កាលពីថ្ងៃទី២២ ខែកក្កដា ឆ្នាំ២០២៤ម្សិលមិញនេះ គណៈកម្មការលទ្ធកម្មឃុំដានរុន ស្រុកសូទ្រនិគម ខេត្តសៀមរាប ប្រកាសបញ្ចប់ការដេញថ្លៃគម្រោងចំនួន២ រួមមាន៖គម្រោងជួសជុលផ្លូវដីសក្រាលក្រួសធម្មជាតិមួយខ្សែ និងសង់លូជ្រុងទោល ប្រកបដោយជោគជ័យ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក វ៉ាន់ វុត ប្រធានគណៈកម្មការលទ្ធកម្មឃុំដានរុន ស្រុកសូទ្រនិគម បានឲ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំដានរុន បានដាក់ដេញថ្លៃគម្រោងចំនួន២៖ សម្រាប់គម្រោងទី១ គឺគម្រោងជួសជុលផ្លូវដីក្រាលក្រួសក្រហមមួយខ្សែ ប្រវែង១.៦០០ម៉ែត្រ ទទឹង៥ម៉ែត្រ កំរាស់ក្រួសក្រហម០.១៥ម៉ែត្រ និងសាងសង់លូកាត់ផ្លូវចំនួន៥កន្លែង និងស្លាកគម្រោងចំនួន២ ក្នុងតំលៃប៉ាន់ស្មាន ១៦១.៧៨១.៣៣៣រៀល ដោយមានក្រុមហ៊ុនចំនួន៣ បានដាក់សំណើរ។ ជាលទ្ធផលបានទៅលើក្រុមហ៊ុន AMRL ក្នុងតម្លៃ ១៦០.៣០០.០០០រៀល។ សម្រាប់គម្រោងទី២ គឺគម្រោងសាងសង់លូជ្រុងទោល មុខកាត់៤ម៉ែត្រ កំពស់២ម៉ែត្រ ប្រវែង៦ម៉ែត្រ និងដាក់ស្លាកសញ្ញាគម្រោងចំនួន១ ក្នុងតំលៃប៉ាន់ស្មាន ៥៧.០១០.៨០០រៀល ដោយមានក្រុមហ៊ុនចំនួន៣ បានដាក់សំណើរ។ ជាលទ្ធផលបានទៅលើក្រុមហ៊ុន អុឹង លីសួរ ក្នុងតម្លៃ ៥៧.០០០.០០០រៀល។
ជាមួយនឹងការទទួលបានសិទ្ធនៃការសាងសង់នេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដែលចែងនៅក្នុងកិច្ចសន្យា៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
