នៅរសៀលថ្ងៃទី០៩ ខែកក្កដា ឆ្នាំ២០២៤ គណៈកម្មាធិការពិគ្រោះយោបល់កិច្ចការស្រ្តី និងកុមារខេត្តសៀមរាប បានរៀបចំសិក្ខាសាលាពិគ្រោះយោបល់ និងពិនិត្យការអនុវត្តការងារគាំពារ និងអភិវឌ្ឍកុមារតូចនៅថ្នាក់ក្រោមជាតិ សម្រាប់ខេត្តសៀមរាប ដើម្បីស្វែងយល់អំពីសារៈសំខាន់នៃយន្តការគាំពារ និងអភិវឌ្ឍកុមារតូចជាទម្រង់ពហុវិស័យ និងយល់ដឹងអំពីនីតិវិធីនៃការចូលរួមកសាងផែនការសកម្មភាពគាំពារ និងអភិវឌ្ឍកុមារតូចថ្នាក់ក្រោមជាតិ។
សិក្ខាសាលានេះដែរប្រព្រឹត្តិទៅក្រោមអធិបតីភាពលោកជំទាវ ស៊ិន ណម ប្រធានគណៈកម្មាធិការពិគ្រោះយោបល់កិច្ចការស្រ្តី និងកុមារខេត្តសៀមរាប លោកស្រី ម៉ននី រងី្ស អភិបាលរងខេត្ត និងលោកបណ្ឌិត ប្រាក់ កុសល អគ្គលេខាធិការរង នៃអគ្គលេខាធិការដ្ឋានគណៈកម្មាធិការជាតិគាំពារ និងអភិវឌ្ឍកុមារ និងជាប្រធាននាយកដ្ឋានអប់រំកុមារតូច ដោយមានការចូលរួមពីអស់លោកលោកស្រីជាប្រតិភូក្រសួងអប់រំ តំណាងអង្គការយូនីសេហ្វកម្ពុជា មន្ទីរអង្គភាព និងអ្នកពាក់ព័ន្ធមួយចំនួនទៀត។
លោកជំទាវ ស៊ិន ណម មានប្រសាសន៍ថា សិក្ខាសាលាដែលរៀបចំឡើងនាពេលនេះ ពិតជាមានសារៈសំខាន់ណាស់សម្រាប់អ្នកពាក់ព័ន្ធគ្រប់រូប ក្នុងការទទួលឱកាសជជែកពិភាក្សាគ្នាអំពីបញ្ហាប្រឈម ស្វែងរកដំណោះស្រាយ និងផែនការបន្ត ដើម្បីធ្វើយ៉ាងណាឲ្យជំរុញកុមារតូចគ្រប់រូបមានឱកាសបានចូលរៀន និងទទួលបានគុណភាពអប់រំប្រកបដោយសមធម៍ និងបរិយាបន្ន។ សិក្ខាសាលានេះដែរ ក៏ជាការចូលរួមចំណែកមួយផ្នែក ដើម្បីជួយលើកស្ទួយគុណភាពនៃការអប់រំនៅក្នុងខេត្តសៀមរាប ដើម្បីឆ្ពោះទៅសម្រេចបានគោលដៅអភិវឌ្ឍន៍ប្រកបដោយចីរភាពទី៤ ឆ្នាំ២០៣០ របស់ក្រសួងអប់រំ យុវជន និងកីឡានៃយុទ្ធសាស្រ្តបញ្ចកោណរបស់រដ្ឋាភិបាលកម្ពុជា អាណត្តិទី៧ នៅតែបន្តចាត់ទុកការអភិវឌ្ឍធនធានមនុស្ស ឬវិស័យអប់រំជាអាទិភាពទីមួយ។ ក្នុងនោះដែរធនធានមនុស្សក៏ជាទុនមួយយ៉ាងសំខាន់បំផុតមិនអាចខ្វះបាន ដើម្បីធ្វើការអភិវឌ្ឍប្រទេសយើង។
ព័ត៌មានជាតិ ថ្មីៗ
លោកជំទាវមានប្រសាសន៍ទៀតថា ដើម្បីចូលរួមចំណែកក្នុងការធ្វើយ៉ាងណាឲ្យសម្រេចបានតាមផែនការនេះ ទាមទាឲ្យក្រសួងអប់រំ មន្ទីរអង្គភាពពាក់ព័ន្ធ សាលារៀន អាណាព្យាបាល និងអង្គការដៃគូរអប់រំទាំងអស់ រួមសហការគ្នាក្នុងការបង្កើនឱកាសដល់កុមារទាំងនៅមត្តេយ្យសិក្សា បឋមសិក្សា និងមធ្យមសិក្សា ពង្រឹងគុណភាពនៃការអប់រំតាមសាលារៀន និងសហគមន៍របស់ខ្លួនប្រកបដោយសមធម៍។ លោកជំទាវក៏សូមសម្ដែងនូវការកោតសសើរចំពោះមន្ទីរអប់រំ យុវជន និងកីឡាខេត្ត អាជ្ញាធរពាក់ព័ន្ធ និងអង្គការដៃគូអប់រំទាំងអស់ ដែលបានខិតខំប្រឹងប្រែង ដើម្បីលើកស្ទួយគុណភាពនៃការអប់រំនៅក្នុងខេត្តសៀមរាប ជាលទ្ធផលនៃការរៀនសូត្ររបស់សិស្សានុសិស្សក្នុងខេត្ត យើងបានទទួលលទ្ធផលគួជាទីមោទកភាពពីមួយឆ្នាំទៅមួយឆ្នាំ។
លោកបណ្ឌិត ប្រាក់ កុសល ប្រធាននាយកដ្ឋានអប់រំកុមារតូច បានបញ្ជាក់ថា សារៈសំខាន់នៃការគាំពារ និងអភិវឌ្ឍកុមារតូច គឺចាប់ពីនៅក្នុងផ្ទៃម្តាយ ព្រមទាំងចាំបាច់ត្រូវមានយន្តការអនុវត្តបែបពហុវិស័យ។ រយៈពេលដ៏សំខាន់នៃការអភិវឌ្ឍកោសិកាខួរក្បាលរបស់កុមារ ចាប់ពីកុមារចូលមត្តេយ្យសិក្សា ដល់វ័យកុមារតូចចូលសាលារៀន ដោយផ្តោតលើការអប់រំមាតាបិតា ការភ្ញោជអាន សរសេរ និងសុខភាពកុមារ កិច្ចការសង្គម និងការអនុវត្តជាវិជ្ជមានរបស់មាតាបិតា ព្រមទាំងគុណភាពសេវានោះ ទើបធ្វើឲ្យគន្លងសមត្ថភាពខ្ពស់នៃការត្រៀមរបស់កុមារចូលរៀនបានត្រឹមត្រូវ។ លោកក៏បានបង្ហាញផងដែរ ពីគន្លងនាំឲ្យរំខានធ្ងន់ធ្ងរដល់ការត្រៀមរបស់កុមារចូលរៀន ដូច្នេះកុមារតូចទាំងអស់ត្រូវទទួលបានសេវាអប់រំប្រកបដោយគុណភាព ដើមី្បត្រៀមខ្លួនចូលរៀននៅសាលាបឋមសិក្សា៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
