ការដេញថ្លៃគម្រោងសាងសងផ្លូវបេតុងអាមេមួយខ្សែ តភ្ជាប់ពីភូមិប្រាសាទ ទៅភូមិត្រាចថ្មី នៃឃុំកំពង់ក្ដី ស្រុកជីក្រែង ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី២២ ខែកក្កដា ឆ្នាំ២០២៤ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក ស្រី សំអុល ប្រធានគណៈកម្មការលទ្ធកម្មឃុំកំពង់ក្ដី ស្រុកជីក្រែង បានឲ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំកំពង់ក្ដី បានដាក់ដេញថ្លៃគម្រោងសាងសង់ផ្លូវបេតុងអាមេមួយខ្សែ ប្រវែង២០៣ម៉ែត្រ ទទឹង៥ ម៉ែត្រ កម្រាស់បេតុង០.១៥ម៉ែត្រ មុខកាត់ដែក៨លី ដាក់លូការពារផ្លូវមុខកាត់០.៨ម៉ែត្រ ចំនួន៤កង់ និងស្លាកសញ្ញាគម្រោង១កន្លែង ក្នុងតំលៃប៉ាន់ស្មាន ១៣០.៣០១.០៤៧រៀល ដោយមានក្រុមហ៊ុនចំនួន៤ បានដាក់សំណើរ។ ជាលទ្ធផលបានទៅលើក្រុមហ៊ុន សុខ មករា ក្នុងតម្លៃ ១២៨.២៩៦.០០០រៀល។
ជាមួយនឹងការទទួលបានសិទ្ធនៃការសាងសង់នេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដែលចែងនៅក្នុងកិច្ចសន្យា៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
