ដើម្បីរួមចំណែកក្នុងការគាំទ្រវិស័យទេសចរណ៍នៅកម្ពុជា ជាពិសេសខេត្តសៀមរាប ដែលជាគោលអាទិភាព នារសៀលថ្ងៃទី១៩ ខែសីហា ឆ្នាំ ២០២៤នេះ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានសម្ពោធដាក់ឱ្យដំណើរការបឋម (soft launch) នូវកម្មវិធីទូទាត់បាគងទេសចរ ឬហៅថា Bakong Tourist App ដែលជាមធ្យោបាយទូទាត់ឌីជីថល លើថ្លៃទំនិញ និងសេវាផ្សេងៗ របស់ភ្ញៀវទេសចរអន្តរជាតិ ដែលមកកម្សាន្តនៅប្រទេសកម្ពុជា។
ថ្លែងក្នុងពិធីនោះ លោកជំទាវបណ្ឌិត ជា សិរី លើកឡើងថា ភ្ញៀវទេសចរអន្តរជាតិ អាចទាញយក Bakong Tourist App ដោយគ្រាន់តែធ្វើការចុះឈ្មោះងាយៗ និងធ្វើការបញ្ចូលទឹកប្រាក់ក្នុងគណនីបាគង ដើម្បីធ្វើប្រតិបត្តិការ។ ការណ៍នេះ នឹងកាត់បន្ថយបញ្ហាលំបាកដល់ភ្ញៀវទេសចរក្នុងការប្រើប្រាស់សាច់ប្រាក់ ដោយគ្រាន់តែធ្វើការស្កេនទូទាត់នៅតាមហាងទំនិញប្រមាណ ៣,៣លានទីតាំង ដែលមានសញ្ញា KHQR ។
ព័ត៌មានជាតិ ថ្មីៗ
លោកជំទាវ ក៏បានបញ្ជាក់ដែរថា ជំហានបន្ទាប់ Bakong Tourist App នឹងអាចភ្ជាប់ជាមួយបណ្ណទូទាត់អន្តរជាតិដែលពួកគាត់មាន ដើម្បីដាក់ប្រាក់ក្នុងគណនីបានកាន់តែងាយស្រួលបន្ថែមទៀត។
លោកជំទាវទេសាភិបាល បង្ហាញការជឿជាក់ថា ការដាក់ឱ្យដំណើរការបឋម Bakong Tourist App នឹងរួមចំណែកជំរុញនវានុវត្តន៍ និងបច្ចេកវិទ្យាហិរញ្ញវត្ថុ លើការប្រើប្រាស់សេវាធនាគារ និងហិរញ្ញវត្ថុ និងអាចផ្តល់នូវបទពិសោធក្នុងការទូទាត់ឌីជីថល ប្រកបដោយជំនឿទុកចិត្ត សុវត្ថិភាព ប្រសិទ្ធភាព ស្ថិរភាព និងបរិយាបន្ន ដើម្បីឱ្យកម្ពុជាក្លាយជាគោលដៅទេសចរណ៍ប្រកបដោយភាពទាក់ទាញ និងដើម្បីគាំទ្រគោលនយោបាយរបស់រាជរដ្ឋាភិបាលកម្ពុជាក្នុងការអភិវឌ្ឍសេដ្ឋកិច្ច និងសង្គមឌីជីថល។
ជាមួយគ្នានេះ លោកជំទាវបណ្ឌិត បានលើកទឹកចិត្តឱ្យគ្រប់គ្រឹះស្ថានធនាគារ និងហិរញ្ញវត្ថុ និងគ្រប់តួអង្គពាក់ព័ន្ធ សូមចូលរួមផ្សព្វផ្សាយ និងជំរុញការប្រើប្រាស់ កម្មវិធីទូទាត់បាគងទេសចរ «Bakong Tourist App» ឱ្យបានទូលំទូលាយ ដើម្បីទាញប្រយោជន៍ឱ្យអស់លទ្ធភាពពីការប្រើប្រាស់សមិទ្ធផល ដែលបានដាក់ឱ្យដំណើរការក្នុងថ្ងៃនេះ។
គួរជម្រាបថា ធនាគារជាតិនៃកម្ពុជា បានដាក់ឱ្យដំណើរការ ប្រព័ន្ធបាគង (Bakong) ជាផ្លូវការ នៅខែតុលា ឆ្នាំ២០២០។ គិតត្រឹមឆមាសទី១ ឆ្នាំ២០២៤ ការធ្វើប្រតិបត្តិការតាមប្រព័ន្ធបាគង ដែលគិតជាប្រាក់រៀលមានទំហំទឹកប្រាក់ចំនួន ៧៧,៣៦ទ្រីលាន រៀល និងជាប្រាក់ដុល្លារអាមេរិកចំនួន ៤៦,៣៣ប៊ីលាន ដុល្លារអាមេរិក។
អត្ថបទ និងរូបភាព : មន្ទីរព័ត៌មានខេត្ត
