កាលពីថ្ងៃទី៩ ខែកក្កដា ឆ្នាំ២០២៤ម្សិលមិញនេះ ឯកឧត្តម ប្រាក់ សោភ័ណ ប្រធានគណៈកម្មាធិការសាខាកាកបាទក្រហកកម្ពុជាខេត្តសៀមរាប បានចាត់ក្រុមការងារចុះសួរសុខទុក្ខ និងនាំយកអំណោយមួយចំនួនផ្ដល់ជូនប្រជាពលរដ្ឋក្រីក្រ និងទើបសម្រាលកូនរួចចំនួន៨នាក់ រស់នៅឃុំលាងដៃ ស្រុកអង្គរធំ ខេត្តសៀមរាប។
ក្នុងឱកាសនោះ លោក ស៊ុំ សំអន នាយកប្រតិបត្តិសាខាកាកបាទក្រហកកម្ពុជាខេត្ត បាននាំយកនូវការផ្ដាំផ្ញើសួរសុខទុក្ខពីសំណាក់ ឯកឧត្តម ប្រាក់ សោភ័ណ ប្រធានគណៈកម្មាធិការសាខា ដែលតែងតែគិតគូពីសុខទុក្ខ និងសុខភាពបងប្អូនប្រជាពលរដ្ឋក្រីក្រ ពិសេសបងប្អូនជាស្ត្រីដែលទើបសម្រាលកូនរួច។ ទន្ទឹមនឹងនេះឯកឧត្តមប្រធាន បានលើកទឹកចិត្តដល់មាតាគ្រប់រូបក្រោយសម្រាលកូនរួច សូមបំបៅកូនដោយទឹកដោះម្តាយ ដើម្បីកូនមានសុខភាពល្អ ធន់នឹងជំងឺផ្សេងៗ បន្តពិនិត្យសុខភាពក្រោយពេលសម្រាលឲ្យបានទៀងទាត់ នាកូនទោចាក់វ៉ាក់សាំងបង្ការដល់ទារក ចំណែកម្តាយត្រូវទៅចាក់វ៉ាក់សាំងបង្ការជំងឺមហារីកមាត់ស្បូន និងមហារីកដោះជាដើម។ លោកនាយកប្រតិបត្តិសាខា ក៏បានផ្តាំផ្ញើដល់ស្ត្រីជាមាតាទាំងអស់ត្រូវរស់នៅមានអនាម័យ ទទួលទាន់ទឹកឆ្អិន បរិភោគអាហារមានជីវជាតិគ្រប់គ្រាន់ អាហាររូបត្ថម្ភត្រឹមត្រូវ និងថែទាំសុខភាពឲ្យបានល្អ។
សូមជម្រាបថា អំណោយដែលបានផ្ដល់ជូនស្រ្តីទាំង៨នាក់ ក្នុងម្នាក់ៗទទួលបាន៖ ឃីត១កញ្ចប់ សម្ភារៈទារក១កញ្ចប់ អង្ករ៣០គីឡូក្រាម មី១កេស ត្រីខ១យួរ ទឹកត្រី១យួរ អំបិល១គីឡូក្រាម សាប៊ូ២ដុំ និងថវិកា៥០.០០០រៀល៕
អត្ថបទ និងរូបភាព៖ សាខាកាកបាទក្រហកកម្ពុជាខេត្តសៀមរាប
កែសម្រួល៖ លោក អ៊ុន ណារាជ្យ
