នៅព្រឹកថ្ងៃទី១០ ខែកក្កដា ឆ្នាំ២០២៤ លោក លី គឹមហេង ប្រធានការិយាល័យគ្រប់គ្រងគ្រោះមហន្តរាយ និងសុខភាព តំណាងដ៏ខ្ពង់ខ្ពស់ ឯកឧត្តម ប្រាក់ សោភ័ណ ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និងលោក រិន ឡូត ប្រធានគណៈកម្មាធិការអនុសាខាកាកបាទក្រហមកម្ពុជាស្រុកបន្ទាយស្រី រួមនឹងសហការី បានអញ្ជើញចុះសួរសុខទុក្ខ និងចូលរួមរំលែកទុក្ខក្រុមគ្រួសារប្រជាពលរដ្ឋរងគ្រោះដោយរន្ទះបាញ់កាលពីថ្ងៃទី៧ ខែកក្កដាកន្លងទៅ បណ្ដាលឲ្យពលរដ្ឋម្នាក់ស្លាប់ និង ៤នាក់ទៀតរងរបួស នៅក្នុងភូមិសណ្ដាយ ឃុំខ្នារសណ្ដាយ ស្រុកបន្ទាយស្រី ខេត្តសៀមរាប។
មានប្រសាសន៍នាឱកាសនោះ លោក លី គឹមហេង បាននាំនូវការផ្ដាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ឯកឧត្តម ប្រាក់ សោភ័ណ ប្រធានគណៈកម្មាធិការសាខា ដែលជានិច្ចកាលបានយកចិត្តទុកដាក់ខ្ពស់ចំពោះសុខទុក្ខ បងប្អូនប្រជាពលរដ្ឋរងគ្រោះ និងងាយរងគ្រោះគ្រប់រូប ដោយមិនប្រកាន់ វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ ជាមួយនោះ លោកក៏បានសម្ដែងនូវការសោកស្ដាយចំពោះបងប្អូនគ្រួសារនៃសព ដែលបានបាត់បង់នូវសមាជិកគ្រួសារដោយសារគ្រោះធម្មជាតិដែលយើងមិនអាចដឹងមុននេះ។ លោកថា បន្ទាប់ពីទទួលបានព័ត៌មាននេះ ឯកឧត្តម ប្រាក់ សោភ័ណ ប្រធានគណៈកម្មាធិការសាខា បានចាត់លោក និងសហការី នាំយកអំណោយមនុស្សធម៌ចូលរួមបុណ្យ និងសូមចូលរួមសំដែងនូវការរំលែកទុក្ខយ៉ាងក្រៀមក្រំជាមួយក្រុមគ្រួសារសពផង។
សូមជម្រាបថា អំណោយមនុស្សធម៌ដែលបានផ្ដល់ជូន៖ សម្រាប់ចូលរួមបុណ្យសពមាន អង្ករ៣០គីឡូក្រាម មី១កេស ទឹកត្រី១យួរ ត្រីខ១យួរ មុង១ ភួយ១ សារុង១ ក្រមា១ អំបិល១គីឡូក្រាម និងថវិកា ៤សែនរៀល។ ចំពោះគ្រួសាររងរបួស ៤នាក់ ក្នុងម្នាក់ៗទទួលបាន៖ អង្ករ៣០គីឡូក្រាម មី១កេស ទឹកត្រី១យួរ ត្រីខ១យួរ មុង១ ភួយ១ សារុង១ ក្រមា១ អំបិល១គីឡូក្រាម និងថវិកា ១សែន ៥ម៉ឺនរៀល៕
ព័ត៌មានជាតិ ថ្មីៗ
អត្ថបទ និងរូបភាព៖ សាខាកាកបាទក្រហកកម្ពុជាខេត្តសៀមរាប
កែសម្រួល៖ លោក អ៊ុន ណារាជ្យ
