លេខាធិការដ្ឋាន នៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប ហៅកាត់ថា គខបជ នៅព្រឹកថ្ងៃទី៣០ ខែកក្កដា ឆ្នាំ២០២៤នេះ បានបើកកិច្ចប្រជុំប្រចាំខែកក្កដា ឆ្នាំ២០២៤របស់ខ្លួន ដើម្បីធ្វើការពិនិត្យលើសេចក្ដីព្រាងរបាយការណ៍ ចំពោះលទ្ធផលនៃការអនុវត្តសកម្មភាពប្រចាំខែកក្កដា និងពិភាក្សាពីបញ្ហាប្រឈមពាក់ព័ន្ធនឹងការងារប្រយុទ្ធប្រឆាំងអំពើជួញដូរមនុស្ស ដឹកនាំដោយ លោកស្រី ម៉ននី រង្សី អភិបាលរងខេត្ត និងជាប្រធានលេខាធិការដ្ឋាន គខបជ ខេត្តសៀមរាប និងដោយមានការចូលរួមពីអ្នកពាក់ព័ន្ធជាច្រើនរូប។
យោងតាមរបាយការណ៍ បានបញ្ជាក់ថា ក្នុងខែកក្កដានេះ គ្រប់អ្នកពាក់ព័ន្ធ បានយកចិត្តទុកដាក់ខ្ពស់តាមរយៈការចុះអប់រំ ផ្សព្វផ្សាយពីច្បាប់ ស្តីពីការបង្ក្រាប ប្រយុទ្ធប្រឆាំងអំពើជួញដូរមនុស្ស និងអំពើធ្វើអាជីវកម្មផ្លូវភេទ ការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ ការធ្វើចំណាកស្រុកប្រកបដោយសុវត្ថិភាព និងច្បាប់ពាក់ព័ន្ធ តាមរយៈកម្មវិធី និងវេទិកានានាបានចំនួន ៩៦២លើក ដោយមានអ្នកចូលរួមចំនួន ៤១.៦៦៦នាក់ និងបានចែកខិតបណ្ណព័ត៌មានស្តីពីការធ្វើចំណាកស្រុក ការស្វែងរកជំនួយ ព័ត៌មានទីផ្សារ ការងារការបណ្តុះបណ្តាលជំនាញវិជ្ជាជីវៈ និងផលប៉ះពាល់នៃគ្រឿងញៀន ព្រមទាំងបានផ្សព្វផ្សាយអំពីស្ពតអប់រំអំពីគ្រឿងញៀន និងការទប់ស្កាត់អំពើហិង្សាក្នុងគ្រួសារបានចំនួន ៩.០៦០លើក។
របាយការណ៍ដដែលបង្ហាញទៀតថា ក្នុងរយៈពេលខែកក្កដានេះ ក្រុមការងារប្រយុទ្ធប្រឆាំងអំពើជួញដូរមនុស្សថ្នាក់ក្រុងស្រុក និងអង្គការដៃគូ បានធ្វើការផ្សព្វផ្សាយអំពីច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវ កម្មផ្លូវភេទ ការធ្វើចំណាកស្រុក និងការទប់ស្កាត់ការរំលោភបំពាននានា បានចំនួន១៧៨លើក ដែលមានអ្នកចូលរួមសរុប ៣.៩៤៦នាក់ ខណៈការងារបង្ក្រាប និងសង្គ្រោះជនរងគ្រោះពាក់ព័ន្ធអំពើជួញដូរមនុស្ស និងអំពើធ្វើអាជីវកម្មផ្លូវភេទ បានចំនួន២ករណី ដោយបានឃាត់ខ្លួនជនសង្ស័យចំនួន៣នាក់ និងបានកសាងសំណុំរឿងបញ្ជូនទៅតុលាការ។ ចំណែកជនរងគ្រោះជាអនីតិជន ត្រូវបានបញ្ជូនទៅធ្វើកោសល្យវិច្ច័យ និងបានបញ្ជូនត្រឡប់ទៅក្រុមគ្រួសារវិញម្នាក់ និងម្នាក់ទៀតបញ្ជូនទៅមន្ទីរសង្គមកិច្ចខេត្ត។
ក្នុងឱកាសនោះ លោកស្រី ម៉ននី រង្សី ប្រធានលេខាធិការដ្ឋាន មានប្រសាសន៍ថា យោងតាមរបាយការណ៍ខាងលើបានបង្ហាញថា ក្នុងខែកក្កដានេះ ក្រុមការងារ គខបជ បានអនុវត្តការងារយ៉ាងយកចិត្តទុកដាក់ ស្របតាមភារកិច្ចរបស់ខ្លួនតាមការគ្រោងទុក ជាពិសេសការចូលរួមយ៉ាងសកម្មពីមន្ត្រីតាមបណ្តាមន្ទីរអង្គភាពពាក់ព័ន្ធ អាជ្ញាធរមូលដ្ឋាន និងអង្គការមិនមែនរដ្ឋាភិបាលជាតិ អន្តរជាតិ និងទីភ្នាក់ងារសហប្រជាជាតិ សម្រេចបានលទ្ធផលល្អប្រសើរ។ ជាពិសេសក្រុមការងារបានចូលរួមយ៉ាងសកម្មក្នុងការងារប្រយុទ្ធប្រឆាំងអំពើជួញដូរមនុស្ស និងការទប់ស្កាត់ការធ្វើចំណាកស្រុកមិនស្របច្បាប់ និងជួយសង្គ្រោះជនរងគ្រោះបានជាបន្តបន្ទាប់។
លោកស្រីប្រធានលេខាធិការដ្ឋាន ក៏បានជំរុញឱ្យមន្ត្រីបង្គោលនៃក្រុមការងារទាំងអស់ ត្រូវបន្តពិភាក្សា ដើម្បីស្វែងរកធាតុចូលក្នុងផែនការសកម្មភាពបន្តរបស់ គបជ សម្រាប់បន្តអនុវត្តឱ្យទទួលបានលទ្ធផលល្អប្រសើរបន្ថែមទៀត និងត្រូវបន្តតាមដាន ត្រួតពិនិត្យ ឃ្លាំមើលជាប្រចាំរាល់បទល្មើសជួញដូរមនុស្ស ការធ្វើអាជីវកម្មផ្លូវភេទ អំពើហិង្សាទាក់ទងនឹងយេនឌ័រក្មេងទំនើង អ្នកប្រើប្រាស់គ្រឿងញៀន និងការប្រើប្រាស់ពលកម្មកុមារក្នុងវិស័យសេដ្ឋកិច្ច។ បន្តពង្រឹងកិច្ចសហការឱ្យបានទូលំទូលាយជាមួយអ្នកពាក់ព័ន្ធ ដើម្បីការបង្ការ ទប់ស្កាត់ ការពារ និងបង្ក្រាបដើម្បីឈាន ទៅលុបបំបាត់អំពើជួញដូរមនុស្សគ្រប់រូបភាព៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
