កាលពីថ្ងៃទី៩ ខែកក្កដា ឆ្នាំ២០២៤នេះ រដ្ឋបាលខេត្តសៀមរាប បានកិច្ចប្រជុំមួយស្ដីពីការរៀបចំសណ្ដាប់ធ្នាប់ និងរបៀបរៀបរយសាធារណៈក្នុងក្រុងសៀមរាប ដឹកនាំដោយលោក សំកុល សុចិត្រា អភិបាលរងខេត្ត និងជាប្រធានគណៈកម្មាការរៀបចំសណ្ដាប់ធ្នាប់ និងរបៀបរៀបរយសាធារណៈក្នុងភូមិសាស្រ្តក្រុងសៀមរាប ដោយមានការចូលរួមពីមន្ត្រីសាលាក្រុង ស្នងការរដ្ឋាននគរបាលខេត្ត មេបញ្ជាការកងរាជអាវុធហត្ថខេត្ត រួមនឹងលោកលោកស្រីសមាជិកសមាជិកាលេខាធិការដ្ឋាន នៃគណៈកម្មការរៀបចំសណ្ដាប់ធ្នាប់ និងរបៀបរៀបសារធារណៈក្នុងក្រុងជាច្រើនរូប។
លោក សំកុល សុចិត្រា អភិបាលរងខេត្ត មានប្រសាសន៍ថា ក្រុងសៀមរាប ជាទីក្រុងទេសចរណ៍វប្បធម៌ប្រវត្តិសាស្ត្រដ៏ធំជាងគេនៅកម្ពុជា ដោយមានប្រាសាទអង្គរវត្តដ៏ល្បីល្បាញ និងប្រាសាទបុរាណដទៃទៀតជាច្រើន។ ក្រៅពីនេះក្រុងសៀមរាប ក៏មានកន្លែងកម្សាន្តដ៏សម្បូរបែប រមណីយដ្ឋាន ភោជនីយដ្ឋាន ក្លឹបកំសាន្ត មណ្ឌលកំសាន្ត សណ្ឋាគារ ផ្ទះសំណាក់ ផ្សាររដ្ឋ ផ្សារឯកជន ផ្សារទំនើប ទីតាំងសម្រាប់លេងកីឡា មន្ទីរ ពេទ្យបង្អែក មណ្ឌលសុខភាពសាធារណៈ មន្ទីរពេទ្យឯកជន វត្តអារាម ធនាគារ សាលារៀនរដ្ឋ-ឯកជន ស្ថាប័ន សាធារណៈ និងក្រុមហ៊ុនឯកជនជាច្រើនទៀត។ កត្តាទាំងនេះបានធ្វើឲ្យក្រុងសៀមរាប តែងតែទទួលបាននូវកំណើនភ្ញៀវទេសចរជាតិ-អន្តរជាតិយ៉ាងច្រើនសន្ធឹកសន្ធាប់មកទស្សនាកម្សាន្តជារៀងរាល់ឆ្នាំ និងបានក្លាយជាប៉ូលសេដ្ឋកិច្ចដ៏សំខាន់សម្រាប់ខេត្តសៀមរាបទាំងមូល ដែលបានទាក់ទាញនូវអ្នកវិនិយោគគ្រប់ប្រភេទ និងបងប្អូនប្រជាពលរដ្ឋទាំងក្នុងក្រុង និងក្រៅស្រុក ចូលមកវិនិយោគ ធ្វើអាជីវកម្ម សេវាកម្ម ធ្វើការងារ និងប្រកបមុខរបរផ្សេងៗជាច្រើន។
លោក សំកុល សុចិត្រា មានប្រសាសន៍ទៀតថា ជាមួយនឹងភាពសម្បូរបែបនេះ អាជ្ញាធរខេត្តក៏បានគិតគូរ និងយកចិត្តទុកដាក់ខ្ពស់ផងដែរ ពីរៀបចំផែនការរៀបចំសណ្តាប់ធ្នាប់ និងរបៀបរៀបរយសាធារណៈក្នុងក្រុងសៀមរាប ដើម្បីដោះស្រាយនូវបញ្ហានានា សំដៅលើកកម្ពស់វិស័យទេសចរណ៍ បង្កើនភាពពេញចិត្ត និងភាពទាក់ទាញដល់ភ្ញៀវទេសចរណ៍ឲ្យបានជាអតិបរមា ថែរក្សាទីក្រុងទេសចរណ៍វប្បធម៌ប្រវត្តិសាស្ត្រ ដែលជាមរតកដូនតាសម័យអង្គរ និងប្រែរូបរាងឲ្យក្លាយជាទីក្រុងបេតិកភណ្ឌទំនើបនាពេលអនាគត។ ជាពិសេសស្របតាមឆន្ទៈរបស់រាជរដ្ឋាភិបាលដែលចាត់ទុកវិស័យទេសចរណ៍ជាមាសបៃតង ចូលរួមដល់ការអភិវឌ្ឍសេដ្ឋកិច្ច សង្គម លើកស្ទួយវប្បធម៌ជាតិ និងទ្រទ្រង់ដល់កិច្ចគាំពារបរិស្ថានយ៉ាងមានប្រសិទ្ធភាព។ ដូចនេះ រដ្ឋបាលខេត្តជឿជាក់ថា ផែនការនេះនឹងក្លាយជាឧបករណ៍ដ៏មានសារៈសំខាន់ក្នុងការដោះស្រាយ និងកែលម្អសណ្តាប់ធ្នាប់ និងរបៀបរៀបរយសាធារណៈក្នុងក្រុងសៀមរាប ឲ្យកាន់តែល្អប្រសើរឡើង។
ព័ត៌មានជាតិ ថ្មីៗ
លោកអភិបាលរងខេត្តបន្តថា គោលបំណងនៃផែនការស្តីពីការរៀបចំសណ្តាប់ធ្នាប់ និងរបៀបរៀបរយសាធារណៈក្នុងក្រុងសៀមរាប គឺត្រូវធ្វើយ៉ាងណាឲ្យក្រុងសៀមរាប មានសណ្តាប់ធ្នាប់ និងរបៀបរៀបរយសាធារណៈ និងដើម្បីធានាឲ្យបាននូវនិរន្តរភាពវិស័យទេសចរណ៍ មានគុណភាព និងភាពទាក់ទាញនៅក្នុងតំបន់ និងសកលលោក ផ្សារភ្ជាប់ជាមួយការអភិវឌ្ឍ និងការលើកកម្ពស់សេដ្ឋកិច្ចមូលដ្ឋានរបស់ប្រជាពលរដ្ឋ ស្របតាមគោលបំណងនៃ “ផែនការមេ អភិវឌ្ឍទេសចរណ៍ខេត្តសៀមរាប ២០២១-២០៣៥” “យុទ្ធនាកាសៀមរាបផ្ទះខ្ញុំ” និង “ផែនទីចង្អុលផ្លូវទីក្រុងឆ្លាតវៃនៃ ខេត្តសៀមរាប” ផងដែរ៕
អត្ថបទ និងរូបភាព៖ រដ្ឋបាលខេត្តសៀមរាប
កែសម្រួល៖ លោក អ៊ុន ណារាជ្យ
