នៅព្រឹកថ្ងៃទី២៥ ខែកក្កដា ឆ្នាំ២០២៤នេះ មន្ទីរទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចខេត្តសៀមរាប សហការជាមួយអាជ្ញាធរស្រុកស្វាយលើ និងការិយាល័យប្រឆាំងគ្រឿងញៀនខេត្ត បានចុះធ្វើការផ្សព្វផ្សាយច្បាប់ស្តីពីការត្រួតពិនិត្យគ្រឿងញៀន ជូនដល់អាជ្ញាធរមូលដ្ឋាន កងកម្លាំងប្រដាប់អាវុធ លោកគ្រូអ្នកគ្រូ សិស្សានុសិស្ស និងប្រជាពលរដ្ឋជាច្រើននាក់ ស្ថិតក្នុងបរិវេណសាលាស្រុកស្វាយលើ ខេត្តសៀមរាប។
លោក អៀង ពិសិដ្ឋ អភិបាលស្រុកស្វាយលើ មានប្រសាសន៍ថា ការផ្សព្វផ្សាយនាពេលនេះ ពិតជាមានសារៈសំខាន់ខ្លាំងណាស់ ដើម្បីជាការបញ្ជ្រាបការយល់ដឹងទៅដល់ប្រជាពលរដ្ឋ ជាពិសេសស្រទាប់យុវជនជាសិស្សានុសិស្ស ព្រោះថាបញ្ហាគ្រឿងញៀន នៅតែជាកត្តាប្រឈម និងក្តីកង្វល់របស់គ្រួសារ និងសង្គមជាតិ។ ជារឿយៗរដ្ឋបាលស្រុក ក៏តែងចូលរួមចុះអប់រំផ្សព្វផ្សាយដល់សិស្សានុសិស្សនៅតាមសាលារៀន និងផ្សព្វផ្សាយបញ្ជ្រាបតាមរយៈគោលនយោបាយភូមិឃុំមានសុវត្ថិភាព ជូនដល់បងប្អូនប្រជាពលរដ្ឋ និងផ្សព្វផ្សាយតាមរូបភាពនៃការលេងកីឡាផងដែរ។
លោកវរៈសេនីយ៍ទោ ណាម ណម នាយការិយាល័យប្រឆាំងគ្រឿងញៀនស្តីទី បានឱ្យដឹងថា គ្រឿងញៀនមាន២ប្រភេទ គឺគ្រឿងញៀនដែលផលិតពីរុក្ខជាតិញៀន និងគ្រឿងញៀនផលិតចេញពីសារធាតុគីមី។ ដរាបណាការចរាចរគ្រឿងញៀនខុសច្បាប់នៅតែកើតទ្បើង នោះផលវិបាកធ្ងន់ធ្ងរក៏នៅតែមានជានិច្ចចំពោះប្រទេសជាតិយើង ព្រោះថាវាបានបង្កឱ្យមានឧក្រឹដ្ឋកម្មផ្សេងៗជាច្រើន។
លោក លឹម ភក្តី ប្រធានមន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចខេត្ត មានបញ្ជាក់ដែរថា គ្រឿងញៀន គឺជាកំពូលឧក្រឹដ្ឋកម្មអន្តរជាតិ ដែលបាននឹងកំពុងរាតត្បាតនៅពាសពេញពិភពលោក ហើយបានទន្ទ្រានចូលមកប្រទេសកម្ពុជា ដោយបានបង្កនូវគ្រោះមហន្តរាយធ្ងន់ធ្ងរជាច្រើន ចំពោះប្រជាពលរដ្ឋ ជាពិសេសយុវជន។ យើងទាំងអស់គ្នាត្រូវចាំថា គ្រឿងញៀនមិនមែនជាឱសថសម្រាប់ជួយបំបាត់ទុក្ខព្រួយ ឬជួយឱ្យរៀនពូកែ ជួយលើកកម្លាំងអ្វីនោះទេ ផ្ទុយទៅវិញការប្រើប្រាស់គ្រឿងញៀននាំឱ្យខូចសុខភាព បង្កបញ្ហាដល់គ្រួសារ សង្គមជាតិ និងនាំយើងឱ្យខូចអនាគតថែមទៀតផង។
លោកប្រធានមន្ទីរក៏បានស្នើដល់អាជ្ញាធរមូលដ្ឋាន និងកងកម្លាំងមានសមត្ថកិច្ច ព្រមទាំងភាគីពាក់ព័ន្ធ ចូលរួមជំរុញចលនាផ្សព្វផ្សាយគោលនយោបាយភូមិឃុំសង្កាត់មានសុវត្ថិភាព ឱ្យបានសកម្មផុលផុសតាមគ្រប់រូបភាព គ្រប់ទីកន្លែង ដើម្បីឱ្យសាធារណជនបានយល់ដឹងអំពីគ្រោះថ្នាក់ដោយសារគ្រឿងញៀន ព្រោះវាជាអន្ទាក់ប្រកបដោយគ្រោះថ្នាក់សម្រាប់មនុស្សគ្រប់រូប។ លោកក៏បានសំណូមពរដល់ឪពុកម្ដាយ ឬអាណាព្យាបាល ត្រូវចេះតាមដានសកម្មភាពកូន ទាំងអត្តចរិក ទាំងការសិក្សា ហើយប្រសិនបើមានការសង្ស័យ ឬដឹងថាកូនរបស់ខ្លួនប្រើប្រាស់គ្រឿងញៀន ត្រូវសហការ និងរាយការណ៍ជូនអាជ្ញាធរមានសមត្ថកិច្ច ដើម្បីមានវិធានការទប់ស្កាត់៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
