នៅព្រឹកថ្ងៃទី០៥ ខែកក្កដា ឆ្នាំ២០២៤នេះ លេខាធិការដ្ឋាន នៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប(គខបជ) បានបើកកិច្ចប្រជុំបូកសរុបលទ្ធផលការងារឆមាសទី១ ឆ្នាំ២០២៤ របស់ខ្លួនដើម្បីពិនិត្យលើសេចក្តីព្រាងរបាយការណ៍ប្រចាំខែមិថុនា ត្រីមាសទី២ និងពិនិត្យពិភាក្សាលើបញ្ហាកាលពីកិច្ចប្រជុំប្រចាំខែឧសភា ពាក់ព័ន្ធនឹងការងារប្រយុទ្ធប្រឆាំងអំពើជួញដូរមនុស្ស ដឹកនាំដោយលោកស្រី ម៉ននី រង្សី អភិបាលរងខេត្ត និងជាប្រធានលេខាធិការដ្ឋាន គខបជ ដោយមានការចូលរួមអ្នកពាក់ព័ន្ធជាច្រើនរូប។
យោងតាមរបាយការណ៍ សម្រាប់ឆមាសទី១ ឆ្នាំ២០២៤ គខបជ បានអនុវត្តយ៉ាងយកចិត្តទុកដាក់នូវទិសដៅភារកិច្ចរបស់ខ្លួនតាមការគ្រោងទុក និងមានការចូលរួមកាន់តែសកម្ម និងល្អប្រសើរលើការអនុវត្តការងាររបស់អ្នកពាក់ព័ន្ធទាំងអស់។ ជាក់ស្ដែងក្នុងរយៈពេល ៦ខែ ដើមឆ្នាំ២០២៤នេះ គខបជ មន្ទីរអង្គភាព អាជ្ញាធរមូលដ្ឋាន និងអង្គការដៃគូ បានធ្វើការផ្សព្វផ្សាយច្បាប់ស្តីពីការបង្ក្រាបប្រយុទ្ធប្រឆាំងអំពើជួញដូរមនុស្ស អំពើអាជីវកម្មផ្លូវភេទ និងច្បាប់ពាក់ព័ន្ធ តាមរយៈការផ្សព្វផ្សាយភូមិឃុំសង្កាត់មានសុវត្ថិភាព វេទិការសាធារណៈ និងផ្សព្វផ្សាយតាមវិទ្យុ និងទូរទស្សន៍បានចំនួន ៥៦៥៥លើក។
របាយការណ៍ដដែលបង្ហាញទៀតថា ក្រៅពីការងារអនុវត្តទាំងអស់នេះ ក្នុងគោលដៅទប់ស្កាត់អំពើជួញដូរមនុស្ស ស្នងការដ្ឋាននគរបាលខេត្ត និងកងរាជអាវុធហត្ថខេត្ត ក៏បានដាក់កម្លាំងជំនាញចុះល្បាតជាប្រចាំនៅតាមគោលដៅនានា ចុះធ្វើកិច្ចសន្យានៅតាមគោលដៅសង្ស័យដូចជាតាមខារ៉ាអូខេ ហាងម៉ាស្សាជាដើម ព្រមទាំងបានសហការជាមួយអធិការដ្ឋាននគរបាល និងកងអាវុធហត្ថក្រុងស្រុក ចុះធ្វើការណែនាំ និងទប់ស្កាត់ពលរដ្ឋធ្វើចំណាក់ស្រុកទៅក្រៅប្រទេសជាប្រចាំផងដែរ។
មានប្រសាសន៍ក្នុងឱកាសនោះ លោកស្រី ម៉ននី រង្សី បានថ្លែងនូវការកោតសរសើរ និងវាយតម្លៃខ្ពស់ ចំពោះលទ្ធផលការងារដែលក្រុមការងារទាំងអស់បានខិតខំអនុវត្ត និងសម្រេចបាននារយៈពេល ៦ខែកន្លងមកនេះ លើការងារប្រយុទ្ធប្រឆាំងអំពើជួញដូរមនុស្ស និងកិច្ចការពារជនរងគ្រោះ នៅទូទាំងខេត្តសៀមរាប។
លោកស្រីប្រធានលេខាធិការដ្ឋាន ក៏បានជំរុញដល់អ្នកពាក់ព័ន្ធ និងអង្គការដៃគូទាំងអស់ ត្រូវបញ្ជូនរបាយការណ៍មកគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តឲ្យបានគ្រប់អង្គភាពឲ្យបានទាន់ពេលវេលា ជាពិសេសអាជ្ញាធរក្រុងស្រុកទាំង១៣ ត្រូវស្រង់ទិន្នន័យអំពីការចំណាក-ចំណូលស្រុក អ្នកអត់ការងារធ្វើឲ្យបានច្បាស់លាស់ឲ្យពួកគាត់ស្វែងឱកាសនៃការសិក្សាជំនាញដែលមានអាហារូបករណ៍របស់រាជរដ្ឋាភិបាលកំពុងដំណើរការនៅវិទ្យាស្ថានចំនួន២ រួមមានវិទ្យាស្ថានជាតិភូមិភាគតេជោសែនសៀមរាប និងវិទ្យាស្ថានពហុបច្ចេកទេសអង្គរ រៀបចំវគ្គបណ្ដុះបណ្ដាលពង្រឹងសមត្ថភាពសមាជិកក្រុងស្រុក អ្នកពាក់ព័ន្ធ និងមន្រ្តីនគរបាលយុត្តិធម៌ទាំងអស់ អំពីការកំណត់អត្តសញ្ញាណជនរងគ្រោះ និងច្បាប់ពាក់ព័ន្ធ ដើម្បីឈានទៅដល់ការលុបបំបាត់ការជួញដូរមនុស្ស និងការចំណាកស្រុកដោយមិនស្របច្បាប់៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
