កាលពីរសៀលថ្ងៃទី១៦ ខែសីហា ឆ្នាំ២០២៤ នៅសាលប្រជុំសាលាខេត្តសៀមរាប បានបើកកិច្ចប្រជុំផ្សព្វផ្សាយស្ដីពីនិតិវិធីប្រលងប្រណាំងភូមិ ឃុំ សង្កាត់មានសុវត្ថិភាព ក្នុងក្របខ័ណ្ឌលក្ខណសម្បត្តិទី៦ មានអនាម័យ សោភ័ណ្ឌភាពល្អ និងបរិស្ថានល្អ ដោយអ្នកចូលរួមតំណាងមន្ទីរអង្គភាព តំណាងរដ្ឋបាលក្រុងស្រុកទាំង១៣ តំណាងរដ្ឋបាល ឃុំសង្កាត់ទាំង១០០ និងក្រុមហ៊ុនដឹកជញ្ជូនសំរាមជាង១៦០នាក់។
លោក ឃុន លីនណេ អភិបាលរងខេត្តសៀមរាប មានប្រសាសន៍ថា រាជរដ្ឋាភិបាលកម្ពុជានីតិកាលទី៧នៃរដ្ឋសភា បានដាក់ចេញនូវកម្មវិធីនយោបាយ សម្រាប់ការកសាង និងការការពារមាតុភូមិឆ្នាំ២០២៣-២០២៨ និងយុទ្ធសាស្ត្របញ្ចកោណដំណាក់កាលទី១ ឆ្នាំ២០២៣-២០២៨ ដើម្បីកំណើនសេដ្ឋកិច្ច បង្កើតការងារ ធានាសមធម៌ បង្កើនប្រសិទ្ធិភាព និងរក្សាចីរភាព។ ការកែទម្រងការងារ គ្រប់គ្រងធនធានធម្មជាតិ និងបរិស្ថាន ជាការងារអាទិភាពមួយក្នុងចំណោមការងារអាទិភាពរបស់រាជរដ្ឋាភិបាល ដែលមានក្រសួងបរិស្ថានដឹកនាំអនុវត្តរួមមាន៖ ការកាត់បន្ថយការបំពុលបរិស្ថាន ការពង្រឹងការគ្រប់គ្រងតំបន់ការពារធម្មជាតិ ការអប់រំផ្សព្វផ្សាយ និងការប្រែប្រួលអាកាសធាតុ ការធ្វើទំនើបកម្មរដ្ឋបាល និងហិរញ្ញវត្ថុប្រកបដោយចីរភាព និងការលើកម្ពស់ការទូតបៃតង។
លោកបានបន្ដថា ក្រសួងបរិស្ថានបានដាក់ចេញនូវយុទ្ធសាស្រ្តចក្រាវិស័យបរិស្ថានឆ្នាំ២០២៣-២០២៨ គោលបំណង តម្រង់ទិស និងចង្អុលបង្ហាញការងារអាទិភាព ដើម្បីធានាឱ្យបាននូវចីរភាពបរិស្ថាន និងសុក្រឹតកម្មបរិស្ថានកិច្ច ឆ្លើយតបទៅនឹងការប្រែប្រួលអាកាសធាតុ និងលើកកម្ពស់សេដ្ឋកិច្ចបៃតង ដើម្បីសម្រេចឱ្យបានជាប្រទេស អព្យាក្រឹតកាបូន និងមានគម្របព្រៃឈើ ៦០% នៅឆ្នាំ២០៥០។
ទន្ទឹងនេះដែរ ក្រសួងបរិស្ថានក៏បាននឹងកំពុង បន្តអនុវត្តគោលនយោបាយការគ្រប់គ្រងសំរាម សំណល់រឹងទីប្រជុំជនឆ្នាំ២០២០-២០៣០ គោលនយោបាយភូមិ ឃុំ-សង្កាត់មានសុវត្ថិភាព ក្របខ័ណ្ឌលក្ខណសម្បត្តិទី៦៖មានអនាម័យ សោភ័ណភាពល្អ និងបរិស្ថានល្អ និងកម្មវិធីវិមជ្ឈការ និងវិសហមជ្ឈការ ដែលក្រសួងបរិស្ថានបានប្រគល់មុខងារវិស័យបរិស្ថានជូនរដ្ឋបាលថ្នាក់ក្រោមជាតិ និងជួយគាំទ្រលើការពង្រឹងសមត្ថភាពធនធានមនុស្ស មធ្យោបាយសម្ភារៈ និងបច្ចេកទេស។ ដើម្បីចូលរួមចំណែកក្នុងការអនុវត្តសម្រេចឱ្យបាននូវកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល និងយុទ្ធសាស្រ្តចក្រាវិស័យបរិស្ថានរបស់ក្រសួងបរិស្ថាន រដ្ឋបាលខេត្ត សៀមរាបមានមន្ទីរបរិស្ថានខេត្តជាសេនាធិការបាននឹងកំពុងចូលរួមអនុវត្ត និងសម្របសម្រួលដៃគូអភិវឌ្ឍន៍ រដ្ឋបាលក្រុងស្រុក មន្ទីរ អង្គភាព អង្គការសង្គមស៊ីវិល និងវិស័យឯកជន ក្នុងការអនុវត្តសកម្មភាពការងារយ៉ាងសកម្ម និងទទួលខុសត្រូវខ្ពស់ ដើម្បីសម្រេចបានលទ្ធផលប្រកបដោយប្រសិទ្ធិភាព និងប្រសិទ្ធិផល។
ជាក់ស្តែង កិច្ចប្រជុំផ្សព្វផ្សាយថ្ងៃនេះ គឺពិតជាបានចូលរួមចំណែកយ៉ាងធំធេងក្នុងការអនុវត្តគោលនយោបាយ ភូមិ ឃុំ- សង្កាត់មានសុវត្ថិភាព ក្នុងក្របខ័ណ្ឌលក្ខណសម្បត្តិទី៦ “មានអនាម័យ សោភ័ណភាពល្អ និងបរិស្ថានល្អ ឱ្យ កាន់តែយល់ដឹងបន្ថែមទៀត និងមានការចូលរួមចលនាប្រឡងប្រណាំង “ភូមិ ឃុំ-សង្កាត់មានសុវត្ថិភាព” ក្នុង ក្របខ័ណ្ឌលក្ខណសម្បត្តិទី៦ ដើម្បីទទួលបានរង្វាន់ជ័យលាភីតាមគោលការណ៍លើកទឹកចិត្តមេត្រីបរិស្ថាន និងជំរុញដល់ការចូលរួមប្រតិបត្តិមេត្រីបរិស្ថានក្នុងភូមិ ឃុំ-សង្កាត់ សាលារៀន អារាម និងអាជីវកម្មដ្ឋាន ដើម្បីកម្ពុជា ទទួលបាននូវ «ភាពស្អាត» «ភាពបៃតង និង-ចីរភាព»។
លោក សម្ដែងមោទនភាពយ៉ាងក្រៃលែងចំពោះឃុំ-សង្កាត់ សាលារៀន វត្តអារាម រូបវន្តបុគ្គល និងនីតិបុគ្គល ដែលបានទទួលជ័យលាភីកន្លងមក និងបានកំពុងបន្តប្រតិបត្តិមេត្រីភាពបរិស្ថានក្នុងភូមិសាស្ត្រខេត្តសៀមរាប។ ជាក់ស្តែង ចាប់ពីឆ្នាំ២០១៥ ដល់ ឆ្នាំ២០២៣ ឃុំ-សង្កាត់ទទួលជ័យលាភីសរុបចំនួន ០២ឃុំ- សង្កាត់(ឃុំព្រះដាក់ និងឃុំខ្នាត) សាលារៀនទទួលជ័យលាភីសរុបចំនួន ២៧សាលា វត្តអារាមទទួលជ័យលាភី សរុបចំនួន ១៤វត្ត រូបវន្តបុគ្គលទទួលជ័យលាភីសរុបចំនួន ១៧រូប និងនីតិបុគ្គលទទួលជ័យលាភី សរុបចំនួន ០៩ស្ថាបន។ លោកសង្ឃឹមយ៉ាងមុតមាំថាកិច្ចប្រជុំផ្សព្វផ្សាយនាពេលនេះ នឹងសម្រេចបានលទ្ធផលជាផ្លែ ផ្កាក្នុងការអនុវត្តមុខងារវិស័យបរិស្ថាន និងធនធានធម្មជាតិឱ្យកាន់តែប្រសើរឡើងជាលំដាប់៕
អត្ថបទ និងរូបភាព លោកឈិត សាវី
កែសម្រួល ហាំ ម៉េងហួត
