នៅព្រឹកថ្ងៃទី១៩ ខែកក្តដា ឆ្នាំ២០២៤ ឯកឧត្តម ហេង ធូ អនុប្រធានក្រុមការងាររាជរដ្ឋាភិបាល ចុះមូលដ្ឋានស្រុកបន្ទាយស្រី បានដឹកនាំក្រុមការងារ អាជ្ញាធរស្រុកបន្ទាយស្រី បំពាក់បង្គោល និងអំពូលសូឡាថ្មី ចំនួន២០អំពូល ជាអំណោយរបស់ ឯកឧត្តម សែម សុវណ្ណនី ប្រធានក្រុមការងារចុះមូលដ្ឋានស្រុកបន្ទាយស្រី និងក្រុងរុនតាឯកតេជោសែន ជូលដល់មណ្ឌលសុខភាពបន្ទាយស្រី ឃុំខ្នារសណ្តាយ ស្រុកបន្ទាយស្រី ខេត្តសៀមរាប ដើម្បីជួយសម្រួលដល់ប្រជាពលរដ្ឋមកទទួលសេវានៅមណ្ឌលសុខភាព២៤ម៉ោង ឲ្យមានភាពងាយស្រួលជាពិសេសនៅពេលយប់ ព្រមទាំងលើកកំពស់សោភ័ណ្ឌភាពបរិស្ថានមណ្ឌលសុខភាពផងដែល។
បន្ទាប់ពីដាក់អំពូលសូឡាជាមិត្តរូបរួច ឯកឧត្តម ហេង ធូ បានចុះសួរសុខទុក្ខ ជួបសំណេះសំណាលជាមួយ អ្នកជំងឺកំពុងសម្រាកព្យាបាល នៅមណ្ឌលសុខភាព ក្នុងនោះឯកឧត្តម ហេង ធូ លើកឡើងថា ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជណាចក្រកម្ពុជា ព្រមទាំងការជួយជ្រោមជ្រែងអស់ពីកម្លាំងកាយចិត្តពីសំណាក់ ឯកឧត្តម សែម សុវណ្ណនី ប្រធានក្រុមការងារ បានជួយជំរុញឱ្យស្រុកបន្ទាយស្រីកាន់តែមានការអភិវឌ្ឍកាន់តែឆាប់រហ័សរួមមាន សាងសង់ហេរចនាសម្ព័ន្ធផ្លូវដី សាលាឆទាន សកម្មភាពមនុស្សធម៌ បំពាក់បង្គោលអំពូលសូឡាតាមមុនផ្ទះប្រជាពលរដ្ឋ តាមដងផ្លូវ និងដាំដើមឈើលម្អជាដើម។
ឯកឧត្តម បន្ថែមថា សកម្មភាពទាំងអស់នេះ បានបង្ហាញពីការយកចិត្តទុកដាក់ និងរួមគ្នាទទួលខុសត្រូវ ចាប់ពីថ្នាក់ជាតិ ដល់ថ្នាក់ក្រោមជាតិ ព្រមទាំងថ្នាក់មូលដ្ឋាន បន្តខិតខំប្រឹងប្រែងរួមគ្នាក្នុងការបំពេញតួនាទី ភារកិច្ច ស្របតាម បទបញ្ជា សេចក្ដីណែនាំ កម្មវិធីនយោបាយ យុទ្ធសាស្ត្របញ្ចកោណដំណាក់កាលទី១ លើការកំណែទម្រង់នានា ពិសេសលើកកម្ពស់ការផ្តល់សេវាសាធារណៈ និងការអភិវឌ្ឍមូលដ្ឋាន ដែលឆ្លើយតបទៅនឹងសេចក្តីត្រូវការរបស់ប្រជាពលរដ្ឋប្រកបដោយគុណភាព ប្រសិទ្ធភាព តម្លាភាព គណនេយ្យភាព និងសមធម៌សង្គម។ ក្នុងការសំណេះសំណាលនោះផងដែរ ឯកឧត្តមបានឧបត្ថម្ភថវិកាដល់អ្នកជំងឺចំនួន១០នាក់ក្នុងម្នាក់ៗ៥ម៉ឺនរៀល និងបានឧបត្ថម្ភដល់គ្រូពេទ្យ១៤នាក់ ក្នុងម្នាក់ៗ៥ម៉ឺនរៀលផងដែរ៕
ព័ត៌មានជាតិ ថ្មីៗ
អត្ថបទ និងរូបភាព ៖លោក ធន់ ពូថេ
កែសម្រួល ៖ លោក ហាំ ម៉េងហួត
