កាលពីល្ងាចថ្ងៃទី១៥ ខែកក្កដា ឆ្នាំ២០២៤នេះ ឯកឧត្តម អ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប ឯកឧត្តម ប្រាក់ សោភ័ណ អភិបាលខេត្តសៀមរាប និង ឯកឧត្តម តោ គឹមស៊ាន សមាជិកក្រុមប្រឹក្សាខេត្ត បានអញ្ជើញជាអធិបតី និងផ្ដល់ភ្លើងបូជាសព លោក ទេព ប៊ុនឆាយ ប្រធានក្រុមប្រឹក្សាក្រុងសៀមរាប ដែលបានមរណភាពកាលពីថ្ងៃទី១១ ខែកក្កដា ឆ្នាំ២០២៤ ក្នុងជន្មាយុ ៧២ឆ្នាំ ដោយរោគាពាធ ដែលពិធីនេះធ្វើឡើងក្នុងបរិវេនវត្តស្វាយ សង្កាត់សាលាកំរើក ក្រុងសៀមរាប។
ក្នុងនាមថ្នាក់ដឹកនាំ និងមន្ត្រីរាជការទាំងអស់នៃរដ្ឋបាលខេត្តសៀមរាប ព្រមទាំងឯកឧត្តម អ្នកឧកញ៉ា សៀង ណាំ ផ្ទាល់ សូមសម្ដែងនូវការសោកស្តាយជាអនេក ចំពោះការបាត់បង់មន្ត្រីដ៏ឆ្នើម និងជាទីគោរព ដែលពេញមួយជីវិតរបស់លោកបានចូលរួមយ៉ាងសកម្មក្នុងការងារបម្រើប្រទេសជាតិ មាតុភូមិ ប្រកបដោយស្មារតីទទួលខុសត្រូវខ្ពស់។ លោកក៏បានបន្សល់ស្នាដៃធំៗ រួមទាំងនានាសមទ្ធិផលជាច្រើនទៀតជាមួយរាជរដ្ឋាភិបាល ក្នុងការអភិវឌ្ឍក្នុងក្រុងសៀមរាប ទាំងវិស័យអាណាចក្រ និងពុទ្ធចក្រ រហូតដល់ថ្ងៃដែលលោកទួលមរណៈភាព។
មរណភាព លោក ទេព ប៊ុនឆាយ គឺជាការបាត់បង់នូវមន្ត្រីដ៏សកម្មមួយរូប ដែលត្រូវជាឪពុក ឪពុកក្មេក និងជាជីតា ជាទីគោរពស្រឡាញ់បំផុតរបស់ក្រុមគ្រួសារទាំងអស់នៃសព ដែលជានិច្ចកាលតែង បានលះបង់ខ្ពស់ទាំងកម្លាំងកាយ ចិត្ត និងបញ្ញា ស្មារតី ក្នុងការបីបាច់ថែរក្សាកូនៗជាទីស្រឡាញ់ និងបានចូលរួមចំណែកយ៉ាងធំធេងក្នុងការងារមនុស្សធម៌ ការងារកសាងហេដ្ឋារចនាសម្ព័ន្ធនានាក្នុងមូលដ្ឋានក្រុងសៀមរាប ដោយទទួលបាននូវការគោរពស្រឡាញ់ដ៏ជ្រាលជ្រៅពីប្រជាពលរដ្ឋ។
ក្នុងឱកាសដ៏សោកសៅនេះ ថ្នាក់ដឹកនាំ មន្ត្រីរាជ និងប្រជាពលរដ្ឋទូទាំតខេត្ត បានអញ្ជើញបូជាទៀនធូប តាមគន្លងប្រពៃណីព្រះពុទ្ធសាសនា ជាកិច្ចជូនដំណើរចុងក្រោយ និងឧទ្ទិសបួងសួងជូនដល់ដួងវិញ្ញាណក្ខន្ធ លោក ទេព ប៊ុនឆាយ បានសោយសុខក្នុងសុគតិភពជានិច្ចនិរន្តន៍៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
