គណៈកម្មការលទ្ធកម្មឃុំគោកធ្លកលើ ស្រុកជីក្រែង ខេត្តសៀមរាប នៅថ្ងៃទី៣១ ខែកក្កដា ឆ្នាំ២០២៤នេះ បានប្រកាសបញ្ចប់ការដេញថ្លៃគម្រោងជួសជុលផ្លូវដីសក្រាលក្រួសក្រហម ចំនួន២ខ្សែ ប្រកបដោយជោគជ័យ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
អ្នកស្រី ឡាច សុភា គណៈកម្មការលទ្ធកម្មឃុំគោកធ្លកលើ ស្រុកជីក្រែង បានឱ្យដឹងថា ចំពោះគម្រោងមូលនិធិឃុំ ឆ្នាំ២០២៤នេះ គោកធ្លកលើ បានដាក់ដេញថ្លៃគម្រោងជួសជុលផ្លូវដីសក្រាលក្រួសក្រហម ២ខ្សែក្នុងភូមិត្រពាំងវែង និងភូមិខ្លាឃ្មុំ ឃុំគោកធ្លកលើ ស្រុកជីក្រែង ដែលមានប្រវែង១.១៨៩ម៉ែត្រ ទទឹង៥ម៉ែត្រ កម្រាស់ក្រួស០.១៥ម៉ែត្រ ជើងទេផ្លូវសងខាង១.៥ម៉ែត្រ លូកាត់ផ្លូវ៣កន្លែង និងដាក់លូការពារផ្លូវ៤កង់ រួមជាមួយនឹងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ១២៦.៦១៦.៨៩៤រៀល ដោយមានក្រុមហ៊ុនចំនួន៦ បានដាក់សំណើ។ ជាលទ្ធផលបានទៅលើក្រុមហ៊ុន ស៊ន់ ស៊ីណា ក្នុងតម្លៃ ៣៣.២៩៥.០០០រៀល។
ជាមួយនឹងការទទួលបានសិទ្ធិនៃការសាងសង់ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
