អាជ្ញាធរសង្កាត់ស្វាយដង្គំ ក្រុងសៀមរាប នាព្រឹកថ្ងៃទី០៩ ខែកក្កដា ឆ្នាំ២០២៤នេះ បានបន្តដឹកនាំប្រជាពលរដ្ឋធ្វើការដាំជួស និងដាំថ្មីបន្ថែម នូវកូនឈើចម្រុះប្រមាណ ២០០ដើម នៅអមតាមសងខាងផ្លូវ ចាប់ពីផ្លូវមុខវត្តស្វាយដង្គំមក ដល់ផ្លូវ២២ម៉ែត្រ និងធ្វើការដាំជួសនៅតាមដងផ្លូវមួយចំនួនទៀតផងដែរ។
លោក ហ៊ា ហាវ ចៅសង្កាត់ស្វាយដង្គំ បញ្ជាក់ថា ការដាំកូនឈើអមសងខាងផ្លូវ គឺជាការលើកម្ពស់សោភ័ណភាព រួមចំណែកលើកកម្ពស់ភាពបៃតងក្នុងក្រុងសៀមរាប ដើម្បីជាភាពទាក់ទាញដល់អ្នកទេសចរបានមួយកម្រិត ពិសេសកាត់បន្ថយការកើនឡើងនៃកម្ដៅ ហើយវាថែមទាំងបានបង្កើតនូវខ្យល់អាកាសបរិសុទ្ធថែមទៀតផង ពេលដែលដាំឈើទាំងអស់នេះបានលូតលាស់ធំធាត់ល្អ។ ការដាំដើមឈើនេះទៀតសោត មិនត្រឹមតែមានដើមឈើប្រណិតទេ ថែមទាំងមានប្រភេទដើមដែលមានផ្កា ដូចជាដើមរំដួល ដើមត្របែកព្រៃ ឬដើមក្ងោកជាដើម ដែលអាចលូតលាស់ និងមានផ្កាទៅតាមរដូវកាល ដែលធ្វើឲ្យទីក្រុងមានភាពរស់រវើកគ្រប់រដូវកាល ស្រស់បំព្រងគ្រប់រដូវ។
លោកចៅសង្កាត់ បានបញ្ជាក់ទៀតថា ការដាំដើមឈើដើមតាមដងផ្លូវនេះ គឺអាជ្ញាធរនឹងបន្តការដាំ និងដាំជួសបន្ថែមបន្តបន្ទាប់ទៀត ចំពោះកូនឈើណាដែលមិនលូតលាស់ល្អ។ ជាមួយក៏សូមសំណូមពរដល់ប្រជាពលរដ្ឋដែលមានលំនៅដ្ឋានអមសងខាងផ្លូវដែលអាជ្ញាធរបានដាំកូនឈើ សូមចូលរួមថែទាំ ស្រោចទឹក ដាក់ជីដើមឈើដែលមាននៅមុខគេហដ្ឋានរបស់ខ្លួនឲ្យបានជាប់ជាប្រចាំ ត្រូវចូលរួមថែរក្សាការពារនូវសមិទ្ធផលទាំងអស់នេះ ដើម្បីធ្វើឲ្យកូនឈើទាំងនេះលូតលាស់ធំធាត់ឆាប់រហ័ស និងឲ្យបានគង់វង្ស និងមានភាពស្រស់បំព្រងក្នុងមូលដ្ឋានជានិរន្ត៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
