លោកស្រី ព្រំ សុខឡន នាយកស្តីទីនៃអនុវិទ្យាល័យ ហ៊ុនសែនរលួស បានប្រាប់វិទ្យុជាតិខេត្តសៀមរាបថា នៅតាមសាលាបង្រៀនមួយចំនួនក្នុងខេត្តសៀមរាប កាលវិភាគនៃការសិក្សាគឺ ផ្តោតសំខាន់តែទៅលើពិន្ទុ និង និទ្ទេសរបស់សិស្ស ដោយបានចាត់ទុកថា ការផ្តល់ឱកាសទៅកាន់សិស្សានុសិស្សក្នុងការចូលរួមក្នុងការប្រកួតប្រជែងសមត្ថភាព ឬ អនុវត្តសកម្មភាពក្រៅកម្មវិធីសិក្សា គឺប៉ះពាល់ទៅដល់ការរៀនរបស់សិស្សទៅវិញ។
លោកស្រីថា បច្ចុប្បន្នបច្ចេកវិទ្យាកាន់តែទំនើប មានកម្មវិធីសិក្សាជាច្រើនដើម្បីផ្តល់អោយសិស្សទទួលបាននូវពហុចំណេះដឹង ហើយប្រសិនបើសាលារៀនមួយដែលសិស្សានុសិស្សមានគុណភាព ពោរពេញដោយមូលធនមនុស្ស គឺសាលាត្រូវតែមានការសិក្សាទាំងក្នុងម៉ោងសិក្សា និង ការអប់រំក្រៅម៉ោងសិក្សា ដើម្បីអោយសិស្សទទួលបានបទពិសោធន៍នានា នៅពេលដែលគាត់បញ្ចប់ការសិក្សា។
លោកស្រីបន្តថា ចំពោះសិស្សានុសិស្ស ដើម្បីក្លាយខ្លួនជាធនធានមួយដែលមានគុណភាព ត្រូវតែផ្លាស់ប្តូរនូវផ្នត់គំនិតរបស់ខ្លួនក្នុងលើស្វ័យសិក្សា ទាំងក្នុងសាលារៀន និងក្រៅម៉ោងសិក្សា ជាពិសេសត្រូវក៏ផ្តល់ឱកាសដល់ខ្លួនឯងក្នុងការចូលរួមក្នុងកិច្ចការងារក្នុងសហគមន៍ជាដើម ក្នុងឱកាសនេះលោកស្រីបានធ្វើការលើកទឹកចិត្តទៅកាន់សិស្សានុសិស្សទាំងឡាយ កុំរំពឹងលើពិន្ទុ ឬខិតខំតែក្នុងម៉ោងសិក្សា ពីព្រោះសញ្ញាប័ត្រត្រឹមតែជាស្ពានសម្រាប់ចម្លងសិស្សានុសិស្សអោយមានចំណេះដឹងដល់ត្រើយតែប៉ុណ្ណោះ ត្រូវចេះអភិវឌ្ឍខ្លួនក្នុងការផ្តល់អោយខ្លួនឯងមានបទពិសោធន៍ល្អៗ ការប្រាស្រ័យទាក់ទងក្នុងសហគមន៍ ជាពិសេសការបណ្តុះគំនិតក្នុងការបង្កើននូវអ្វីមួយដែលមានអត្ថប្រយោជន៍ជួយដល់សង្គម និងប្រទេសជាតិទាំងមូល៕
ព័ត៌មានជាតិ ថ្មីៗ
អត្ថបទ៖ លោកស្រី ភី រចនា
កែសម្រួល៖ លោកស្រី ហែម បូរ៉ាន្នី
