ថ្លែងក្នុងពិធីប្រកាសផ្ទេរសម្រួលភារកិច្ច និងតែងតាំងមុខតំណែងអធិការ អធិការរង នៃអធិការដ្ឋាននគរបាលក្រុងរុនតាឯកតេជោសែន ខេត្តសៀមរាប នាព្រឹកថ្ងៃទី២៣ ខែកក្កដា ឆ្នាំ២០២៤នេះ លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប បានជំរុញឲ្យកម្លាំងនគរបាលទាំងអស់ ត្រូវប្រកាន់ភា្ជប់នូវឥរិយាបថល្អ យកបេះដូងមកធ្វើការងារបម្រើដល់ប្រជាពលរដ្ឋ ខិតខំសិក្សារៀនសូត្របង្កើនចំណេះវិជ្ជាថ្មីៗបន្ថែមទៀត ទាក់ទងនឹងការងារជំនាញរបស់ខ្លួន ដើម្បីអនុវត្តការងារឱ្យកាន់តែមានប្រសិទ្ធភាព។
លោកឧត្តមសេនីយ៍ទោ ក៏បានណែនាំឲ្យកងកម្លាំងទាំងអស់ ត្រូវបន្តការយកចិត្តទុកដាក់ និងមានការទទួលខុសត្រូវខ្ពស់លើការបម្រើប្រជាពលរដ្ឋ ពិសេសលើសេវាសាធារណៈ បង្កើនសាមគ្គីភាពផ្ទៃក្នុង ពង្រឹងវិន័យកងកម្លាំង និងធានាឲ្យបាននូវសន្តិសុខ សុវត្ថិភាព សណ្តាប់ធ្នាប់សាធារណៈ ជូនប្រជាពលរដ្ឋឲ្យបានល្អប្រសើរ។ ត្រូវខិតខំពង្រឹងសមត្ថភាពបន្ថែម ដើម្បីអនុវត្តការងារឱ្យកាន់តែមានប្រសិទ្ធភាព ត្រូវមានកិច្ចសហប្រតិបត្តការល្អជាមួយអាជ្ញាធរពាក់ព័ន្ធ និងយកចិត្តទុកដាក់គោរពអនុវត្ត ធ្វើជាសេនាធិការឱ្យប្រធានគណៈបញ្ជាការឯកភាពក្រុង ត្រូវអនុវត្តឱ្យបាននូវគោលននយោបាយភូមិ ឃុំ-សង្កាត់ មានសុវត្ថិភាព ដែលរាជរដ្ឋាភិបាលបានដាក់ចេញសម្រាប់បម្រើផលប្រយោជន៍ និងក្ដីសុខប្រជាពលរដ្ឋ។
សូមជម្រាបថា លោកវីរសេនីយ៍ទោ អ៊ុច សុខេប ត្រូវបានថ្នាក់ដឹកនាំក្រសួងមហាផ្ទៃប្រកាសផ្ទេរសម្រួលភារកិច្ច និងតែងតាំងមុខតំណែងពីអធិការរងនៃអធិការដ្ឋាននគរបាលក្រុងសៀមរាប មកជាអធិការនៃអធិការដ្ឋាននគរបាលក្រុងរុនតាឯកតេជោសែន ខេត្តសៀមរាប បន្ទាប់ពីរាជរដ្ឋាភិបាល បានប្រកាសបង្កើតជាក្រុងថ្មីទី២ នៃខេត្តសៀមរាប តាមអនុក្រឹត្យចុះថ្ងៃទី១១ ខែមករា ឆ្នាំ២០២៤ ដែលជាក្រុងដែលមានសង្កាត់ចំនួន២ គឺសង្កាត់រុនតាឯក និងសង្កាត់បល័្លង្គ៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
