរដ្ឋធ្វើកម្មសិទ្ធិ សូមបញ្ឈប់ជាបន្ទាន់ ព្រោះការធ្វើអាជីវកម្មព្រៃឈើ និងជំនួញដីព្រៃឈើ គឺជាបទល្មើសដ៏ធ្ងន់ធ្ងរបំផុត ជាពិសេសគ្រោះមហន្ដរាយដល់បរិសា្ថនធម្មជាតិ ដែលបណ្ដាលមកពីការកាប់បំផ្លាញព្រៃឈើនេះ។ ព្រៃឈើពិតជាមានតួនាទីសំខាន់ណាស់ ជាសរសៃឈាមក្នុងវិស័យកសិកម្មជាតិ ជាអាយុជីវិតប្រជាកសិករ និងជាខឿននៃសេដ្ឋកិច្ចជាតិ និងថែរក្សាដំណើរការប្រព័ន្ធអេកូឡូស៊ី ជួយកាត់បន្ថយការប្រែប្រួលអាកាសធាតុ។ ក្រៅពីនេះ ព្រៃឈើក៏បានផ្ដល់នូវសេវាកម្ម និងជួយគាំពារផ្នែកបរិស្ថានជាច្រើនដូចជា ការការពារទីជម្រាល ទប់ស្កាត់ការហូរច្រោះដី ការធ្វើឱ្យប្រសើរឡើងនៃគុណភាពដី និងផ្ដល់នូវផល អនុផលព្រៃឈើដល់ប្រជាពលរដ្ឋក្នុងជីវភាពប្រចាំថ្ងៃ។
លោកមានប្រសាសន៍បន្តថា ចំពោះបុណ្យរុក្ខទិវា ៩កក្កដា នាពេលនេះដែរ ពិតជាបានឆ្លុះបញ្ចាំងយ៉ាងច្បាស់ពីភាពរឹងមាំនៃការកសាងគ្រឹះសេដ្ឋកិច្ចជាតិ ក្រោមកិច្ចរួបរួមជាធ្លុងមួយ បង្ហាញពីសក្ខីកម្មនៃសាមគ្គីភាពរវាងប្រជារាស្រ្ត និងមន្រ្តីរាជការទូទាំងប្រទេស ក្នុងការជំរុញលើកទឹកចិត្តឲ្យចូលរួមចលនាដាំដើមឈើ ដើម្បីផ្ដល់ជាសារប្រយោជន៍ធនធានទ្រទ្រង់វិស័យកសិកម្ម បង្កើនសុខុមាលភាពគ្រួសារ និងជីវភាពសង្គម ព្រមទាំងកិច្ចគាំពារបរិស្ថាន៕
អត្ថបទ និងរូបភាព៖ លោក យូ វង្ស, មុី សុខារិទ្ធ
កែសម្រួល៖ លោក អ៊ុន ណារាជ្យ
