ការដេញថ្លៃគម្រោងសាងសងផ្លូវបេតុងអាមេមួយខ្សែ ស្ថិតក្នុងឃុំកំពង់ភ្លុក ស្រុកប្រាសាទបាគង ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី១៨ ខែកក្កដា ឆ្នាំ២០២៤ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក សុខ ប្លង់ ប្រធានគណៈកម្មការលទ្ធកម្មឃុំកំពង់ភ្លុក ស្រុកប្រាសាទបាគង បានឲ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំកំពង់ភ្លុក បានដាក់ដេញថ្លៃសាងសង់ផ្លូវបេតុងអាមេ មួយខ្សែប្រវែង១២៨ម៉ែត្រ មានទទឹង៦ ម៉ែត្រ មានជើងការពារច្រោះ0,៥ ម៉ែត្រ ដែលម្ខាងៗមានប្រវែង០,២៥ ម៉ែត្រ កម្រាស់០,១៥ម៉ែត្រ និង ស្លាកសញ្ញាគម្រោង១ និងលូការពារផ្លូវ១កំប្លេ ស្ថិតក្នុងតំលៃប៉ាន់ស្មាន ១០៧.៨២៥.៧០០រៀល ដោយមានក្រុមហ៊ុនចំនួន៤ បានដាក់សំណើរ ជាលទ្ធផលបានទៅលើក្រុមហ៊ុន វីរៈ៩៩៩៩ ក្នុងតម្លៃ ១០៥.៦០០.០០០ រៀល។
ជាមួយនឹងការទទួលបានសិទ្ធនៃការសាងសង់នេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព ៖ លោកធន់ ពូថេ
កែសម្រួល៖ ហាំ ម៉េងហួត
