គណៈកម្មការលទ្ធកម្មឃុំល្វា ស្រុកពួក ខេត្តសៀមរាប នៅថ្ងៃទី២៩ ខែកក្កដា ឆ្នាំ២០២៤ម្សិលមិញនេះ បានប្រកាសបញ្ចប់ការដេញថ្លៃគម្រោងសាងសង់ផ្លូវបេតុងមួយខ្សែ ប្រកបដោយជោគជ័យ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
អ្នកស្រី ឈីយ ហ៊ាន់ គណៈកម្មការលទ្ធកម្មឃុំល្វា ស្រុកពួក បានឱ្យដឹងថា ចំពោះគម្រោងមូលនិធិឃុំ ឆ្នាំ២០២៤នេះឃុំល្វា បានដាក់ដេញថ្លៃគម្រោងសាងសង់ផ្លូវបេតុងអាមេមួយខ្សែក្នុងភូមិស្នោរ ឃុំល្វា ស្រុកពួក ដែលមានប្រវែង១២៥ម៉ែត្រ ទទឹង០៥ម៉ែត្រ កំរាស់បេតុង ០.១៥ម៉ែត្រ លូកាត់ផ្លូវ២កន្លែង លូការពារផ្លូវ២កន្លែង និងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ១០៦.៦៣០.៧១៨រៀល ដោយមានក្រុមហ៊ុនចំនួន៧ បានដាក់សំណើ។ ជាលទ្ធផលបានទៅលើក្រុមហ៊ុន ហ៊ត ហេង ក្នុងតម្លៃ ៥៣.៧៥០.២០០រៀល។
ជាមួយនឹងការទទួលបានសិទ្ធិនៃការសាងសង់ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
