គណៈកម្មការលទ្ធកម្មឃុំយាង ស្រុកពួក ខេត្តសៀមរាប នៅថ្ងៃទី១៦ ខែកក្កដា ឆ្នាំ២០២៤នេះ បានប្រកាសបញ្ចប់ការដេញថ្លៃគម្រោងជួសជុល និងសាងសង់ចំនួន២ ប្រកបដោយជោគជ័យ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
អ្នកស្រី ឌុច ម៉ាលីន ប្រធានគណៈកម្មការលទ្ធកម្មឃុំយាង ស្រុកពួក បានឲ្យដឹងថា សម្រាប់គម្រោងមូលនិធិឃុំ ឆ្នាំ២០២៤នេះ ឃុំយាង បានដាក់ដេញថ្លៃគម្រោងចំនួន២។ ក្នុងនោះគម្រោងទី១ គឺគម្រោងជួសជុលផ្លូវដីសក្រាលក្រួសធម្មជាតិមួយខ្សែ ប្រវែង១១៥ម៉ែត្រ ទទឹង៤ម៉ែត្រ កម្រាស់ក្រួសធម្មជាតិ0.១៥ម៉ែត្រ ស្លាកសញ្ញាចរាចរ និងស្លាកគម្រោងចំនួន១ ក្នុងតំលៃប៉ាន់ស្មាន ១១.៩២៨.៥៤៧រៀល ដោយមានក្រុមហ៊ុនចំនួន៣ បានដាក់សំណើរ។ ជាលទ្ធផលបានទៅលើក្រុមហ៊ុន ហ៊ត់ ហៀង ក្នុងតម្លៃ ១១.៥០០.០០០រៀល។ សម្រាប់គម្រោងទី២ គឺគម្រោងសាងសង់លូរំដោះទឹក២ខ្សែ ប្រវែង៣១៥ម៉ែត្រ លូមុខកាត់0.៦0ម៉ែត្រ លូមុខកាត់១ម៉ែត្រ និងស្លាកគម្រោងចំនួន២ ក្នុងតំលៃប៉ាន់ស្មាន ៩២.០៩៧.២០០រៀល ដោយមានក្រុមហ៊ុនចំនួន៣ បានដាក់សំណើរ។ ជាលទ្ធផលបានទៅលើក្រុមហ៊ុន ហ៊ត់ ហៀង ក្នុងតម្លៃ ៩១.១០០.០០០រៀល។
ជាមួយនឹងការទទួលបានសិទ្ធនៃការសាងសង់នេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដែលចែងនៅក្នុងកិច្ចសន្យា៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
