នៅថ្ងៃទី១៨ ខែកក្កដា ឆ្នាំ២០២៤នេះ សម្ដេចធិបតី ហ៊ុន ម៉ាណែត នាយករដ្ឋមន្ដ្រី និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអញ្ជើញជាអធិបតី ក្នុងពិធីបញ្ចុះបឋមសិលាសាងសង់សារមន្ទីរសម្ដេចព្រះព្រហ្មរតនមុនី ពិន សែម ក្នុងបរិវេណវត្តរាជបូណ៌ ក្រុងសៀមរាប ខេត្តសៀមរាប ដោយមានការនិមន្ត និងអញ្ជើញចូលរួមពីសំណាក់សម្ដេចសង្ឃ មន្ត្រីសង្ឃ ឯកឧត្តមលោកជំទាវជាថ្នាក់ដឹកនាំ មន្រ្តីរាជការ លោកយាយលោកតា និងប្រជាពលរដ្ឋជាច្រើនអង្គនាក់។
ឯកឧត្តម ប្រាក់ សោភ័ណ អភិបាលខេត្តសៀមរាប បានឲ្យដឹងថា សារមន្ទីរសម្ដេចព្រះព្រហ្មរតនមុនី ពិន សែម ដែលបានរៀបចំពិធីបញ្ចុះបឋមសិលាសាងសង់នាពេលនេះ គឺសាងសង់សាងសង់ជារចនាបទខ្មែរ មានទំហំបណ្តោយ ៣៤ម៉ែត្រ ទទឹង២៦.៦ម៉ែត្រ កម្ពស់២ជាន់ គូសប្លង់ដោយមន្ត្រីជំនាញអាជ្ញាធរជាតិអប្សរា ដោយមានការឯកភាពពីសម្ដេចព្រះព្រហ្មរតនមុនី ពិន សែម។ សារមន្ទីរនេះគ្រោងថវិកាចំណាយប្រមាណ ១.០៣៩.៦៦០ដុល្លារអាមេរិក ដោយប្រើប្រាស់រយៈពេល២៤ខែក្នុងការសាងសង់។ អត្ថប្រយោជន៍នៃសារមន្ទីរនេះ គឺរួបរួមកម្លាំងជាតិតែមួយ ដើម្បីការពារសម្បត្តិបេតិកភណ្ឌជាតិ រវាងស្ថាប័នពុទ្ធចក្រ និងអាណាចក្រ និងទាក់ទាញភ្ញៀវទេសចរកាន់តែច្រើនមកកាន់តំបន់រមណីយដ្ឋាន ជាមួយនឹងវត្ថុសិល្បៈសរុបប្រមាណ ២.៥៧៥វត្ថុ មានអាយុកាលចាប់ពីសម័យបុរេប្រវត្តិ រហូតដល់សម័យក្រោយអង្គរ។
ថ្លែងក្នុងឱកាសនោះ សម្ដេចធិបតី ហ៊ុន ម៉ាណែត បានមានប្រសាសន៍ថា ក្រោយសាងសង់រួចរាល់ សារមន្ទីរសម្ដេចព្រះព្រហ្មរតនមុនី ពិន សែម ក្នុងវត្តរាជបូណ៌នឹងក្លាយជាតំបន់ទេសចរណ៍មួយបន្ថែមសម្រាប់ខេត្តសៀមរាប បន្ទាប់ពីសារមន្ទីរសម្ដេចតេជោ សន្តិភាព ស្ថិតក្នុងស្រុកប្រាសាទបាគង ដែលកំពុងសាងសង់ដើម្បីដាក់តាំងបង្ហាញនូវភស្តុតាំង និងរឿងរ៉ាវប្រវត្តិសាស្ត្រសង្គ្រាម សំណល់យុទ្ធភ័ណ្ឌ និងជីវិតពិត ផលលំបាក និងការឈឺចាប់របស់ប្រជាជនកម្ពុជា ដែលបានឆ្លងកាត់សង្គ្រាម និងការខិតខំក្រោយសង្គ្រាមរហូតបានសន្តិភាពពេញលេញ និងការអភិវឌ្ឍមកដល់សព្វថ្ងៃនេះ។
សម្ដេចធិបតី ហ៊ុន ម៉ាណែត មានប្រសាសន៍បន្តថា ការសាងសង់សារមន្ទីរសម្ដេចព្រះព្រហ្មរតនមុនី ពិន សែម បានចូលរួមចំណែកសង្គមសេដ្ឋកិច្ចជាតិនៅខេត្តសៀមរាប និងទូទាំងប្រទេស តាមរយៈរូបភាពចំនួន២៖ ទី១.គឺការចូលរួមចំណែកថែរក្សាសម្បត្តិវប្បធម៌កេរដំណែលដូនតា និងទី២.ចូលរួមលើកកម្ពស់វិស័យទេសចរណ៍ក្នុងខេត្តសៀមរាប តាមរយ់ការរៀបចំទីតាំងនេះក្លាយជាគោលដៅទេសចរណ៍បន្ថែម។ តាមរយៈនេះ សាងសង់សារមន្ទីរសម្ដេចព្រះព្រហ្មរតនមុនី ពិន សែម គឺជាបង្កើតឡើងដើម្បីជាការបំផុសស្មារតីឲ្យសិស្សានុសិស្ស អ្នកស្រាវជ្រាវ ភ្ញៀវទេសចរជាតិ និងអន្តរជាតិ ស្រលាញ់ ថែរក្សា ការពារសម្បត្តិវប្បធម៌ជាតិ លើកតម្កើង ទំនៀមទំលាប់ ប្រពៃណីដ៏ល្អផូរផង់។ រក្សាទុកវត្ថុបុរាណសាងពីដីដុត លោហៈ អង្កាំ ឈើ ឆ្អឹង ភ្លុក ថ្ម សរុបប្រមាណ២.៥៧៥វត្ថុ មានអាយុកាលចាប់ពីសម័យបុរេប្រវត្តិ រហូតដល់សម័យក្រោយអង្គរ។
សម្ដេចធិបតីនាយករដ្ឋមន្ត្រី បានធ្វើការវាយតម្លៃខ្ពស់ ចំពោះសម្ដេចព្រះព្រហ្មរតនមុនី ពិន សែម ព្រះសង្ឃគ្រប់ព្រះអង្គ ពុទ្ធបរិស័ទ្ធជិតឆ្ងាយ ដែលបានខិតខំរួមចំណែកដើម្បីកសាងសារមន្ទីរនេះឡើង រួមនឹងសមិទ្ធផលជាច្រើនទៀត ស្ថិតក្នុងបរិវេនវត្តរាជបូណ៌ ដែលសមិទ្ធផលទាំងអស់នេះ គឺជាវិភាគទានដ៏ថ្លៃថ្លារបស់វត្តរាជបូណ៌ ក៏ដូចជាការបង្ហាញពីការចូលរួមរបស់វិស័យព្រះពុទ្ធសាសនា ក្នុងការកសាងសង្គមជាតិឲ្យបន្តស្ថិតនៅក្នុងសន្តិភាព និងការអភិវឌ្ឍជានិរន្ត។ ជាមួយគ្នានេះ វត្តអារាម ព្រះសង្ឃ ព្រះពុទ្ធសាសនា បានដើរតួនាទីយ៉ាងសំខាន់ក្នុងការបណ្តុះបណ្ដាលនូវបញ្ញាញាណ ជាថ្នាលបណ្តុះគ្រាប់ពូជបញ្ញាវនសម្រាប់ការអភិរក្ស និងអភិវឌ្ឍន៍ជាតិលើគ្រប់វិស័យ។ ប្រទេសជាតិមួយមានការអភិវឌ្ឍប្រកបដោយសមធម៌ និងមានចីរភាព ទាមទាឲ្យមានការអបរំផ្នែកសីលធម៌ គុណធម៌ ចរិយាធម៌ ជាពិសេសគឺការអប់រំតាមគន្លងមាគា៌ព្រះពុទ្ធសាសនា៕
អត្ថបទ និងរូបភាព៖ លោក អ៊ុន ណារាជ្យ
