នៅថ្ងៃទី១៨ខែសីហា ឆ្នាំ២០២៤ រដ្ឋបាលស្រុកស្រីស្នំ រដ្ឋបាលព្រៃឈើ ក្រុមការងារយុវជនចុះមូលដ្ឋានស្រុកស្រីស្នំ យុវជនស្ម័គ្រចិត្ត ព្រះសង្ឃ លោកគ្រូអ្នកគ្រូ សិស្សានុសិស្ស និងប្រជាពលរដ្ឋក្នុងមូលដ្ឋាន ជាង៨០០អង្គ/នាក់ បានសហការគ្នាដាំកូនឈើចំរុះ១០.០០០ដើម នៅព្រៃសហគមន៍អូរទឹកចេញ ឃុំត្រាំសសរ ស្រុកស្រីស្នំ ខេត្តសៀមរាប ដើម្បីស្ដារព្រៃឈើឡើង និងបំផុសស្មារតីប្រជាពលរដ្ឋក៏ដូចជាមហាជនទូទៅ រួមគ្នាថែរក្សាព្រៃឈើ និងស្រឡាញ់បរិស្ថានតាមរយ:ការដដើមឈើនៅតាមភូមិឋាន សហគមន៍របស់ខ្លួន។
លោក ហ៊ន់ ប្ញទ្ធិ អភិបាលស្រុកស្រីស្នំ មានប្រសាសន៍ ថាការដាំកូនឈើពេលនេះ គឺជាការឆ្លុះបញ្ចាំងឱ្យឃើញនូវការសាមគ្គី យកចិត្តទុកដាក់ ចញលរួមដាំស្ដារឡើងវិញនូវព្រៃឈឺរិចរិល ឱ្យមានពណ៌បៃតងស្រស់ រួមចំណែកក្នុងការទប់ស្កាត់ការប្រែប្រួលអាកាសធាតុ ជួយឲ្យមានតុល្យភាពភាពលំនឹងបរិស្ថាននិងជាចលនាបំផុសស្មារតីប្រជាពលរដ្ឋយើង ឱ្យ ចេះស្រឡាញ់ព្រៃឈើ ដាំដុះ និងការពារព្រៃឈើ សំដៅការពារសុខុមាលភាពគ្រួសារ ព្រមទាំង ជួយលើកស្ទួយបរិស្ថាន សង្គមផងដែរ ។
លោកអភិបាលស្រុក បានបញ្ជាក់ថាមកទល់ពេលនេះ ស្រុកបានដាំកូនឈើជិត៣០.០០០ ដើមហើយ នៅតាមបណ្ដោយផ្លូវជាតិលេខ៦៨ តាមសាលារៀន សាលាឃុំ មន្ទីរពេទ្យ វត្តអារាម ដងផ្លូវនៃឃុំទាំង៦ក្នុងស្រុកស្រីស្នំ ដោយទទួលបានការគាំទ្រ និងចូលរួមពីប្រជាពលរដ្ឋក្នុងមូលដ្ឋាន និងអ្នកពាក់ព័ន្ឋជាច្រើនទៀតផងដែរ។លោកអភិបាលស្រុក បានអំពាវនាវ ត្រូវរួមគ្នាការពារ និងស្រឡាញ់ព្រៃឈើ បញ្ឈប់ជាបន្ទាន់ការកាប់បំផ្លាញ ព្រៃឈើ ដើម្បីចាប់យកដីព្រៃធ្វើជាកម្មសិទ្ឋ ព្រោះការធ្វើអាជីវកម្មព្រៃឈើ និងជំនួញដីព្រៃឈើ គឺជាអំពើខុសច្បាប់ ជាបទល្មើសដ៏ធ្ងន់ធ្ងរដែលមិនអាចលើកលែងបាន ។ផ្ទុយទៅវិញ ត្រូវដោយងាកមករួមសាមគ្គីគ្នា បណ្តុះឡើងវិញនូវគំនិតស្រឡាញ់ព្រៃឈើ ថែរក្សាការពារព្រៃឈើ និងបណ្តុះ ឡើងវិញនូវទស្សនៈ សន្សំសំចៃក្នុងការប្រើប្រាស់ផល និងអនុផលព្រៃឈើគ្រប់ប្រភេទ ឈរលើស្មារតីគោរពច្បាប់៕
អត្តបទនិង រូបភាព លោក ធន់ ពូថេ
កែសម្រួល យូ វង្ស
