សមិទ្ធផលជាច្រើនសម្រាប់បម្រើដល់វិស័យព្រះពុទ្ធសាសនា មានដូចជាសាលាពុទ្ធិកសិក្សា១ខ្នង រូបចំលាក់នាគ១គូរ អាងនាគ១ ផ្លូវចូលលំអរ២ខ្សែ ដំរីមង្គលប្រចំាក្លោងទ្វារ៣គូរ និងកញ្ចុះសង់នៅមាត់ស្ទឹងចំនួន៥ នៅក្នុងបរិវេណវត្តចន្ធីភូមិថ្មី ស្ថិតក្នុងភូមិថ្មី ឃុំតាអាន ស្រុកក្រឡាញ់ ខេត្តសៀមរាប ត្រូវបានសម្ពោធដាក់ឲ្យប្រើប្រាស់ជាផ្លូវការ កាលពីថ្ងៃទី១៤ ខែកក្កដា ឆ្នាំ២០២៤នេះ ក្រោមអធិបតីភាពឯកឧត្តម អ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប ដោយមានការចូលរួមថ្នាក់ដឹកនាំ អាជ្ញាធរមូលដ្ឋាន និងប្រជាពលរដ្ឋជាច្រើនរូប។
លោក សុខ ណារ៉េត អភិបាលស្រុកក្រឡាញ់ បានបញ្ជាក់ថា សមិទ្ធផលថ្មីៗដែលសម្ពោធដាក់ឱ្យប្រើប្រាស់នាពេលនេះ គឺជាគំនិតផ្ដួចផ្ដើមរបស់ព្រះគ្រូចៅអធិការវត្ត ព្រមទាំងអាចារ្យគណៈកម្មការវត្ត ក្នុងការខិតខំគៀងគរជាមួយពុទ្ធបរិស័ទជាសប្បុរសជន ជាពិសេសលោកស្រី ហ៊ាន ស៊ីថា និងក្រុមគ្រួសារ រួមនឹងការឧបត្ថម្ភពីសំណាក់សប្បុរសជននានាទាំងក្នុងស្រុក និងក្រៅស្រុក ពុទ្ធបរិស័ទចំណុះជើងវត្តដែលបានចូលរួមបង្កើតឲ្យមាននូវសមិទ្ធិផលទាំងនេះឡើង ដើម្បីបម្រើដល់វិស័យព្រះពុទ្ធសាសនា ធ្វើឲ្យព្រះពុទ្ធសាសនារបស់យើងកាន់តែទទួលបាននូវគុណតម្លៃ ការគោរពពីសំណាក់ប្រជាពលរដ្ឋរបស់យើងផងដែរ។
ឯកឧត្តម អ្នកឧកញ៉ា សៀង ណាំ មានប្រសាសន៍ថា ការរស់នៅក្រោមដំបូលសុខសន្តិភាព គឺធ្វើឲ្យប្រជាពលរដ្ឋយើងទទួលបានលទ្ធផលនូវការអភិវឌ្ឍន៍ឥតឈប់ឈរ ព្រមទាំងមានការជួបជុំ ការធ្វើបុណ្យដាក់ទានប្រកបដោយទឹកមុខសប្បាយរីករាយ។ ជាមួយនេះក្នុងពេលដែលវិស័យអាណាចក្រមានការរីកចម្រើន ទើបធ្វើឲ្យប្រជាពលរដ្ឋដែលគោរពព្រះពុទ្ធសាសនា អាចមានលទ្ធភាព មានធនធានក្នុងការចូលរួម ជាបច្ច័យដើម្បីកសាងនូវសមិទ្ធផលនានាក្នុងវត្តអារាម ហើយវាបានសបញ្ជាក់ឲ្យឃើញពីការបានរួមសាមគ្គីគ្នាកសាង ដើម្បីបម្រើលើវិស័យព្រះពុទ្ធសាសនា ក៏ដូចជាទីកន្លែងសម្រាប់ពុទ្ធបរិស័ទជួបជុំ កសាងនូវបុណ្យកុសលរៀងៗខ្លួន តាមរយៈការប្រារព្ធពិធីសាសនាផ្សេងៗ និងនិយាយដោយឡែកការួមគ្នាបរិច្ចាកធនធានផ្ទាល់ខ្លួនចូលរួមកសាងនូវសមិទ្ធផលថ្មីជាច្រើននៅក្នុងវត្តចន្ធីភូមិថ្មី ដែលត្រូវសម្ពោធដាក់ឲ្យប្រើប្រាស់នាពេលនេះ។
អ្នកឧកញ៉ា សៀង ណាំ ក៏បានថ្លែងនូវការកោតសរសើរដល់ព្រះចៅអធិការវត្ត អាចារ្យគណៈកម្មការ ក៏ដូចជាសប្បុរសជននានា ដែលបានរួមគ្នាចូលរួមគ្រប់សកម្មភាពទាំងអស់ ធ្វើឲ្យទីវត្តអារាមមានការរីកចម្រើន និងជាទីពេញចិត្ត និងជាទីកន្លែងប្រមូលផ្ដុំនូវជំនឿ ដើម្បីឲ្យបងប្អូនប្រជាពលរដ្ឋយើងប្រមូលផ្ដុំគ្នាប្រារព្ធនូវកិច្ចសាសនាផ្សេងៗ ដើម្បីកសាងកុសលផលបុណ្យ។ ឯកឧត្តមក៏បានអំពាវនាវដល់ប្រជាពលរដ្ឋ និងពុទ្ធបរិស័ទាំងអស់សូមបន្តជួយគាំទ្រដល់ការសាងសង់នូវសមិទ្ធផលនានាបន្ថែមទៀត ជាពិសេសការចូលរួមថែរក្សានូវសមិទ្ធផលនានានៅក្នុងទីអារាមដែលមានស្រាប់ឲ្យបានស្ថិតស្ថេរ និងគង់វង្ស សម្រាប់ជាទីបដិបត្តិ និងរក្សាទុកដល់កូនចៅជំនាន់ក្រោយៗ។
សូមជម្រាបថា ក្នុងឱកាសនោះដែរ ឯកឧត្តមអ្នកតំណាងរាស្ត្រ ក៏បានប្រគេននូវបច្ច័យចំនួន ១០លានរៀល ដល់ព្រះគ្រូចៅអធិការវត្ត សម្រាប់ប្រើប្រាស់ដល់ការងារកសាងនូវសមិទ្ធិផលនានាបន្ត លោកយាយលោតតា និងប្រជាពលរដ្ឋដែលបានចូលរួមក្នុងម្នាក់ទទួលបាន សារ៉ុង ឬក្រណាត់១ និងថវិកាមួយចំនួនផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
