ការដេញថ្លៃគម្រោងសាងសង់ផ្លូវបេតុងអាមេមួយខ្សែ និងជួសជុលផ្លូវដីសក្រាលក្រួសធម្មជាតិមួយខ្សែ ស្ថិតក្នុងភូមិភ្នំតូច នៃឃុំតាអាន ស្រុកក្រឡាញ់ ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី២៩ ខែកក្កដា ឆ្នាំ២០២៤ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក ស្គន់ សាគីន ប្រធានគណៈកម្មការលទ្ធកម្មឃុំតាអាន ស្រុកក្រឡាញ់ បានឱ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំតាអាន បានដាក់ដេញថ្លៃគម្រោងចំនួន២ រួមមាន៖ គម្រោងទី១ គឺគម្រោងសាងសង់ផ្លូវបេតុង ១ខ្សែ ប្រវែង៩០ម៉ែត្រ ទទឹងបេតុង៥ម៉ែត្រ កម្រាស់បេតុង០,១៥ម៉ែត្រ មានក្រួសក្រហមស្មារ និងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន៥១.៨៦០.១៤០រៀល ដោយមានក្រុមហ៊ុនចំនួន៧ បានដាក់សំណើ ជាលទ្ធផលបានទៅលើក្រុមហ៊ុន លាំ សោភ័ណ្ឌ ក្នុងតម្លៃ ២៧.៦៧៥.០០០រៀល។ សម្រាប់គម្រោងទី២ គឺគម្រោងជួសជុលផ្លូវដីសក្រាលក្រួសធម្មជាតិប្រវែង ៣៥០ម៉ែត្រ ទទឹងក្រួស៥ម៉ែត្រ កម្រាស់ក្រួស០,១៥ម៉ែត្រ និងលូរមូលទោលមុខកាត់០,៦ម៉ែត្រ ប្រវែង៦ម៉ែត្រ ២កន្លែង និងស្លាកសញ្ញា គម្រោងចំនួន០១កន្លែង ក្នុងតម្លៃប៉ាន់ស្មាន៥៣.១៩១.៩៥០រៀល ដោយមានក្រុមហ៊ុនចំនួន៧ បានដាក់សំណើរ ជាលទ្ធផលបានទៅលើក្រុមហ៊ុន ហ៊ត ហៀង ក្នុងតម្លៃ ១២.៩០០.០០០រៀល។
ជាមួយនឹងការទទួលបានសិទ្ធិនៃការសាងសង់និងជួសជុលគម្រោងទាំងពីរនេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្តដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេសបទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
