ដើម្បីជួយអភិវឌ្ឍន៍វិស័យអប់រំនៅកម្ពុជា ជាពិសេសនៅតាមតំបន់ជនបទផងនោះ កាលពីថ្ងៃទី២៥ ខែកក្កដា ឆ្នាំ២០២៤នេះ អង្គការសេវាកម្មដើម្បីសន្តិភាពកូរ៉េ រួមនឹងសាស្ដ្រាចារ្យ និងនិស្សិតមកពីប្រទេសកូរ៉េ និងនិស្សិតកម្ពុជាជាង ៣០នាក់ បានចុះទស្សនៈកិច្ចសិក្សា និងរួមគ្នាសាងសង់អគារសិក្សាមួយខ្នង ជូនសិស្សានុសិស្សនៅសាលាបឋមសិក្សាប្រិយ៍ ក្នុងឃុំខ្នាសណ្ដាយ ស្រុកបន្ទាយស្រី ខេត្តសៀមរាប។
កញ្ញា គីម ស័រយ៉ុន តំណាងក្រុមនិស្សិតមកពីប្រទេសកូរ៉េ បានបង្ហាញថា ការចូលរួមចំណែកជួយអភិវឌ្ឍន៍វិស័យអប់រំ និងស្វែងយល់អំពីវប្បធម៌រវាងប្រទេសទាំងពីរនេះ ជាការទំនាក់ទំនងដ៏ជិតស្និតជាមួយគ្នា ក្នុងនាមជាគ្រួសារមនុស្សជាតិតែមួយ បើទោះបីជាមានសញ្ជាតិ និងជំនឿផ្សេងៗគ្នាក៏ដោយ ពួកគាត់ធ្វើឡើងដើម្បីប្រយោជន៍រួម បង្កើតនូវសុខសន្ដិភាពជាសកល នៅលើពិភពលោក ក៏ដូចជាការចូលរួមសកម្មភាពជួយដល់សហគមន៍ក្រីក្រ ព្រមទាំងការចូលរួមអភិវឌ្ឍន៍វិស័យអប់រំ និងសេដ្ឋកិច្ចនៅក្នុងប្រទេសកម្ពុជា។ ការដែលពួកគាត់មកប្រទេសកម្ពុជា គឺដើម្បីចូលរួមជាមួយអ្នកស្ម័គ្រចិត្តនៅក្នុងកម្មវិធីអភិវឌ្ឍន៍សហគមន៍ដែលកំពុងបន្តនៅទូទាំងពិភពលោក ជាពិសេសការចូលរួមអភិវឌ្ឍន៍អគារសិក្សាថ្មីនេះ គឺពួកគាត់ស្រលាញ់ប្រជាជនកម្ពុជា និងសម្រាប់ជាមិត្តភាពយូរអង្វែង។
លោកស្រី ឡាប់ មុំ នាយិកាសាលាបឋមសិក្សាប្រិយ៍ បានសម្ដែងក្ដីរីករាយ ក្រោយពេលទទួលអគារសិក្សាថ្មី និងបំពាក់នូវសម្ភារៈផ្សេងៗ ព្រមទាំងបានទទួលនូវសមិទ្ធផលជាច្រើនទៀត ពីសាកលវិទ្យាល័យឃុនកុក ប្រទេសកូរ៉េ ព្រោះអគារអប់រំនេះ វានឹងជួយជំរុញឱ្យសិស្សានុសិស្សឈប់បោះបង់ការសិក្សា ព្រមទាំងជួយការលើកកម្ពស់គុណភាពអប់រំថែមទៀតផង។ លោកស្រីថា អគារសិក្សានេះមាន ២បន្ទប់ ដោយសាលា និងសហគមន៍ចូលរួម១៥ភាគរយ ហើយក្រុមនិស្សិតបានជួយបំពាក់សម្ភារៈសិក្សា ការិយាល័យ និងសំអាតទីធ្លាសាលា លាបថ្នាំថ្មី១អគារ គូររូបលម្អសាលាសម្រាប់ក្មេង ចាក់ដីបំពេញទីធ្លាសាលាផងដែរ។
លោក ហួរ ឡុងផេង ប្រធានអង្គការសេវាកម្មដើម្បីសន្តិភាពកម្ពុជា បានឱ្យដឹងថា សកលវិទ្យាល័យនេះ មានគម្រោងជួយដល់សាលាបឋមសិក្សាផ្សេងៗទៀត ដូចជាបង្គន់អនាម័យ និងប្រព័ន្ធទឹកស្អាត់ សម្រាប់សិស្សានុសិស្សដែលអាចពិសាបាននៅក្នុងសាលាថែមទៀត ដើម្បីលើកកម្ពស់កំណើននៃការអប់រំ និងការអភិវឌ្ឍរបស់បុគ្គល និងសហគមន៍។ កម្មវិធីនេះត្រូវបានបង្កើតឡើង ដើម្បីលើកកម្ពស់កំណើននៃការអប់រំ និងការអភិវឌ្ឍរបស់បុគ្គល និងសហគមន៍តាមរយៈបទពិសោធចែករំលែកនៃសេវាកម្មស្ម័គ្រចិត្ត។ នាពេលកន្លងមក ក្រុមនិស្សិតបាន ចុះជួយនៅតាមសាលាបឋមសិក្សា សហគមន៍ក្រីក្រ មជ្ឈមណ្ឌលកុមារកំព្រា មជ្ឈមណ្ឌលជនពិការ មជ្ឈមណ្ឌលពេទ្យកុមារនៅក្នុងខេត្ដសៀមរាប និងតាមបណ្ដាខេត្ដផ្សេងថែមទៀតផង៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
