កូនឈេីចម្រុះ ៣.០០០ដេីម ត្រូវបានអាជ្ញាធរស្រុកវ៉ារិន ដឹកនាំប្រជាពលរដ្ឋ កងកម្លាំងប្រដាប់អាវុធ សិស្សានុសិស្ស រួមនិងព្រះសង្ឃផងនោះ យកទៅដាំនៅតាមសាលារៀន វត្តអារ៉ាម មណ្ឌលសុខភាព និងសាលាឃុំមួយចំនួនក្នុងភូមិសាស្ត្រស្រុក ដេីម្បីជាការជួយលើកកម្ពស់សោភ័ណភាព និងជាការអបអរសាទរ រុក្ខទិវា ៩ កក្កដា ឆ្នាំ២០២៤ ដែលពិធីនេះធ្វើឡើងក្នុងបរិវេនសាលាឃុំវ៉ារិន កាលពីថ្ងៃទី៩ ខែកក្កដា ឆ្នាំ២០២៤នេះ។
លោក ធិននី វិធូរ អភិបាលស្រុកវ៉ារិន បានឲ្យដឹងថា កូនឈើចម្រុះដែលអាជ្ញាធរដឹកនាំដាំនាពេលនេះមានចំនួន ៣.០០០ដើម រួមមាន៖ ដើមគគី ៧៥០ដើម,ដើមគូលែន ៧៥០ដើម, ដើមបេង ៥០០ដើម, ដើមអំពិល ២៥០ដើម, ក្ងោក ២៥០ដើម និងដើមព្រីងចំនួន ៥០០ដើម។ ការដាំកូនឈេីនេះដែរ គឺដើម្បីចូលរួមអបអរសាទរ បុណ្យរុក្ខទិវា ៩ កក្កដា ឆ្នាំ២០២៤ និងជាការរួមចំណែកក្នុងការទប់ស្កាត់ការប្រែប្រួលអាកាសធាតុផងដែរ។
លោកអភិបាលស្រុកបន្តថា ក្រៅជួយទប់ស្កាត់ការប្រែប្រួលអាកាសធាតុហើយ ការដាំនេះក៏ជាការចូលរួមលេីកកម្ពស់សោភ័ណភាពនៅក្នុងមូលដ្ឋានស្រុកទាំងមូលមានភាពស្រស់បំព្រង ពោពេញទៅដោយភាពបៃតង ជួយជំរុញឲ្យមូលដ្ឋានក្លាយជាមូលដ្ឋានបៃតងនាថ្ងៃអនាគត។ ជាមួយនឹងការដាំនេះដែរ លោកក៏បានជំរុញដល់បងប្អូនប្រជាពលរដ្ឋ រួមនឹងអាជ្ញាធរមូលដ្ឋាន និងអ្នកពាក់ព័ន្ធទាំងអស់ ចូលរួមដាំ និងថែរក្សាកូនឈើទាំងអស់នេះឲ្យបានលូតលាស់ល្អ ដើម្បីឲ្យដើមឈើទាំងនេះផ្ដល់ប្រយោជន៍មកឲ្យយើងវិញនៅពេលដែលវាធំ តាមរយៈការផ្ដល់សោភ័ណភាព បរិយាកាសល្អ ជាពិសេសភាពបៃតងនៃដើមឈើទាំងអស់នេះ ក៏ជាការបង្កើនការទាក់ទាញអ្នកទេសចរណ៍ចង់មកទស្សនាផងដែរ៕
ព័ត៌មានជាតិ ថ្មីៗ
អត្ថបទ និងរូបភាព៖ រដ្ឋបាលខេត្តសៀមរាប
កែសម្រួល៖ លោក អ៊ុន ណារាជ្យ
