នាថ្ងៃទី០៩ ខែកក្កដា ឆ្នាំ២០២៤នេះ រដ្ឋបាលសង្កាត់សាលាកំរើក ក្រុងសៀមរាប សហការជាមួយអង្គការកុមារពិភពលោក បានបន្តដាំកូនឈើចម្រុះប្រមាណ៩០០ដើម តាមដងផ្លូវសំខាន់ៗក្នុងមូលដ្ឋាន ចូលរួមអបអរសាទរ រុក្ខទិវា ៩កក្កដា និងដើម្បីបំផុសស្មារតីមហាជនទូទៅឲ្យបានដឹងពីសារៈសំខាន់ និងគុណតម្លៃនៃដើមឈើ សំដៅរួមគ្នាកែលំអសោភ័ណភាពតាមដងផ្លូវឲ្យមានភាពបៃតង អមទៅដោយរុក្ខជាតិចម្រុះពណ៌ ដែលការដាំនេះដែរក៏មានការចូលរួមពីសំណាក់ឯកឧត្តម ប្រាក់ សោភ័ណ អភិបាលខេត្តសៀមរាប រួមអាជ្ញាធរមូលដ្ឋាន និងប្រជាពលរដ្ឋជាច្រើនរូប។
លោក សាម ឡន ចៅសង្កាត់សាលាកំរើក បានបញ្ជាក់ថា ការដាំកូនឈើនាពេលនេះ មិនមែនសំដៅលើការលើកកម្ពស់សោភ័ណភាពតាមដងផ្លូវតែប៉ុណ្ណោះទេ តែក៏ជាការបំផុសស្មារតីឲ្យប្រជាពលរដ្ឋចេះស្រឡាញ់ដើមឈើ និងបរិស្ថាន លុបបំបាត់ការចោលថង់ប្លាស្ទិក ឬសំរាមខុសគោលដៅ។ ជាមួយនេះ លោកក៏បានអំពាវនាវដល់បងប្អូនប្រជាពលរដ្ឋក្នុងមូលដ្ឋាន សូមជួយថែទាំកូនឈើដែលដាំនាពេលនេះឲ្យបានល្អ ដើម្បីជាការជួយជំរុញក្រុងសៀមរាប ប្រែក្លាយជាក្រុងបៃតងនាពេលអនាគត រួមចំណែកការកាត់បន្ថយកម្ដៅក្នុងទីក្រុង។ ជាពិសេសត្រូវថែរក្សាដើមឈើទាំងនេះឲ្យបានគង់វង្ស ដើម្បីជាប្រយោជន៍ដល់ការរស់នៅរបស់យើង សហគមន៍យើង ហើយដើមឈើពិតជាមានតួនាទីសំខាន់ណាស់ ក្នុងការជួយគាំពារផ្នែកបរិស្ថាន ការការពារទីជម្រាល ទប់ស្កាត់ការហូរច្រោះដី និងធ្វើឲ្យប្រសើរឡើងនៃគុណភាពដី និងផ្ដល់មកវិញនូវផលប្រយោជន៍ជាច្រើនដល់ការរស់នៅប្រចាំថ្ងៃរបស់យើងទាំងអស់គ្នា។
លោកចៅសង្កាត់បន្តថា តាមរយៈការដាំដើមឈើចំនួន៩០០ដើម តាមដងផ្លូវនាថ្ងៃនេះ និងពេលបន្តបន្ទាប់ទៀត នៅរយៈពេលពី៤ទៅ៥ឆ្នាំខាងមុខទៀត លោកបានបង្ហាញ្ដីជឿជាក់ថា តាមដងផ្លូវនៃសង្កាត់សាលាកំរើក ជាពិសេសក្រុងសៀមរាប ទាំងមូលនឹងពោពេញទៅដោយដើមឈើតូចធំ មានពណ៌បៃតងស្រស់ រួមជាមួយនឹងបរិស្ថានល្អតាមដងផ្លូវ ហើយប្រែក្លាយផ្លូវទាំងនេះជារុក្ខវិថី ដ៏ស្រស់ត្រឈឹងត្រឈៃ៕
ព័ត៌មានជាតិ ថ្មីៗ
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
