នៅរសៀលថ្ងៃទី១៥ ខែកក្កដា ឆ្នាំ២០២៤ លោក ពិន ប្រាកដ អភិបាលរងខេត្តសៀមរាប រួមមនឹងព្រះមន្ត្រីសង្ឃខេត្ត ព្រះគ្រូចៅអធិការ ព្រះសង្ឃមកពីបណ្តាវត្តអារាមនានាក្នុងខេត្ត និងពុទ្ធបរិស័ទជិតឆ្ងាយ បាននិមន្ត និងអញ្ជើញចូលរួមពីធីដង្ហែព្រះបរមអដ្ឋិធាតុ (មួយចំណែកតូច) សម្ដេចព្រះអគ្គមហាសង្ឃរាជាធិបតី កិត្តិឧទ្ទេស បណ្ឌិត ទេព វង្ស សម្ដេចព្រះមហាសង្ឃរាជ នៃព្រះរាជាណាចក្រកម្ពុជា ដង្ហែរពីវត្តពោធិ៍បន្ទាយជ័យ ដើម្បីយកទៅតម្កល់នៅទីព្រះចុល្លាមុនីចេត្តិយ ស្ថិតក្នុងវត្តអារញ្ញសាគរ ក្នុងសង្កាត់សៀមរាប ក្រុងសៀមរាប។
លោក ពិន ប្រាកដ អភិបាលរងខេត្ត បានសម្តែងនូវក្តីសោកស្តាយ អាឡោះអាល័យនឹកឃើញនូវព្រះគុណូបការៈដ៏ថ្លៃថ្លា វិសេសវិសាលឧត្តុង្គឧត្តម ចំពោះស្នាព្រហស្ថរបស់សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស នឹករលឹកដល់ដំបូន្មាននិងព្រះឱវាទល្អៗ ព្រមទាំងអនុស្សាវរីយ៍ជាច្រើននៃការនិមន្តយាងមកកាន់វត្តអារញ្ញសាគរនេះ។ ការយាងចូលព្រះទិវង្គតរបស់សម្តេច គឺជាការបាត់បង់មហាវីរសង្ឃកំពូល ដែលជាកុលបុត្រដ៏ឧត្តុង្គឧត្តមនៃកសិករ ដែលធ្លាប់រួមចលនាតស៊ូរំដោះជាតិ ប្រជាជន និងសាងព្រះផ្នួសលើកកម្ពស់ការរស់ឡើងវិញ នូវព្រះពុទ្ធសាសនានៅក្រកម្ពុជា ចាប់តាំងពីថ្ងៃរំដោះ ៧មករា ឆ្នាំ១៩៧៩ រហូតដល់ថ្ងៃអស់ព្រះជន្ម។
ព្រះតេជគុណ ហ៊ាក់ គឹមហ៊ត់ ព្រះចៅអធិកាវត្តអារញ្ញសាគរ មានសង្ឃដិការថា ក្នុងនាមជាសិស្សគណនៅក្នុងខេត្តសៀមរាបមួយរូប សូមចងចាំនៅគុណូបការៈ និងចងចាំនូវព្រះរាជបន្ទូលល្អៗដែលសម្តេច បានដាស់តឿនក្រើនរំលឹកនាពេលកន្លងមកឱ្យកូនចៅជំនាន់ក្រោយចេះសាមគ្គីគ្នា ស្រឡាញ់ជាតិ សាសនា ព្រះមហាក្សត្រ។ ហើយចំពោះការដង្ហែព្រះបរមអដ្ឋិធាតុសម្ដេច យកមកតម្កល់នៅទីព្រះចុល្លាមុនីចេត្តិយ ស្ថិតក្នុងវត្តអារញ្ញសាគរនេះ គឺដើម្បីជាការរំលឹកនូវគុណូបការៈ និងបង្កភាពងាយស្រួលដល់ព្រះសង្ឃ និងពុទ្ធបរិស័ទក្នុងខេត្តសៀមរាប ដែលគាត់ពុំមានឱកាសបានទៅគោរពបូជានៅរាជធានីភ្នំពេញ ពួកគាត់អាចមកធ្វើអភិវន្ទកិច្ចគោរពបូជា ថ្វាយផ្កាកម្រង ទៀនធូបនៅទីនេះ បានគ្រប់ពេលគ្រប់វេលា។
សូមរំលឹកថា សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស បានទទួលអនិច្ចធម្ម កាលពីថ្ងៃទី២៦ ខែកុម្ភៈ ឆ្នាំ២០២៤ នៅវត្តឧណ្ណាលោម រាជធានីភ្នំពេញ ក្នុងព្រះជន្ម ៩៣ព្រះវស្សា ដោយព្រះជរាពាធ។ ព្រះរាជពិធីថ្វាយព្រះភ្លើងព្រះបរមសពសម្តេច បានប្រព្រឹត្តិទៅយ៉ាងអធិកអធមក្រោមព្រះរាជាធិបតីភាពដ៏ខ្ពង់ខ្ពស់ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នាព្រឹកព្រលឹមថ្ងៃចន្ទ ១២រោច ខែពិសាខ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៣ ខែមិថុនា ឆ្នាំ២០២៤កន្លងទៅ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
