ក្រសួងរៀបចំដែនដី នគរូបនីយកម្ម សំណង់ និងសុរិយោដី នាព្រឹកថ្ងៃទី ១៥ ខែសីហា ឆ្នាំ២០២៤ បានរៀបចំសិក្ខាសាលាស្តីពី នីតិវិធីនៃការធ្វើអធិការកិច្ចសំណង់ និងបទប្បញ្ញត្តិពាក់ព័ន្ធក្នុងវិស័យសំណង់នៅខេត្តសៀមរាប ក្រោមវត្តមានឯកឧត្តម លាង មុនីរិទ្ធ រដ្ឋលេខាធិការក្រសួងរៀបចំដែនដី ដោយមានការចូលរួមពី ឯកឧត្តម សួស សុចាន់ សមាជិកក្រុមប្រឹក្សាខេត្តសៀមរាប លោកលោកស្រីជាអគ្គនាយកសំណង់ ថ្នាក់ដឹកនាំខេត្ត មន្ទីរអង្គភាព អាជ្ញាធរក្រុងស្រុក និងមន្ត្រីសមត្ថកិច្ចពាក់ព័ន្ធមកពីខេត្តចំនួន៦ រួមមាន៖ ខេត្តសៀមរាប កំពង់ធំ ព្រះវិហារ ឧត្តរមានជ័យ ព្រៃវែង និងខេត្តស្វាយរៀង។
ឯកឧត្តម សួស សុចាន់ សមាជិកក្រុមប្រឹក្សាខេត្ត បានគូសបញ្ជាក់ថា សិក្ខាសាលានាពេលនេះ គឺពិតជាមានសារៈសំខាន់ណាស់ ស្របពេលដែលវិស័យអចលនវត្ថុដែលមានដីធ្លី និងសំណង់កំពុងមានសន្ទុះកើនឡើងគួរឱ្យកត់សម្គាល់ ហើយក្នុងនោះខេត្តសៀមរាប ជាខេត្តសម្បូរទៅដោយសំណង់ស្ថាបត្យកម្មជាប្រវត្តិសាស្ត្រ ដែលដូនតាយើងបានបន្សល់ទុកនៅជាកេរ្តិ៍មរតកមកដល់ពេលនេះ។ ជាមួយគ្នានេះរដ្ឋបាលខេត្ត បានខិតខំយកចិត្តទុកដាក់កែលម្អ និងអភិវឌ្ឍន៍លើវិស័យជាអាទិភាពជាច្រើន ជាពិសេសគឺវិស័យអប់រំ វិស័យការងារ ការកសាងធនធានមនុស្ស វិស័យដីធ្លី និងសំណង់ ព្រមទាំងការអភិវឌ្ឍសមត្ថភាពមន្ត្រីរាជការ ដើម្បីឱ្យស្របទៅនឹងការរីកចម្រើននៃបច្ចេកវិទ្យានាពេលបច្ចុប្បន្នផងដែរ។
ក្នុងឱកាសនោះដែរ ឯកឧត្តម លាង មុនីរិទ្ធ បានបញ្ជាក់ថា វិស័យសំណង់ ដែលជាវិស័យកំពុងមានការរីកចម្រើនខ្លាំង ក៏កើតមាននូវបទល្មើសសំណង់ជាច្រើនផងដែរ នៅតាមបណ្តារាជធានីខេត្ត ដូចជាការសាងសង់ ការជួសជុល ការរុះរើដោយគ្មានលិខិតអនុញ្ញាត ឬការសាងសង់ខុសលិខិតអនុញ្ញាតជាដើម។ ដោយករណីប្រឈមនឹងចំណុចអវិជ្ជមាននៃបទល្មើសសំណង់បែបនេះ ឯកឧត្តមសូមឱ្យអាជ្ញាធរដែនដី និងមន្ទីរជំនាញ ក៏ដូចជាបណ្តាក្រុមហ៊ុនដែលកំពុងប្រកបអាជីវកម្មលើវិស័យសំណង់ ត្រូវពង្រឹងការគ្រប់គ្រងលើវិស័យ និងគោរពតាមបទដ្ឋានគតិយុត្តជាធរមាន ជាពិសេសតាមស្មារតីប្រកាសរួមរវាងក្រសួងមហាផ្ទៃ និងក្រសួងរៀបចំ ដែនដី នគរូបនីយកម្ម និងសំណង។
ឯកឧត្តមបន្តថា កន្លងមករាជរដ្ឋាភិបាលបានដាក់ចេញនូវឧបករណ៍គតិយុត្ត និងវិធានការចាំបាច់មួយចំនួនទាក់ទងនឹងវិស័យសំណង់ វិស័យរដ្ឋបាលដីធ្លី និងវិស័យរៀបចំដែនដី គឺមានអនុក្រឹត្យ ប្រកាស និងសេចក្តីណែនាំបច្ចេកទេស មានលក្ខណៈគ្រប់គ្រាន់សម្រាប់គាំទ្រដល់រដ្ឋបាលថ្នាក់ក្រោមជាតិ តម្រង់ ទិសក្នុងការអនុវត្តលើការងារនេះ។ ឯកឧត្តមបានសំណូមពរដល់សមាជិកសមាជិកានៃអង្គសិក្ខាសាលាទាំងអស់ ដែលជាអ្នកធ្វើការពាក់ព័ន្ធលើវិស័យសំណង់ ត្រូវបង្កើនការយកចិត្តទុកដាក់ស្តាប់ការណែនាំរបស់មន្ត្រីជំនាញ ដែលជាគ្រូឧទ្ទេស និងសូមចូលរួមជាមតិយោបល់ឱ្យបានផុលផុស ដើម្បីជាធាតុចូលសម្រាប់យកទៅអនុវត្តការងារជាក់ស្តែង៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
