នៅព្រឹកថ្ងៃទី១៧ ខែកក្កដា ឆ្នាំ២០២៤នេះ ក្រុមការងារថ្នាក់ជាតិចុះមូលដ្ឋានស្រុកបន្ទាយស្រី ខេត្តសៀមរាប ដឹកនាំដោយ ឯកឧត្តម ហេង ធូ អនុប្រធានក្រុមការងារ តំណាងដ៏ខ្ពង់ខ្ពស់ ឯកឧត្ដម សែម សុវណ្ណនីប្រធានក្រុមការងារថ្នាក់ជាតិចុះមូលដ្ឋានស្រុកបន្ទាយស្រី បាននាំយកទៀនព្រះវស្សា និងទ័យវត្ថុមួយចំនួនប្រគេនដល់វត្តចំនួន៣ មានវត្តប្រាសាទនាគគូរ វត្តប្រិយ៍ និងវត្តសិលាចារ្យបន្ទាយស្រី ស្ថិតក្នុងឃុំខ្នារសណ្ដាយ ស្រុកបន្ទាយស្រី ខេត្តសៀមរាប ដោយមានការចូលរួមពីប្រធានក្រុមប្រឹក្សាស្រុក អភិបាលស្រុក អាជ្ញាធរមូលដ្ឋាន មន្ត្រីរាជការ និងលោកយាយលោកតាជាច្រើនរូប។
ឯកឧត្តម ហេង ធូ មានប្រសាសន៍ថា ការចូលកាន់ព្រះវស្សាគឺជាបុណ្យមួយដែលមានសារៈសំខាន់ក្នុងព្រះពុទ្ធសាសនា ជាពេលវេលាដ៏សំខាន់សម្រាប់ភិក្ខុសង្ឃ និងសាមណេរបានរៀនធម៌ និងវិន័យឱ្យបានខ្ជាប់ខ្ជួនតាមពុទ្ធឱវាទរយៈពេល៣ខែ។ ការនាំយកនូវទៀនព្រះវស្សា ព្រមទាំងគ្រឿងឧបភោគ បរិភោគ និងបច្ច័យយកមកវេរប្រគេនដល់ព្រះសង្ឃនាពេលនេះ គឺដើម្បីព្រះសង្ឃយកទៅដុតបំភ្លឺបូជាថ្វាយព្រះ និងសិក្សារៀនសូត្រនូវគម្ពីរធម៌ វិន័យព្រះសម្មាសាម្ពុទ្ធ ព្រះបរមគ្រូនៃយើង និងជាពេលដែលព្រះសង្ឃមិនអាចចេញទៅបិណ្ឌបាតនៅខាងក្រៅបាន។
ព័ត៌មានជាតិ ថ្មីៗ
ឯកឧត្តម ក៏បានលើកឡើងដែរថា ព្រះពុទ្ធសាសនា គឺជាសាសនារបស់រដ្ឋ ដែលយើងទាំងអស់គ្នាមានជំនឿ និងគោរពប្រតិបត្តិតាម ព្រោះថាព្រះពុទ្ធសាសនាបានផ្តល់ការអប់រំផ្លូវចិត្ត ឲ្យប្រព្រឹត្តនូវអំពើល្អ ចេះស្រឡាញ់រាប់ អាន ជួយយកអាសាគ្នា សាមគ្គីភាពគ្នា រស់នៅក្នុងសង្គមមួយ ដោយសុខដុមរមនា។ ទីវត្តអារាម គឺជាមូលដ្ឋានគ្រឹះនៃអក្សរសាស្ត្រខ្មែរយើង ដែលជាជង្រុកនៃសម្បត្តិវប្បធម៌ជាតិ និងជាថ្នាលបណ្តុះបណ្តាលនូវធនធានមនុស្ស ទាំងវិស័យអាណាចក្រ និងពុទ្ធចក្រ។ ស្របពេលដែលប្រទេសកម្ពុជាមានសុខសន្តិភាពពេញលេញ ក្នុងនោះវិស័យពុទ្ធចក្រ និងអាណាចក្រ ក៏កំពុងមានការរីកចម្រើនគួរឲ្យកត់សម្គាល់។ ជាមួយនេះ វិស័យទាំងពីរនេះ ចាំបាច់ត្រូវដើរទន្ទឹមគ្នា ពីព្រោះព្រះពុទ្ធសាសនា បានចាក់ឫសយ៉ាងជ្រៅទៅក្នុងផ្នត់គំនិត និងទំនៀមទំលាប់ប្រពៃណីរបស់ប្រជាជនខ្មែរយើង ដែលប្រជាជនកម្ពុជាមានជំនឿជឿជាក់ និងគោរពប្រតិបត្តិ និងបានដើរតួនាទីយ៉ាងសំខាន់ សំរាប់ការឯកភាពជាតិ ការសិក្សាអប់រំផ្លូវចិត្ត ឲ្យបុគ្គលគ្រប់រូប ដើរតាមផ្លូវល្អជាដើម។
ឯកឧត្តមបន្តថា ជាក់ស្ដែងមូលដ្ឋាននៃស្រុកបន្ទាយស្រីយើង ក៏កំពុងមានសន្ទុះអភិវឌ្ឍន៍ទៅមុខឥតឈប់ឈរក្រោមនយោបាយឈ្នះឈ្នះ របស់សម្ដេចតេជោ ហ៊ុន សែន និងដឹកនាំបន្តដោយសម្ដេចធិបតី ហ៊ុន ម៉ាណែត នាយករដ្ឋមន្ត្រី បានធ្វើឲ្យគ្រប់វិស័យទាំងនៅទីក្រុង និងជនបទ មានការរីកចម្រើន អភិវឌ្ឍន៍ជាបន្តបន្ទាប់ ទាំងផ្លូវថ្នល់ សាលារៀន មន្ទីរពេទ្យ វត្តអារាម និងហេដ្ឋារចនាសម្ព័នសំខាន់ៗជាច្រើនទៀត។
សូមជម្រាបថា ទៀនព្រះវស្សា និងទ័យវត្ថុ ដែលបាននាំយកមកប្រគេនដល់វត្តទាំង៣ នាពេលនេះ ដោយក្នុងមួយវត្តៗមាន៖ ទៀនព្រះវស្សា១គូរ អង្ករ មី ទឹកត្រី ទឹកសុីអុីវ ទឹកសុទ្ធ ភេសជ្ជ បច្ច័យ និងគ្រឿងឧបភោគបរិភោគមួយចំនួនទៀត។ ក្នុងឱកាសនោះដែរ ក្រុមការងារក៏បានប្រគេនសុីម៉ង់ ១០តោន ជូនព្រះចៅអធិកាវត្តប្រាសាទនាគគូរ ដើម្បីបន្តការសាងសង់សាលាធម្មសភា និងប្រគល់អំពូលសូឡាចំនួន ២០គ្រឿង ជូនដល់មណ្ឌលសុខភាពបន្ទាយស្រី និងបានចែកក្រណាត់ស ឬក្រមា និងថវិកាមួយចំនួនដល់លោកយាយលោកតា និងយុវជនស្ម័គ្រចិត្តដែលបានចូលរួមក្នុងពិធីនោះផងដែរ៕
អត្ថបទ និងរូបភាព៖ លោគ អ៊ុន ណារាជ្យ
