នាព្រឹកថ្ងទី១៩ ខែកក្កដា ឆ្នាំ២០២៤ លោកជំទាវ សុខ ណារ៉ូ អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានអញ្ជើញជាអធិបតីក្នុងពិធីប្រគល់ជូននូវកន្លែងលាងសម្អាតដៃ មួយកន្លែង ដល់លោកគ្រូ អ្នកគ្រូ និងសិស្សានុសិស្ស នៅអនុវិទ្យាល័យ សម្ដេចតេជោ ហ៊ុន សែន គ្រួស។
តាមរបាយការណ៍លោក ស៊ុ សំអន នាយកសាខាកាកបាទក្រហមកម្ពុជា ខេត្តសៀមរាប បានឱ្យដឹងថា ការសាងសង់កន្លែងលាងសម្អាតដៃនេះ បានទទួលការឧបត្ថម្ភសាងសង់ពី ប្រតិភូកាកបាទក្រហមសាធារណៈរដ្ឋកូរ៉េ ខេត្ត ឆុងជឺ តាមរយៈសាខាកាកបាទក្រហមកម្ពុជាខេត្តសៀមរាប។
លោកជំទាវ សុខ ណារ៉ូ បានមានប្រសាសន៍ថា ការសាងសង់កន្លែងលាងសម្អាតដៃនេះពិតជាមានសារៈសំខាន់ណាស់សម្រាប់សិស្សានុសិស្ស ដើម្បីឱ្យពួកគាត់បាន ប្រើប្រាស់ក្នុងការលាងសម្អាតដៃគ្រប់ពេលវេលា។ ការលាងសម្អាតដៃជាមួយសាប៊ូគឺជា វិធីមួយសាមញ្ញបំផុត ដែលអាចកម្ចាត់នៅជាប់និងដៃបានយ៉ាងងាយ និងធានាបាននូវសុខភាពល្អប្រសើរជៀសផុតពីការរាតត្បាតជំងឺផ្សេងៗ ។
ឆ្លៀតក្នុងឱកាសនោះផងដែរ លោកជំទាវ សុខ ណារ៉ូ អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ក៍បានមានប្រសាសន៍ណែនាំ និងផ្តាំផ្ញើរដល់ប្អូនៗសិស្សានុសិស្សអស់គ្នាត្រូវ សម្អាតបរិស្ថានឱ្យបានល្អ ទាំងនៅផ្ទះ សាលារៀន និងទីសាធារណៈ ម្យ៉ាងវិញទៀត បរិស្ថានល្អ បាននាំនូវកិត្តិយសសេចក្ដីថ្លៃថ្នូរដល់យើង គ្រួសារយើង និងសង្គមជាតិយើងទាំងមូលផង។ ជាពិសេសត្រូវយកចិត្តទុកដាក់គោរពវិន័យសាលា គោរពលោកគ្រូ អ្នកគ្រូ ខិតខំរៀនសូត្រ ប្រការដែលសំខាន់ត្រូវចៀសឆ្ងាយពីគ្រឿងញៀន គ្រឿងស្រវឹង បារី បារីអេឡេត្រូនិច ដែលទាំងនេះមិនបានធ្វើឱ្យយើងរីកចម្រើនអ្វីទេ មានតែនាំមកនូវផលវិបាកដល់យើងថែមទៀត ដូចជា ខាតបង់ប្រាក់កាល ពេលវេលា ការសិក្សា អាចក្លាយជាជនពាលក្នុងសង្គម និងនាំឱ្យប៉ះពាល់សុខភាពធ្ងន់ទៀតផង រហូតបាត់បង់ជីវិតក៏មាន។
ជាចុងក្រោយលោកជំទាវ បានសំណូមពរប្អូនៗ នៅពេលធ្វើដំណើរតាមផ្លូវត្រូវចេះប្រុងប្រយ័ត្ន ត្រូវគោរពច្បាប់ចរាចរណ៍ ធ្វើដំណើរដោយអត់អោន យោគយល់អធ្យាស្រ័យគ្នាទៅវិញទៅមក ទើបយើងមានសុវត្ថិភាព និងក្ដីសុខសាន្តទាំងអស់គ្នា៕
អត្ថបទ និងរូបភាព ៖លោក ទ្រា ពន្លឺ
កែសម្រួល ៖ ហាំ ម៉េងហួត
