នៅព្រឹកថ្ងៃទី១៥ ខែសីហា ឆ្នាំ២០២៤នេះ មន្ត្រីការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប សហការជាមួយអាជ្ញាធរស្រុកសូទ្រនិគម ភ្នាក់ងារសុខភាពសត្វភូមិ បានចុះយុទ្ធនាការចាក់ថ្នាំការពារជំងឺសារទឹកដល់សត្វគោប្រជាពលរដ្ឋបានចំនួន៥១០ក្បាល និង ក្របី៣៣០ក្បាល នៅក្នុងភូមិសន្ទៃ ឃុំដានរុន ស្រុកសូទ្រនិគម ខេត្តសៀមរាប។
លោក ព្រំ វិច ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្មខេត្ត បានបង្ហាញថា ក្នុងរយៈពេល០៧ខែ ឆ្នាំ២០២៤នេះ ខេត្តសៀមរាប ពុំមានជំងឺឆ្លងសត្វផ្ទុះឡើងគួរឱ្យកត់សម្គាល់អ្វីឡើយ ដោយសារបងប្អូនអ្នកចិញ្ចឹមសត្វមានការយល់ដឹង និងអនុវត្តបានតាមការណែនាំរបស់មន្ត្រីជំនាញ និងអាជ្ញាធរមូលដ្ឋានតែងតែនាំសត្វរបស់គាត់មកចាក់ថ្នាំការពារទៅតាមកាលកំណត់។ ប៉ុន្តែលោកក៏សូមអំពាវនាវដល់ម្ចាស់ចិញ្ចឹមសត្វទាំងអស់ ត្រូវប្រញាប់នាំសត្វមកចាក់ថ្នាំការពារ ហើយការចាក់វ៉ាក់សាំងនេះ គឺជួយសម្រាលការលំបាករបស់ប្រជាកសិករកុំឱ្យគោក្របីទាំងនោះឈឺ ឬងាប់នាំឱ្យបាត់បង់ចំណូល។ ជាពិសេសត្រូវពិនិត្យតាមដានឱ្យបានជាប្រចាំ បង្ការពីការឆ្លងជំងឺ ឈឺ ឬស្លាប់របស់សត្វ និងត្រូវប្រុងប្រយ័ត្នទៅលើជំងឺសារទឹក អុតក្តាម បុសខ្យល់និងជំងឺដុំពក។
មន្ត្រីជំនាញដដែល ក៏បានសំណូមពរដល់ម្ចាស់សត្វ និងអាជ្ញាធរមូលដ្ឋាន ត្រូវមានវិធានការត្រៀមដើម្បីសង្គ្រោះសត្វក្នុងពេលមានគ្រោះទឹកជំនន់ ដោយត្រូវបញ្ជូនសត្វទៅទីទួលមានសុវត្ថិភាព រៀបចំចំណី និងទឹកស្អាតឱ្យសត្វផឹកឱ្យបានគ្រប់គ្រាន់ ព្រមទាំងជម្រកឱ្យបានល្អ។ ក្នុងករណីមានសត្វឈឺ ត្រូវបំបែកសត្វឈឺចេញពីសត្វជា ហើយទំនាក់ទំនងទៅភ្នាក់ងារសុខភាពសត្វភូមិ អាជ្ញាធរភូមិឃុំ និងមន្ត្រីជំនាញដើម្បីជួយអន្តរាគមន៍។ បើសិនសត្វងាប់ដោយសារជំងឺមិនត្រូវប៉ះពាល់បរិភោគ ឬចរាចរលក់ដូរជាដាច់ខាត ហើយត្រូវកប់ ឬដុតកម្ទេចចោល និងត្រូវរាយការណ៍ទៅមន្ត្រីជំនាញដើម្បីចុះអន្តរាគមន៍ឱ្យបានទាន់ពេលវេលា។
ព័ត៌មានជាតិ ថ្មីៗ
គួរឱ្យដឹងថា ក្នុងអំឡុងពេលនៃយុទ្ធនាការចាក់វ៉ាក់សាំងនៅខែសីហា និងខែកញ្ញា ឆ្នាំ២០២៤នេះ មន្ទីរកសិកម្មខេត្តសៀមរាប ទទួលបានថ្នាំការពារសត្វពីអគ្គនាយកដ្ឋានសុខភាពសត្វ និងផលិតកម្មសត្វដូចជា៖ វ៉ាក់សាំងសារទឹកចំនួនពី ៨ទៅ១០ម៉ឺនកម្រិត វ៉ាក់សាំងបុសខ្យល់ អុតក្តាម ដុំពកមួយចំនួនទៀតសម្រាប់ក្នុងឆមាសទី១ និងមានបសុឱសថ និងសម្ភារៈបរិក្ខាមួយចំនួនទៀតផងដែរ ដូចជាថ្នាំព្យាបាល វីតាមីន សំឡី អាល់កុល ម្ជុល សឺរាំង និងទឹកថ្នាំសម្លាប់មេរោគជាដើម៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
