នៅថ្ងៃទី៩ ខែកក្កដា ឆ្នាំ២០២៤នេះ រដ្ឋបាលស្រុកបន្ទាយស្រី បានរៀបចំយុទ្ធនាការដាំដើមឈើចំនួន ៥ ៥០០ដើម នៅតាមដងផ្លូវក្នុងភូមិសាស្ត្រស្រុក ដើម្បីអបអរសាទររក្ខទិវា ៩កក្កដា (៩កក្កដា ១៩៥២ – ៩កក្កដា ២០២៤) និងជាគំនិតផ្ដួចផ្ដើមរបស់ឯកឧត្តម ប្រាក់ សោភ័ណ អភិបាលខេត្តសៀមរាប ក្នុងការបំផុសចលនាប្រជាពលរដ្ឋតាមបណ្ដាក្រុង ស្រុកទាំងអស់ ចូលរួមដាំងដើមឈើ និងផ្កាតាមដងផ្លូវឱ្យបានច្រើន ដើម្បីបង្កើតម្លប់កាត់បន្ថយកម្ដៅ និងបង្កើនទេសភាពបៃតង ដែលជាសោភណ្ឌភាពក្នុងមូលដ្ឋាន។
លើកឡើងក្នុងទិវានោះ លោក រិន ឡូត អភិបាលស្រុកបន្ទាយស្រី បង្ហាញថា ជារៀងរាល់ឆ្នាំ ស្រុកបន្ទាយស្រី ទទួលបានភ្ញៀវទេសចរប្រមាណជាងកន្លះលាននាក់ ក្នុងនោះ ទេសភាពបៃតង និងធម្មជាតិដ៏ស្រស់បំព្រងរបស់ស្រុកមួយនេះ ក៏ជាផ្នែកមួយយ៉ាងសំខាន់ ក្នុងការទាក់ទាញភ្ញៀវទេសចរជាតិ និងអន្តរជាតិ ដែលជាប្រភពសេដ្ឋកិច្ចដ៏សំខាន់សម្រាប់ប្រជាពលរដ្ឋក្នុងមូលដ្ឋាន។
ទន្ទឹមនោះ លោកអភិបាលស្រុក បញ្ជាក់ផងដែរថា យុទ្ធនាការដាំដើមឈើផ្កានៅពេលនេះ បានអញ្ជើញប្រជាពលរដ្ឋ សិស្សានុសិស្ស រួមនិងអាជ្ញាធរគ្រប់លំដាប់ថ្នាក់ សរុប ៣៥០នាក់ ដើម្បីធ្វើការបញ្ជ្រាបការយល់ដឹងពីអត្ថប្រយោជន៍នៃដើមឈើ ដែលបានទ្រទ្រង់ជីវិតមនុស្ស សត្វ និងបញ្ចៀសហានិភ័យនានាពីការបំរែបំរួលអាកាសធាតុ ដែលសម្រួលដល់ការរស់នៅរបស់ជីវិតនៅលើភពផែនដី។
ព័ត៌មានជាតិ ថ្មីៗ
ក្នុងនាមអាជ្ញាធរស្រុក លោក រិន ឡូត បានថ្លែងអំណរគុណដល់អាជ្ញាធរជាតិអប្សរា មន្ទីរបរិស្ថានខេត្ត និងមន្ទិរកសិកម្ម រុក្ខាប្រមាញ់ និងនេសាទខេត្ត ដែលបានផ្ដល់ដើមឈើផ្កា ជូនរដ្ឋបាលស្រុក និងបានអំពាវនាវប្រជាពលរដ្ឋ ដែលមានដើមឈើនៅខាងមុខផ្ទះ សូមជួយថែទាំ ស្រោចទឹក ឱ្យលូតលាស់បានល្អ និងរួមគ្នាថែរក្សាតំបន់ការពារផ្សេងៗ ដូចជា ឧទ្យានជាតិភ្នំគូលែន រមណីយដ្ឋាន និងព្រៃសហគមន៍ក្នុងភូមិសាស្ត្រស្រុកជាដើម។
អត្ថបទ និងរូបភាព៖ រដ្ឋបាលស្រុកបន្ទាយស្រី
