នៅថ្ងៃទី១៥ ខែកក្កដា ឆ្នាំ២០២៤ម្សិលមិញនេះ ឯកឧត្តម ប្រាក់ សោភ័ណ អភិបាលខេត្តសៀមរាប បានទទួលជួបសម្តែងការគួរសម និងពិភាក្សាការងារជាមួយ ឯកឧត្តម Jacques Pellet ឯកអគ្គរដ្ឋទូតបារាំង ប្រចាំព្រះរាជាណាចក្រកម្ពុជា និងគណៈប្រតិភូ ដើម្បីជាការពង្រឹង និងពង្រីកនូវចំណងមិត្តភាព និងកិច្ចសហការរវាងប្រទេសទាំង២ ជាពិសេសខេត្តសៀមរាប បន្ថែមទៀត។
ឯកឧត្តម Jacques Pellet បានបញ្ជាក់ថា បារាំង-កម្ពុជា គឺជាមិត្ដដ៏ជិតស្និទ្ធ មិត្តភាពដ៏យូរលង់ណាស់មកហើយ តាមរយៈការពង្រឹងទំនាក់ទំនង និងកិច្ចសហប្រតិបត្តិការគ្នានឹងគ្នាជាបន្តបន្ទាប់ រវាងថ្នាក់ដឹកនាំនៃប្រទេសទាំងពីរ ហើយចំណងមិត្តភាពនេះបានប្រែក្លាយទៅជាមិត្តភាពដែលមិនអាចកាត់ថ្លៃបាន និងជំរុញកិច្ចសហប្រតិបត្តិការរវាងគ្នានឹងគ្នាឲ្យបានកាន់តែស្អិតរមួតបន្ថែមទៀត។
ព័ត៌មានជាតិ ថ្មីៗ
ឯកឧត្តម ក៏បានប្ដេជ្ញាថានឹងចូលរួមសហការជាមួយរដ្ឋបាលខេត្តសៀមរាប ដើម្បីរៀបចំព្រឹត្តិការណ៍នានាក្នុងខេត្តទេសចរណ៍ប្រវត្តិសាស្ត្រមួយនេះ ស្របតាមយុទ្ធនាការ “ទស្សនាសៀមរាប ឆ្នាំ២០២៤” និងព្រឹត្តិការណ៍អបអរសាទរប្រទេសនិយាយភាសាបារាំង ដែលគ្រោងនឹងរៀបចំឆ្នាំ២០២៦ខាងមុខនេះ ដើម្បីការផ្លាស់ប្តូរវប្បធម៌គ្នាទៅវិញទៅមក ដើម្បីលើកស្ទួយវិស័យទេសចរណ៍ រវាងប្រទេសទាំង២ និងជំរុញឱ្យមានសម្ព័ន្ធមេត្រីភាព រវាងខេត្តសៀមរាប និងសាធារណរដ្ឋបារាំងផងដែរ។
ក្នុងឱកាសនោះដែរ ឯកឧត្តម ប្រាក់ សោភ័ណ អភិបាលខេត្ត បានថ្លែងអំណរគុណដល់ ឯកឧត្តម ឯកអគ្គរដ្ឋទូត និងប្រតិភូទាំងអស់ ជាពិសេសអរគុណដល់រដ្ឋាភិបាលប្រជាជនបារាំង និងប្រជាជនបារាំង ដែលតែងតែបានរួមចំណែកក្នុងការជំរុញការអភិវឌ្ឍសង្គម-សេដ្ឋកិច្ចកម្ពុជា ជាពីសេសខេត្តសៀមរាប ឲ្យមានការរីកចម្រើនជាបន្តបន្ទាប់ ព្រមទាំងបន្តការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរឲ្យកាន់តែរឹងមាំ បន្តជួយគាំទ្រ ផ្សព្វផ្សាយ វិស័យទេសចរណ៍ក្នុងខេត្តសៀមរាប ឲ្យកាន់តែមានសក្តានុពលបន្ថែមទៀត។ ជាមួយនោះឯកឧត្តម ក៏បានជំរុញដល់ឯកឧត្តម ឯកអគ្គរដ្ឋទូត និងប្រតិភូទាំងអស់ បន្តជំរុញដល់ភ្ញៀវទេសចរណ៍បរទេស ជាពិសេសភ្ញៀវទេសចរណ៍មកពីប្រទេសបារាំងបន្ថែមទៀត មកទស្សនាខេត្តសៀមរាប ដែលជាខេត្តដែលពោពេញទៅដោយតំបន់ទេសចរណ៍ប្រវត្តិសាស្ត្រជាច្រើន ដែលជាទីពេញចិត្តសម្រាប់ភ្ញៀវទេសចរណ៍អឺរ៉ុប៕
អត្ថបទ និងរូបភាព៖ រដ្ឋបាលខេត្តសៀមរាប
កែសម្រួល៖ លោក អ៊ុន ណារាជ្យ
