ក្រុមគ្រូពេទ្យស្ម័ត្រចិត្តនៃមន្ទីរពេទ្យ Mackay ប្រទេសតៃវ៉ាន់ និង ធនាគារ UCB តាមរយៈអង្គការក្លឹប Rotary Angkor និងសាខាកាកបាទក្រហមកម្ពុជាខេត្តសៀមរាប បាននាំយកអំណោយផ្ដល់ជូនប្រជាពលរដ្ឋក្រីក្រ ១០០គ្រួសារ និងពិនិត្យព្យាបាលជំងឺជូនពលរដ្ឋឥតគិតថ្លៃ នៅឃុំដានរុន ស្រុកសូទ្រនិគម ខេត្តសៀមរាប នៅមណ្ឌលសុខភាពដានរុន រយៈពេលពេញមួយថ្ងៃ កាលពីថ្ងៃទី១៥ ខែកក្កដា ឆ្នាំ២០២៤ ម្សិលមិញនេះ។
លោកវេជ្ជបណ្ឌិត Hwang Wei Der ប្រធានក្រុមគ្រូពេទ្យស្ម័ត្រចិត្តប្រទេសតៃវ៉ាន់ បានបង្ហាញថា តាមរយៈកម្មវិធីមនុស្សធម៌នាពេលនេះ វានឹងបានលើកកម្ពស់បន្ថែមនូវកិច្ចសហប្រតិបត្តិការ និងទំនាក់ទំនងប្រទេសទាំងពីរ កម្ពុជា-ចិន កាន់តែល្អប្រសើរ ជាពិសេសប្រជាជនចិន និងប្រជាពលរដ្ឋខេត្តសៀមរាប កាន់តែនៅជិតគ្នាបំផុត។ លោកថានេះជាលើកទី៦ហើយ ដែលក្រុមគ្រូពេទ្យស្ម័ត្រចិត្តប្រទេសតៃវ៉ាន់ បានចូលរួមក្នុងសកម្មភាពមនុស្សធម៌តាមរយៈចុះពិនិត្យ និងព្យាបាលជំងឺជូនប្រជាពលរដ្ឋនៅខេត្តសៀមរាប តាមតំបន់ជនបទ ព្រមទាំងផ្តល់ស្បៀងអាហារជូនគ្រួសារពលរដ្ឋក្រីក្រ។
មានប្រសាសន៍ក្នុងឱកាសនោះ លោកជំទាវ ទុយ ជិ ប្រាក់ សោភ័ណ អនុប្រធានគណៈកម្មាធិការ សាខាកាកបាទក្រហមកម្ពុជាខេត្តសៀមរាប បាននាំយកនូវប្រសាសន៍ផ្ដាំផ្ញើ សួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ប្រាក់ សោភ័ណ ប្រធានគណៈកម្មាធិការសាខា ដែលថ្នាក់ដឹកនាំទាំងអស់តែងយកចិត្តទុកដាក់គិតគូរខ្ពស់ចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ដូចដែលលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល”។
លោកជំទាវ ទុយ ជិ ប្រាក់ សោភ័ណ ក៏សូមថ្លែងអំណរគុណចំពោះក្រុមគ្រូពេទ្យស្ម័ត្រចិត្តប្រទេសតៃវ៉ាន់ និងសប្បុរសជននានា ក៏ដូចជា Rotary Angkor ដែលតែងតែបានចូលរួមក្នុងសកម្មភាពមនុស្សធម៌ ជាមួយរាជរដ្ឋាភិបាលកម្ពុជា និងសាខាកាកបាទក្រហមខេត្តសៀមរាប ទាំងការផ្តល់នូវស្បៀងអាហារ សម្ភារៈសិក្សា ជាពិសេសការយកចិត្តទុកដាក់ពីសុខភាពរបស់ប្រជាពលរដ្ឋនៅតាមតំបន់ជនបទ។ ជាក់ស្ដែងនៅថ្ងៃនេះ ក៏បាននាំយកអំណោយផ្តល់ជូនប្រជាពលរដ្ឋក្រីក្រចំនួន ១០០គ្រួសារ រួមមាន៖ អង្ករ ទឹកស៊ីអុីវ ទឹកត្រី ភួយ និងថវិកាមួយចំនួន និងបានពិនិត្យព្យាបាលជំងឺជូនប្រជាពលរដ្ឋបានជាង ២០០នាក់ផងដែរ។
ក្នុងឱកាសនោះ លោកជំទាវអនុប្រធាន ក៏បានផ្តាំផ្ញើដល់បងប្អូនប្រជាពលរដ្ឋ ត្រូវប្រុងប្រយ័ត្ន បង្ការ ថែរក្សាសុខភាពកុំឲ្យឆ្លង ឬកើតមានជំងឺផ្សេងៗមកលើកូនចៅ និងក្រុមគ្រួសារខ្លួន ជាពិសេសនៅក្នុងរដូវវស្សានេះ ត្រូវធ្វើអនាម័យ បរិស្ថានស្អាតក្នុង និងជុំវិញផ្ទះ បំបាត់ជម្រកមូសខ្លា រស់នៅស្អាតបង្ការចៀសឆ្ងាយពីជំងឺរាគរុស និងគ្រុនចាញ់ គ្រុនឈាមជាដើម។ ម៉្យាងទៀតត្រូវប្រយ័ត្នជានិច្ចចំពោះកុមារតូចៗកុំឲ្យទៅលេងទឹកថ្លុក ប្រឡាយ បឹងបួរ ខ្លាចក្រែងគ្រោះថ្នាក់កើតឡើងជាយថាហេតុ ហើយបើសង្ស័យថាមានសមាជិកគ្រួសារកើតជំងឺណាមួយ សូមរួសរាន់យកទៅមន្ទីរពេទ្យ ឬមណ្ឌលសុខភាព ដែលនៅជិតបងប្អូនបំផុតឲ្យបានទាន់ពេលវេលា៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
