ឯកសារវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធចំនួន៥.៩៤៥ក្បាលដី ស្ថិតក្នុងភូមិចំនួន៤ នៃឃុំជ្រោយនាងងួន ស្រុកស្រីស្នំ ខេត្តសៀមរាប នៅព្រឹកថ្ងៃទី២៩ខែកក្កដា ឆ្នាំ២០២៤នេះ ត្រូវបានមន្ទីរជំនាញ សហការនឹងអាជ្ញាធរមូលដ្ឋានបិទផ្សាយជាសាធារណៈដើម្បីឱ្យប្រជាពលរដ្ឋ និងអ្នកកាន់កាប់ ឬម្ចាស់ក្បាលដី ធ្វើការពិនិត្យផ្ទៀងផ្ទាត់និងស្នើសុំកែតម្រូវ មុននឹងឈានទទួលបានបណ្ណកម្មសិទ្ធិសម្គាល់ម្ចាស់អចលនទ្រព្យ នៅបរិវេណសាលាឆទានក្នុងភូមិជ្រោយនាងងួន។
លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់និងសុរិយោដីខេត្តសៀមរាប បានបញ្ជាក់ថា ក្បាលដីដែលធ្វើការវិនិច្ឆ័យ និងប្រកាសបិទផ្សាយនាពេលនេះមានចំនួន៥.៦៤៥ក្បាលដី ក្នុងភូមិចំនួន៤ រួមមាន៖ ភូមិឫស្សីសាញ់ ភូមិត្រុំខាងត្បូង ភូមិយាយម៉ី និងភូមិជ្រោយនាងងួន ក្នុងឃុំជ្រោយនាងងួន ដែលការបិទផ្សាយនេះមានរយៈពេល១៥ថ្ងៃ ចាប់ពីថ្ងៃទី២៩ខែកក្កដា ដល់ថ្ងៃទី១២ ខែសីហា ឆ្នាំ២០២៤ ដែលការបិទផ្សាយនេះដែរ ដើម្បីឱ្យអ្នកពាក់ព័ន្ធទាំងអស់ចូលរួមពិនិត្យផ្ទៀងផ្ទាត់មើលទិន្នន័យឱ្យបានគ្រប់ៗគ្នាដើម្បីធានាបាននូវភាពសុក្រិតត្រឹមត្រូវ ក្នុងការចេញបណ្ណកម្មសិទ្ធិជូន។
លោកអនុប្រធានមន្ទីរបញ្ជាក់ទៀតថា ក្រោយបញ្ចប់ការបិទផ្សាយរយៈពេល១៥ថ្ងៃនេះគណៈកម្មការរដ្ឋបាលនឹងលើកសំណើជូនទៅឯកឧត្តមអភិបាលខេត្ត ដើម្បីសម្រេចចេញវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋដែលជាម្ចាស់ដី និងអ្នកកាន់កាប់ដីរូបណាដែលបានបំពេញលក្ខខណ្ឌគ្រប់គ្រាន់តាមនីតិវិធីច្បាប់ និងជាក្បាលដីមិនមានទំនាស់។ ជាពិសេសម្ចាស់ដីនិងអ្នកកាន់កាប់ដី ព្រមទាំងស្ថាប័ននិងអង្គភាពពាក់ព័ន្ធទាំងអស់សូមមកពិនិត្យផ្ទៀងផ្ទាត់មើលទិន្នន័យក្បាលដីខ្លួនឱ្យបានគ្រប់ៗគ្នាទៅលើឈ្មោះម្ចាស់ដីសាវតា ទំហំដី ប្រភេទទ្រព្យ ព្រោះនេះជាឱកាសចុងក្រោយដែលអ្នកពាក់ព័ន្ធទាំងអស់មានសិទ្ធិធ្វើការកែតម្រូវ ឬជំទាស់តវ៉ា ក្នុងករណីដែលពិនិត្យទៅឃើញថាមានកំហុសឆ្គងដើម្បីជំនាញធ្វើការពិនិត្យ និងកែតម្រូវជូន។
លោក ហ៊ន់ រិទ្ឋិ អភិបាលស្រុកស្រីស្នំ មានប្រសាសន៍ថា ការចុះបញ្ជីដីធ្លីមានលក្ខណៈជាប្រព័ន្ធជាប្រការសមស្របបំផុតដែលបានកំណត់នៅក្នុងគោលនយោបាយដីធ្លីរបស់រាជរដ្ឋាភិបាលដើម្បីកាត់បន្ថយភាពក្រីក្រ និងទំនាស់ដីធ្លីក្នុងសង្គមជាតិយើង។ដូច្នេះសូមសំណូមពរដល់បងប្អូនប្រជាពលរដ្ឋដែលជាម្ចាស់ក្បាលដី សូមមកចូលរួមពិនិត្យផ្ទៀងផ្ទាត់ឱ្យបានគ្រប់គ្នា ដើម្បីធានាបាននូវភាពត្រឹមត្រូវ ច្បាស់លាស់គ្មានកំហុសឆ្គង ព្រោះវាជាឱកាសចុងក្រោយ ដែលម្ចាស់ក្បាលដីអាចមានសិទ្ធិពិនិត្យតវ៉ាបើអាក់ខាន ឬយឺតយ៉ាវ វានឹងនាំឱ្យបាត់បង់ផលប្រយោជន៍របស់បងប្អូន៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
