ការដេញថ្លៃគម្រោងសាងសងផ្លូវបេតុងអាមេ ៣ខ្សែ ក្នុងឃុំដូនពេង និងឃុំនគរភាស ស្រុកអង្គរជុំ ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ កាលពីថ្ងៃទី០៨ ខែកក្កដា ឆ្នាំ២០២៤ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
ប្រធានគណៈកម្មការលទ្ធកម្មឃុំដូនពេង លោក ធិន ឡោះ បានឲ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំដូនពេង បានដាក់ដេញថ្លៃសាងសង់ផ្លូវបេតុងអាមេចំនួន២ខ្សែ សរុបមានប្រវែង២២០ម៉ែត្រ ទទឹង៤.៥ម៉ែត្រ កម្រាស់០.១៥ម៉ែត្រ ព្រមទាំងដាក់លូចាក់បេតុងការពារផ្លូវ៤កង់ និងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ១១៩.០៩៦.៥០០រៀល ដោយមានក្រុមហ៊ុនចំនួន៤ បានដាក់សំណើរ។ ជាលទ្ធផលបានទៅលើក្រុមហ៊ុន មិញ អ៊ា ក្នុងតម្លៃ ៦០.២៨០.០០០រៀល។
ដោយឡែកលោក មី គង់ ប្រធានគណៈកម្មការលទ្ធកម្មឃុំនគរភាស បានឲ្យដឹងដែរថា សម្រាប់គម្រោងមូលនិធិឃុំឆ្នាំ២០២៤នេះ ឃុំនគរភាស បានដាក់ដេញថ្លៃសាងសង់ផ្លូវបេតុងអាមេ ១ខ្សែ ប្រវែង១៩០ម៉ែត្រ ទទឹង៤.៥ម៉ែត្រ កម្រាស់០.១៥ម៉ែត្រ ព្រមទាំងដាក់លូចាក់បេតុងការពារផ្លូវ៤កង់ និងស្លាកគម្រោងចំនួន១ ក្នុងតម្លៃប៉ាន់ស្មាន ១០៨.៣២២.៥០០រៀល ដោយមានក្រុមហ៊ុនចំនួន៥ បានដាក់សំណើរ។ ជាលទ្ធផលបានទៅលើក្រុមហ៊ុន អំ ចំរើន ក្នុងតម្លៃ ៥២.០២៦.៧៥០រៀល។
ព័ត៌មានជាតិ ថ្មីៗ
ជាមួយនឹងការទទួលបានសិទ្ធនៃការសាងសង់នេះ តំណាងក្រុមហ៊ុនម៉ៅការទាំងពីរ បានធ្វើការប្ដេជ្ញាចិត្ត ដោយសន្យាសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
