ដើម្បីចូលរួមជាមួយរាជរដ្ឋាភិបាល ក៏ដូចជាអាជ្ញាធរខេត្តសៀមរាប ក្នុងការជួយសម្រួលការលំបាករបស់ប្រជាពលរដ្ឋមានជីវភាពខ្វះខាត សប្បុរសជនប្រទេសអូស្ត្រាលីជិត ៤០នាក់ បានបន្តជួយសាងសង់លំនៅឋានជូនប្រជាពលរដ្ឋមួយគ្រួសារ ដែលជាគ្រួសារក្រីក្រ និងងាយរងគ្រោះ នៅក្នុងភូមិត្បែងកើត ឃុំត្បែង ស្រុកបន្ទាយស្រី ខេត្តសៀមរាប តាមរយៈអង្គការសមាគមរួបរួមគ្នាប្រឆាំងភាពក្រីក្រ។
លោក មុត យស់សា ប្រធានអង្គការសមាគមរួបរួមគ្នាប្រឆាំងភាពក្រីក្រ ហៅកាត់ថា ប៉ាប៉ា បានឲ្យដឹងនៅថ្ងៃទី៨ ខែកក្កដា ឆ្នាំ២០២៤នេះថា សប្បុរសជនប្រទេសអូស្ត្រាលីជិត ៤០នាក់នេះ ពួកគាត់បានមកកាន់ខេត្តសៀមរាប ដើម្បីទេសចរណ៍ផង និងធ្វើមនុស្សធម៌ផង ដើម្បីចូលរួមអភិវឌ្ឍន៍ជីវភាពប្រជាពលរដ្ឋខ្មែរជាមួយរដ្ឋាភិបាលកម្ពុជា។ លំនៅឋាននេះមានទំហំ៧ គុណនឹង៩ម៉ែត្រ ធ្វើពីថ្មប្រក់សង្កសី ដែលថវិកាបានមកពីមូលនិធិក្រុមហ៊ុនទេសចរណ៍ Adventure Travel និងអង្គការប៉ាប៉ា និងមួយចំនួនទៀតជាវិភាគទានបានមកពីអាជ្ញាធរមូលដ្ឋាន ក្នុងតម្លៃជាង ១៦.០០០ដុល្លា សម្រាប់ផ្លាស់ប្ដូរជីវភាពកសិករខ្មែរនៅតាមជនបទឱ្យល្អប្រសើរ។
ព័ត៌មានជាតិ ថ្មីៗ
លោកស្រី មេឌី អ៊ីស្មាន់ (Madie Easman) ប្រធានក្រុមសប្បុរសជន បានបញ្ជាក់ថា ការសាងសង់ផ្ទះជូនប្រជាពលរដ្ឋនេះ ដោយសារពួកគាត់ស្រលាញ់ប្រជាជនកម្ពុជា ជាពិសេសលោកស្រី ចង់ឱ្យសប្បុរសជនទាំងនោះ មានបទពិសោធន៍នៅប្រទេសកម្ពុជា ក្នុងការមើលស្ថានភាពប្រជាពលរដ្ឋខ្មែរផ្ទាល់នៅតាមជនបទ ព្រោះពួកគាត់ភាគច្រើនជាសិស្សនៅក្នុងសាលាដ៍ល្បីក្នុងប្រទេសអូស្ដ្រាលី។ លោកស្រីបន្ដថា ស្ថានភាព និងទេសភាពនៅស្រុកខ្មែរ គួរឱ្យស្រលាញ់ ព្រោះមានសុខសុវត្ថិភាពល្អ មានប្រជាជនរាក់ទាក់នៅពេលពួកគាត់បានទៅទីតាំងធ្វើលំនៅឋាននោះ ហើយគម្រោងមូលនិធិសប្បុរសធម៌នេះ នឹងបន្ដធ្វើជាបន្ដបន្ទាប់ ដើម្បីឱ្យចំណងមិត្ដភាពប្រទេសកម្ពុជា និងអូស្ដ្រាលី កាន់តែរឹងមាំថែមទៀត។
លោក យាប់ វណ្ណៈ ជំទប់ទីមួយឃុំត្បែង ស្រុកបន្ទាយស្រី បានបង្ហាញនូវក្ដីរីករាយដែលបានសប្បុរសជនប្រទេសអូស្ដ្រាលី ជួយសាងសង់លំនៅឋានដល់ពលរដ្ឋដែលមានជីវភាពខ្វះខាត ព្រោះផ្ទះថ្មីនេះ នឹងជួយសម្រួលដល់ការរស់នៅប្រជាពលរដ្ឋបានល្អប្រសើរ។ លោកថា ពលរដ្ឋគ្រួសារខាងលើពិតជាត្រេកអរខ្លាំង ដោយសារកន្លងមកពួកគាត់បានរស់នៅក្នុងខ្ពមប្រក់ស្លឹកដូងជាមួយកូនៗ។ ក្នុងនាមអាជ្ញាធរមូលដ្ឋាន លោកសំណូមពរសូមឱ្យសប្បុរសជន បន្តជួយអភិវឌ្ឍន៍សហគមន៍ភូមិត្បែងកើត ឱ្យកាន់តែមានភាពរីកចំរើនបន្ថែមទៀត ខណៈដែលសុខសន្ដិភាពមានគ្រប់ពេលសម្រាប់អ្នកទេសចរ។
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
