ព្រឹត្តិការណ៍ប្រគុំតន្ត្រីដ៏ធំ របស់ក្រុមហ៊ុនបារមី ដែលនឹងរៀបចំរយៈពេល២ថ្ងៃ នៅក្រុងសៀមរាប គឺនៅថ្ងៃទី២ និងថ្ងៃទី៣ ខែវិច្ឆិកា ឆ្នាំ២០២៤ខាងមុខ និងមានតារាចម្រៀងល្បីៗ ជាពិសេសតារាចម្រៀងជួរមុខរបស់កម្ពុជា លោក វ៉ាន់ដា (Vanda)ផងដែរ។
តាមរយៈកិច្ចប្រជុំរវាងរដ្ឋបាលខេត្តសៀមរាប និងក្រុមហ៊ុន បារមី ព្រឹត្តិការណ៍ប្រគុំតន្ត្រីនេះ គ្រោងនឹងរៀបចំនៅក្នុងបរិវេណសួនច្បារព្រះរាជដំណាក់ ដែលព្រឹត្តិការណ៍នេះ ក៏មានការតាំងពិព័រណ៍ម្ហូបអាហារ ការបង្ហាញទេពកោសល្យប្រគុំភ្លេងបុរាណ និងសម័យបញ្ចូលគ្នា បច្ចេកវិទ្យាទំនើប House of Refresh ដើម្បីឲ្យអ្នកចូលរួមលេងកម្សាន្ដ និងទទួលយកបទពិសោធន៍ថ្មី។ តាមការគ្រោងទុក ព្រឹត្តិការណ៍នេះ នឹងមានអ្នកចូលរួមយ៉ាងណាស់ ៣០ ០០០នាក់។
ក្នុងនាមអាជ្ញាធរខេត្ត លោក លី វណ្ណៈ នាយករដ្ឋបាលខេត្ដសៀមរាប បង្ហាញថាការរៀបចំព្រឹត្តិការណ៍កម្សាន្តនេះ អនុវត្តន៍ស្របទៅនឹងអនុសាសន៍របស់សម្ដេចធិបតី ដែលបានកំណត់ថា ឆ្នាំ២០២៤ ជាឆ្នាំទស្សនាសៀមរាប ហើយលោករំពឹងថា ព្រឹត្តិការណ៍នេះ នឹងអាចទាក់ទាញភ្ញៀវទេសចរជាតិ និងអន្តរជាតិ តាមគ្រោងទុករបស់ក្រុមហ៊ុនផងដែរ។
ព័ត៌មានជាតិ ថ្មីៗ
លោកនាយករដ្ឋបាលខេត្ត ក៏បានណែនាំដល់ភាគីក្រុមហ៊ុន និងមន្ទីរ អង្គភាពពាក់ព័ន្ធ ត្រូវគិតគូរពីការរៀបចំចំណត ច្រកចេញចូលឱ្យសមស្របនឹងចំនួនមនុស្ស ជាពិសេសការចោល និងប្រមូលសំរាម អំឡុងពេលប្រារព្ធ និងក្រោយព្រឹត្តិការណ៍ ត្រូវធ្វើការសម្អាតឱ្យបានទាន់ពេលវេលា ជៀសវាងធ្វើឱ្យបាត់សោភណ្ឌភាព៕
អត្ថបទ៖ លោក បូ សាវី
កែសម្រួល៖ លោក អ៊ុន ណារាជ្យ
