មន្ត្រីនៃអង្គការមូលនិធិអេ២១ កម្ពុជា បានឲ្យដឹងថា ក្នុងរយៈពេល៦ខែ ដើមឆ្នាំ២០២៤នេះ អង្គការបានផ្តល់សេវាជូនជនរងគ្រោះដោយអំពើជួញដូរមនុស្សប្រមាណជាង ៣០ករណី ហើយភាគច្រើនកើតឡើងទៅលើកុមារដែលជាករណីការជួញដូរតាមប្រព័ន្ធអនឡាញ។
លោកស្រី សុខា រីម៉ា ប្រធានកម្មវិធីស្តារឡើងវិញ នៃអង្គការមូលនិធិអេ២១ កម្ពុជា បានឱ្យដឹងថា ចាប់តាំងពីឆ្នាំ២០១៨ ដល់ ឆ្នាំ២០២៤ អង្គការមូលនិធិអេ២១ កម្ពុជា បានផ្តល់់សេវាដល់ជនរងគ្រោះដោយអំពើជួញដូរមនុស្សបានចំនួន២០០ករណី និងបានធ្វើសមាហរណកម្មបញ្ចូនពួកគាត់ចូលក្នុងសហគមន៍វិញមានចំនួនជាង ៣០ករណីផងដែរ។
លោកស្រីបានឱ្យដឹងទៀតថា មកដល់បច្ចុប្បន្ននេះ អង្គការមូលនិធិអេ២១ មានកិច្ចសហការយ៉ាងល្អជាមួយរាជរដ្ឋាភិបាលកម្ពុជា ជាពិសេសមន្ទីរអង្គភាព និងអង្គការក្រៅរដ្ឋាភិបាលនានា ដែលស្របតាមគម្រោងដោយផ្ដោតលើការយកចិត្តទុកដាក់ និងឆ្លើយតបឱ្យបានទាន់ពេលវេលាដល់អ្នករងគ្រោះដោយអំពើជួញដូរ គ្រប់ទម្រង់ ឈានទៅលុបបំបាត់ទាំងស្រុង ដើម្បីធានាអោយបានដល់សុខសុវត្ថិភាពប្រជាពលរដ្ឋ ទូទាំងប្រទេសកម្ពុជា។ ក្នុងនោះអង្គការ ក៏មានកិច្ចសហការជាមួយអាជ្ញាធរពាក់ព័ន្ធ និងស្នងការដ្ឋាននគរបាលខេត្តថែមទៀតផង។
សូមជម្រាបថា លោកស្រីលើកឡើងបែបនេះ ក្នុងកម្មវិធីយើងធ្វើបាន របស់វិទ្យុ និងទូរទស្សន៍ជាតិខេត្តសៀមរាប កាលពីថ្ងៃទី២៤ ខែកក្កដា ឆ្នាំ២០២៤នេះ។
ជាមួយគ្នានេះដែរ លោកស្រីឧត្តមសេនីយ៍ត្រី ដួង ថាវរី ស្នងការរងទទួលបន្ទុកការងារប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តសៀមរាប បានបង្ហាញថា រាល់ដំណើរការនៃការអនុវត្ត និងការទប់ស្កាត់ការជួញដូរគ្រប់ទម្រង់ឱ្យមានប្រសិទ្ធភាព ចាំបាច់ត្រូវតែមានការសហការល្អរវាងអង្គការដៃគូ និងអាជ្ញាធរមានសមត្ថកិច្ចពាក់ព័ន្ធ ជាពិសេសការចូលរួមរបស់ប្រជាពលរដ្ឋផ្ទាល់ លើការរាយការណ៍ និងយល់ដឹងពីបញ្ហាប្រឈមទាំងអស់នេះ៕
អត្ថបទ៖ លោកស្រី ភី រចនា
កែសម្រួល៖ លោក អ៊ុន ណារាជ្យ
