កិច្ចប្រជុំក្រុមប្រឹក្សាប្រតិបត្តិនៃសហភាពប្រៃសណីយ៍អាស៊ីប៉ាស៊ីហ្វិក (APPU Executive Council Meeting – EC Meeting) ត្រូវបានបើកកិច្ចប្រជុំជាផ្លូវការហើយ នៅព្រឹកថ្ងៃទី១២ ខែសីហា ឆ្នាំ២០២៤នេះ នៅលើទឹកដីនៃខេត្តសៀមរាប ដែលមានរយៈពេល៥ថ្ងៃ ចាប់ពីថ្ងៃទី១២-១៦ ខែសីហា ឆ្នាំ២០២៤ ដែលប្រទេសកម្ពុជាទទួលបានសិទ្ធិធ្វើជាម្ចាស់ផ្ទះលើកដំបូងបន្ទាប់ពីក្លាយជាសមាជិកនៃសហភាពតាំងពីឆ្នាំ១៩៩៧មក។
កិច្ចប្រជុំនេះដែរ ប្រព្រឹត្តិទៅក្រោមវត្តមាន ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍កម្ពុជា ដោយមានការចូលរួមពីឯកឧត្តម Metoki Masahiko អគ្គនាយកសហភាពប្រៃសណីយ៍សកល និងឯកឧត្តម Vinaya Prakash Singh អគ្គលេខាធិការសហភាពប្រៃសណីយ៍អាស៊ីប៉ាស៊ីហ្វិក រួមនឹងតំណាងក្រសួងស្ថាប័ន និងអង្គភាពពាក់ព័ន្ធមកពីប្រទេសចំនួន២៤ ក្នុងចំណោមប្រទេសជាសមាជិកសរុបចំនួន៣២ សហភាពប្រៃសណីយ៍សកល សហគមន៍ប្រៃសណីយ៍តាមតំបន់ សហករប្រៃសណីយ៍ និងអ្នកសង្កេតការណ៍ពីបណ្តាប្រទេសមួយចំនួន។
កិច្ចប្រជុំនេះដែរ រៀបចំឡើងដើម្បីធ្វើការពិនិត្យ តាមដានការអនុវត្តការងារផ្សេងៗ ដែលកំណត់ដោយសេចក្តីសម្រេចនៃមហាសន្និបាត, ដាក់ចេញវិធានសម្រាប់ប្រតិបត្តិការសេវាប្រៃសណីយ៍អន្តរជាតិរវាងប្រទេសជាសមាជិក, រក្សាទំនាក់ទំនងជាមួយរដ្ឋបាលប្រៃសណីយ៍នៃប្រទេសសមាជិក, ពិនិត្យ និងអនុម័តផែនការថវិកាប្រចាំឆ្នាំ, ធ្វើទំនាក់ទំនងជាមួយស្ថាប័នពាក់ព័ន្ធវិស័យប្រៃសណីយ៍ក្នុងតំបន់ និងសកល និងរៀបចំប្រជុំដើម្បីសម្របសម្រួលផ្លាស់ប្តូរទស្សនៈគ្នា ក្នុងចំណោមប្រទេសសមាជិកក្នុងតំបន់ មុននឹងមហាសន្និបាតរបស់សហភាពប្រៃសណីយ៍សកល។
ថ្លែងបើកអង្គប្រជុំ ឯកឧត្តម ជា វ៉ាន់ដេត បានលើកឡើងអំពីសារៈសំខាន់របស់ប្រទេសជាសមាជិក ក្នុងការពង្រឹងការតភ្ជាប់បណ្តាញប្រៃសណីយ៍ ការធ្វើឌីជីថលនីយកម្មសេវាប្រៃសណីយ៍ និងការពង្រឹងថ្នាលឌីជីថល សម្រាប់ពាណិជ្ជកម្មតាមប្រព័ន្ធអេឡិចត្រូនិក ការចូលរួមគិតគូរដល់បរិស្ថានក្នុងប្រតិបត្តិការសេវាប្រៃសណីយ៍ ការកសាងសមត្ថភាពដល់បុគ្គលិកវិស័យប្រៃសណីយ៍ ដើម្បីសម្របខ្លួនតាមការវិវត្តនៃបច្ចេកវិទ្យា និងតម្រូវការអ្នកប្រើប្រាស់ និងការពង្រឹងភាពជាដៃគូជាមួយភាគីពាក់ព័ន្ធ ដើម្បីជំរុញនវានុវត្តន៍ និងធ្វើឱ្យប្រសើរឡើងនៃសេវាប្រៃសណីយ៍។
សូមបញ្ជាក់ដែរថា កម្ពុជាបានក្លាយជាសមាជិកសហភាពប្រៃសណីយ៍សកល កាលពីឆ្នាំ១៩៥១ និងសហភាពប្រៃសណីយ៍អាស៊ី-ប៉ាស៊ីហ្វិកនៅឆ្នាំ១៩៩៧។ គិតមកដល់ពេលបច្ចុប្បន្នសហភាពប្រៃសណីយ៍សកល មានប្រទេសជាសមាជិកសរុបចំនួន១៩២ និងសហភាពប្រៃសណីយ៍អាស៊ី-ប៉ាស៊ីហ្វិក មានប្រទេសជាសមាជិកសរុបចំនួន៣២ ផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
