ដើម្បីលើកកម្ពស់សោភ័ណភាព និងបរិស្ថានឲ្យមានភាពបៃតង ពិសេសកាត់បន្ថយកម្ដៅ ផ្ដល់ជាម្លប់ត្រជាក់ផងនោះ អាជ្ញាធរសង្កាត់ស្រង៉ែ ក្រុងសៀមរាប នាព្រឹកថ្ងៃទី១៧ ខែកក្កដា ឆ្នាំ២០២៤នេះ បានដឹកនាំបងប្អូនប្រជាពលរដ្ឋ និងសិស្សានុសិស្សជាច្រើននាក់ បន្តដាំកូនឈើចម្រុះប្រមាណជិត១.០០០ដើម អមតាមសងខាងផ្លូវក្នុងមូលដ្ឋាន ចាប់ពីចំនុចភូមិតាចក ដល់តំបន់ទំនប់៧៨ ក្នុងសង្កាត់ស្រង៉ែ ក្រុង និងខេត្តសៀមរាប។
លោកស្រី ធិវ រួន ចៅសង្កាត់ស្រង៉ែ ក្រុងសៀមរាប បានបញ្ជាក់ថា ការដឹកនាំប្រជាពលរដ្ឋ និងសិស្សានុសិស្ស បន្តដាំកូនឈើចម្រុះអមតាមសងខាងដងផ្លូវនាពេលនេះ គឺមានអត្ថន័យជ្រាលជ្រៅណាស់ ដែលជាចលនាបំផុសស្មារតីប្រជាពលរដ្ឋឲ្យចេះស្រឡាញ់ព្រៃឈើ ហើយចូលរួមដាំ និងការពារព្រៃឈើ ពីព្រោះដើមឈើវាពិតជាបានផ្ដល់ផលប្រយោជន៍យ៉ាងច្រើនដល់មនុស្ស សត្វ ក្នុងការរស់នៅប្រចាំថ្ងៃ ព្រមទាំងជួយលើកស្ទួយបរិស្ថានសង្គម និងមូលដ្ឋានផងដែរ។
លោកស្រីចៅសង្កាត់ បន្តថា ការដាំកូនឈើនាពេលនេះដែរ ក៏ជាការចូលរួមជំរុញក្រុងសៀមរាប ក្លាយជាក្រុងបៃតងនាពេលខាងមុខ ទាក់ទាញភ្ញៀវទេសចរ កាត់បន្ថយកម្តៅក្នុងទីក្រុង។ តាមរយៈការដាំដើមឈើនេះ អាជ្ញាធរនឹងដាំបន្តបន្ទាប់ទៀត ហើយសង្ឃឹមជឿជាក់ថា នៅរយៈពេលប៉ុន្មានឆ្នាំខាងមុខ តាមដងផ្លូវក្នុងក្រុងសៀមរាបទាំងមូល នឹងពោពេញទៅដោយដើមឈើតូចធំ មានពណ៌បៃតងស្រស់ រួមជាមួយនឹងបរិស្ថានល្អតាមដងផ្លូវ ហើយប្រែក្លាយផ្លូវទាំងនេះជារុក្ខវិថី ដ៏ស្រស់ត្រឈឹងត្រឈៃ។
ក្នុងនាមអាជ្ញាធរមូលដ្ឋាន លោកស្រីកបានមានប្រសាសន៍អំពាវនាវដល់បងប្អូនប្រជាពលរដ្ឋក្នុងមូលដ្ឋាន សូមជួយថែទាំកូនឈើដែលដាំនាពេលនេះឲ្យបានល្អ ដើម្បីជាប្រយោជន៍ដល់ការរស់នៅរបស់យើង សហគមន៍យើង ហើយដើមឈើពិតជាមានតួនាទីសំខាន់ណាស់ ក្នុងការជួយគាំពារផ្នែកបរិស្ថាន ការការពារទីជម្រាល ទប់ស្កាត់ការហូរច្រោះដី និងធ្វើឲ្យប្រសើរឡើងនៃគុណភាពដី និងផ្ដល់មកវិញនូវផលប្រយោជន៍ជាច្រើនដល់ការរស់នៅប្រចាំថ្ងៃរបស់យើងទាំងអស់គ្នា៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
