គណៈកម្មការលទ្ធកម្មឃុំត្រីញ័រ ស្រុកពួក ខេត្តសៀមរាប កាលពីថ្ងៃទី២៤ ខែកក្កដា ឆ្នាំ២០២៤ម្សិលមិញនេះ បានប្រកាសបញ្ចប់ការដេញថ្លៃគម្រោងសាងសង់ផ្លូវចំនួន២ខ្សែ ប្រកបដោយជោគជ័យ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក ទៀប ទឿង ប្រធានគណៈកម្មការលទ្ធកម្មឃុំត្រីញ័រ ស្រុកពួក បានឲ្យដឹងថា ចំពោះគម្រោងមូលនិធិឃុំ ឆ្នាំ២០២៤នេះ ឃុំត្រីញ័រ បានដាក់ដេញថ្លៃគម្រោងចំនួន២ រួមមាន៖ គម្រោងទី១ គឺគម្រោងសាងសង់ផ្លូវដីសក្រាលក្រួសធម្មជាតិ តភ្ជាប់ពីភូមិឈូក ទៅភូមិត្រីញ័រ ប្រវែង៨៥០ម៉ែត្រ ទទឹង៤ម៉ែត្រ កម្រាស់ក្រួស ០.១៥ម៉ែត្រ សាងសង់លូកាត់ផ្លូវ១កន្លែង និងស្លាកសញ្ញាគម្រោង២ ក្នុងតម្លៃប៉ាន់ស្មាន ៧៦.៨៣៧.៩៥៤រៀល ដោយមានក្រុមហ៊ុនចំនួន៦ បានដាក់សំណើ ជាលទ្ធផលបានទៅលើក្រុមហ៊ុន ឯក គន្ធា ក្នុងតម្លៃ ២៨.២២០.១០០រៀល។ សម្រាប់គម្រោងទី២ គឺគម្រោងសាងសង់ផ្លូវដីសក្រាលក្រួសធម្មជាតិស្ថិតក្នុងភូមិត្រពាំងព្រីង ប្រវែង១០០ម៉ែត្រ ទទឹង៥ម៉ែត្រ កម្រាស់ក្រួស ០.១៥ម៉ែត្រ សាងសង់លូកាត់ផ្លូវ២កន្លែង និងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ៣៧.៤១១.៦១៧រៀល ដោយមានក្រុមហ៊ុនចំនួន៦ បានដាក់សំណើ ជាលទ្ធផលបានទៅលើក្រុមហ៊ុន ឯក គន្ធា ក្នុងតម្លៃ ៦.៧៨០.២០០រៀល។
ជាមួយនឹងការទទួលបានសិទ្ធនៃការសាងសង់ទាំងពីរគម្រោងនេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
